Jobnën Diosan ka an 'unánkësamaira okin ñu 'unánxa kixun sinan ñuikë bana
42
1-2 'Ën kana 'unanin mix kamina an kamabi ñu upíokin 'unánkë a 'ain, 'imainun ka min 'akasmati ñukama 'aíma 'ikën.3 ¿Ui karana 'ëx 'ain min 'aisa tankin sinánkë ñukama kamina 'atima 'ai kixun mi sinánxukin,
'ëx ñu 'unánkëma 'ixun kana usakin sinánti 'ain?
'Ëx kana minmi 'unánkëma ñukama ñui kiakën,
'ianan kana uínbia iskëma ñukama min kuaisama 'itánun ñui kian.
4 Min kamina 'ë kakën: “'Ën mi kamainun kamina kuati 'ain;
'ën mi ësokin ñukákëxun kamina usabi okin 'ë kati 'ain.”
5 'Ën kana bëríbi kamabi unia mi ñui kikë anuishi mi 'unan,
'aínbi kana bërí 'ën bërúnbi mi isin.
6 Usa 'ain kana 'ëx kikë banakama a sinani rabinin,
chimapu kupúkënu tsóxun kana usai kiaxma 'inúma kana kia kixun sinan.
Diosan amiribishi Job ñuñuira 'inun 'imitëkëan bana
7 Ësokin pain a ñukama Job katankëxun ka Diosan Elifaz kakë uni aribi kakëxa: 'Ëx kana mi 'imainun min 'unánkë uni rabë́ amiribi 'itsaira nishan, mitsun kamina asérabi upiti banaima 'ë ñui këmëi banan 'ën uni Job ax kuni ka asérabi 'ë ñui upiti banaxa. 8 Usa 'ain kamina bërí 'ëx mitsumi nishkë a nëtë́tanun, mapai achúshi 'imainun rabë́ vaca bërí kanikë këñun mapai achúshi 'imainun rabë́ carnero bibiani uinu kara 'ën uni Job 'ia anu a buani kuanti 'ain, anuxun kamina a ñuinakama rëxun 'aímai këñutanun xaroti 'ain. Usakin 'akëbëtan ka 'ën uni Jobnën mitsu 'ë ñukáxunti 'ikën, ñukákëxun kana an 'ë kakësabiokin, mitsu uisabi otima 'ain, mitsun kamina asérabi 'ë ñui upiti banaiman, 'ën uni Job ax kikësai. 9 Usakin kakëx kuanxun ka Elifaz, Bildad 'imainun Sofar a unikaman Diosan kakësabiokin 'akëxa, an ka Nukën 'Ibun Jobnën ñukësabi okin 'akëxa.
10 Usokian an 'unánkë unikama ñukáxunkëxun ka Diosan, Job bëráma 'iásabi ñuñuira 'inun 'imitëkëankëxa 'imikin ka bëráma 'iasamairaia ñuñuira 'inun a inumikin rabë́ okin ñu 'inantëkëankëxa. 11 Usa 'ain ka kamabi aín xukë́nkama, 'imainun aín chirabakëkama 'ianan aín 'unánkë unikama, 'imainun bërámabia 'unan unikama atúxribi a isi, ain xubunu rikiankëxa anuxun ka abë timë́xun fiesta 'akin atubëtan piakëxa. Usakin 'akin ka Diosan 'imikëxa 'itsaira paë tani tëmërakë anun kananuna nuxribi masánuitua kixun kakankëxa, kanan ka atu achúshi achúshinën manë uxua kuríki 'akë a 'inánan, mëñusuti kuri 'akë aribi 'inankankëxa.
12 Usa 'ain ka Diosan upíokin Job sinánxunkin tëmërakëma 'aísha 'ikësamairaia ñuñuira 'inun 'imikin. Ka catorce mil ovejakama, seis mil camellokama, mil vaca ain bënë rabë́, rabë́, 'imainun mil burro aín xanukamañu 'inun 'imiakëxa. 13 'Imianan ka catorce bakë bëchikë bëbuñu 'ianan rabë́ 'imainun achúshi 'ini bëchikë xanuñuribi 'inun 'imiakëxa. 14 Aín rëkuë́n 'ini bëchikë xanu aín apan ka Jemimá kakin anëakëxa, anëanan ka ain nëbëtsi 'ikë a Quesiá kakin anëanan ain 'anákaira a Queren-hapuc kakin anëakëxa. 15 Usa 'ain ka uinu 'ikë menubi xanu upíira Jobnën bakë bëchikë xanukamasa 'aíma 'iakëxa. Usa 'ikë ka aín papan akama aín ñu 'inánkin aín bakë bëchikë bëbukamaribi atunan 'inun aín ñu 'inánkëxa. 16-17 Usokin 'atankëx ka Job ciento cuarenta baritia 'imi tsóakëxa, usai 'i ka xënibuti tsótankëx ñuakëxa 'aínbi ka aín bakë bëchikë ñunuxun isanan aín bakë bëchikënën bakë bëchikë aín xuta, 'imainun aín xutan bakë bëchikë akama tsókëpain 'ixun isakëxa.