41
Usa 'ain ka Leviatán kakë ñuina chaiira aribi ñuikin Job ësokin kakëxa ¿Min kaina achúshi mishkitinën a ñuina biti 'ain? ¿Bianan kaina mia pitima kupín mëxin kuëëtëkërë kati 'ain?2 ¿Min kaina mëxi aín rëkinu rëatsimianan,
achúshi kuëkinan aín kuëshánu biti 'ain?
3 ¿An kara 'ë uisabi oxunma ka 'at kixun kanan
'ë kamina nuibakin kuëmëninkin kati 'ai kixun mi kati 'ik?
4 ¿An kara mi 'ën kana xënibua 'aínbi
tëmërakinbi ñu mëëxunti 'ai kixun mi kati 'ik?
5 ¿Mix kaina abë kuai tuáxu 'isáratsubë kuaikë usaribiti 'iti 'ain?
¿'Ianan kaina an min 'ini bëchikë kaman ismainun tëkërëkatankëxun nikinti 'ain?
6 ¿A kara an marukë unikaman maruia abë kuëbikananxun bibianxun,
anuxun ñu marukë anuxun maruti 'ik? ¿Anan kara chánkapaxun aín nami maruti 'ik?
7 ¿Min kaina aín xakábi pëánkabianxa atsíntanun pian 'ananbi
chikárunënribi aín maxkánu 'ati 'ain?
8 Usokin 'axunmi 'urama oxun bikëxa mibë 'itsaira tananankë a kamina min manutima 'ain,
'ianan kamina uínsaranbi usakin 'atëkënkatsi kitima 'ain.
9 Uin kara Leviatán isia ax ka aín iskëinshi rakuë́tan bamai aín ñunshin nëtë́tishi menu nipakëti 'ikën.
10 Uin kara ubioisatania ami ka Leviatán nishia,
usamaira kana 'ëx 'ain usa 'ikë ka uínbi kushiira 'ikë 'ë ubiotima 'ikën.
11 ¿Uix kara Leviatánbë 'akanantankëx uisaibi 'ikëma asábi 'iti 'ik?
Uixi ka kamabi menu 'ikë unikama usai 'itima 'ikë ax ka 'ën unio 'ikën.
12 Uisa kara Leviatán 'ikë kianan kana añu kara 'axa kiax kin,
aín taë kamaxa kushiira 'imainun ka aín namixribi bëtsi ñuinakaman namísama 'ikën.
13 ¿Uin kara aín bichi iruira 'ianan,
manë chupa pañukësa amia katamëkë a bikuananbi aín nami pëánkakin 'ati 'ik?
14 ¿Uin kara kushikian aín rëkin 'ianan aín kuëbí tsënkaiabi
anchatia aín xëta xënxëira akamax mëratanun aín kuëbí bákati 'ik?
15 Aín kaxukamax ka biranani manë parókë
takáshkikësa 'imainun maxá iru usaribi 'ikën.
16 Usa 'ain ka aín xaká upiti aín namimi takáshkikë aín,
anu uisa suñuratsubi aín naminu atsinima.
17 Usa 'aish ka aín namikama ax biranani tsënkanankë 'aish,
uínbi chánkapakinbi raskapatisama 'ikën.
18 'Ianan ka ax munuma 'atinshón kikë ax kaná mëríkë usaribi 'ikën;
'ianan ka aín bërux barin urukin pë́kabëtsinkë usa 'aish ënxaira 'ikën.
19 Aín kuëbínuax panpaira tsi rëkirukësa 'ikëbë ka
anuax tsi sarakikësai 'i abisia.
20 Aín rëkinan ka unin kënti cha tsinu 'arukëxa,
kubini kuini 'ikë usairibi 'inun kuin chikitia.
21 Aín uinkë ax ka tsi ëxku ënxaira usa 'ikën,
'imainun ka aín kuëbínuax tsi rëkirukësa usaribi chikitia.
22 Aín tëxá ax ka kushiira 'ikën
usa 'ixun ka an kamabi uni rakuëmia.
23 'Imainun ka aín nami iruira
'aish manë charokësa 'ikën, usa 'aish ka uínbi tëatisama 'ikën.
24 'Ianan ka aín nuitu axribi mapara iru usa 'ianan,
anun ñu rënti maxá iru usaribi 'ikën.
25 Uínsaran kara ax niruia anun ka kamabi unin
rabikë dioskama atux ami 'itsaira rakuë́ti abatia.
26 Uínbi ka manë xëtokën 'anan masibu 'imainun,
pia mëtubu 'ianan chaxkë́bu anun 'akinbi uisabi oima.
27 Usa 'aish ka manë charóxun anun 'ati 'akë ax basira 'ikësa usarishi aín namimi tsasibutia 'ianan ka
i pachi chë́kikë 'ikësai manë axi 'ia.
28 Usa 'ikë ka pian 'akinbi abámima;
'imainun ka maxá ami pukëxbi basi chushikë nikësa usaíshi 'ia.
29 Uin kara i tëakënën rëkatsi kixun 'akëxunbi ka basi xo chushikësara 'itánun ax kushi 'ixun anun 'akaskëxunbi i 'imia;
'ianan ka anun 'anuxun pia bikin banamia kuatíbi an ka 'ë uisabi oima kiax rakuë́tima atumi kuaia.
30 Usa 'ixun ka nirikiani anun kuankin chua me ain shikanën;
anun me tuukakë kuënukënën 'akësa 'itánun me tërëbiania.
31 Axa parúmpapa baka 'ukëmëu nanë́kiani kuankëbë ka 'umpax;
tsinu kënti chán 'arukëx kubini 'ikësai mumukiabatia, usai ka ro mëskuxun kubiónkëx 'ikësa 'inun 'ia.
32 'Ianan ka anua rakákë anuax nirukiani kuani
nanë́kiankin aín rani tiríkikë a anubi uxuira 'aish chabáchabá kikë a bakanubi ëbiania.
33 Uinu 'ikë menubi ka usaribi ñuina 'aíma 'ikën;
a kana 'ën uinsaranbia raíri ñuinakama 'ikësai rakuë 'inun unioma 'ain.
34 Usa 'ixun ka kamabi ñuina raëkëmakama aín kushisamaira 'ixun,
achúshi 'apua raíri unikama ñusma okësa usaribi okin 'aia kiax ka Dios kiakëxa.