6 Ësokin unikama katankëxun ka Esdrasnën Dios ësokin kakëxa: “Mixmi Dios ira 'ain ka misaribi Dios uixi 'itima 'ikën. Min kamina naíkamë 'ëo 'anan a manámia 'ikë ñukama këñun anu 'ikë 'ispakamaribi uniokën; 'anan kamina meribi 'atankëxun anu 'ikë ñukamaribi 'akën, 'atankëxun kamina parúmpapanu 'ikë ñukamaribi 'akën. Usa 'ain ka min 'imikëx kamabi ñukamax upiti tsotia. Usa 'ikë ka min ángel naínu 'ikë kaman rabimainun menuxunribi mi rabiti 'ikën. 7 Usa 'ain ka anu 'ikë 'ispakamanribi mi rabia, Dios min kamina min uni 'iminuxun Abraham kaisakën usa 'ixun kamina Ur kakë caldeokaman, ëma anua chikíntankëxun Abraham kakin minbi anëakën. 8 Min iskëx ka ax achúshi uni mimira sinani katamëkë 'iakëxa, usa 'ixun kamina abëtan achúshi ñu 'akinmi min rëbúnkikama kana anua cananeos unibu 'imainun hititas, amorreos, ferezeos, jebuseos 'imainun gergeseos; ¡a unikaman me 'inánuxun 'ai kixunmi kásabiokin 'akën, min kamina asérabi mix kikësabiokin ñu 'ain! 9 Min kamina uisai kara nun chaitiokëkama Egipto menuax tëmëraia kixun isakën, usa 'ixun kamina parúmpapa xónsa kakë a kuëbínuxuan atun mi ñukákëxun kuakën. 10 'Imainun kamina min kushi ismikin faraón 'imainun an ñu 'axunkë unikama 'imainun kamabi unikama aín menu tsókë akama ismikin ñu chaiirabu 'akën, min kamina uisakin kara atun Israel unikama tëmëramia kixun 'unánkën. Usa 'ixun kamina bërámami 'ása okinbi mix kamina kushiira 'ai kixun unin 'unánun bëríbi ñu 'ain. 11 'Imainun kamina atun ismainunbi parúmpapa panarabëtanun 'imiakën, usakin 'imikëbëa me rakati ëskikëbë ka a nëbë́tsinën atux sikarakëakëxa 'aínbi kamina axa atu nuibëtsini ukë unikama bakan këñunun 'imiakën, 'imikëx ka maxáx 'ikësaishi nanëti bakami kikankëxa. 12 Usakin 'anan kamina a isiania min unikama kuanti nëtën kuin 'imianan imë́ribi tsi rëkirukësa 'ixuan anun kuanti pë́kanun 'imiakën, 'imikëxuan anúan kuanti a pë́kakëbë ka anun atux kuankëxa.

13 Usokin 'atankëxun kamina aín bashi Sinaí kakë, anuax nun chaitiokëkamabë naínuaxëshi banakin min bana upíirabu a 'unámikin asérabi a tanti banakama 'imainun ax kikësabi oi 'iti akama upíokian 'unánun min banakama 'inánkën. 14 'Inánkin kamina uisai kara sábado nëtë 'ikëbë tantiti 'ikë aribi 'unámianan a tanti banakama asérabia min uni Moisésnën upíokin 'unánminun 'amiakën. 15 'Imainun kamina naínu 'ikë pán 'akëñuma 'ixuan pinun 'inánan 'umpaxribi maparanua shióbutia shimaxun xëanun 'inánkën. Usokin pain 'atankëxun kamina a 'inánkatsi kixunmi nun chaitiokëkama ká me a bitsia anu kuanun atu 'imiakën. 16 'Aínbi ka nun chaitiokëkama usakin kamina ñu 'ati 'ai kakëxun kuatima 'ianan, min banakama kikësokin 'ama 'ikën. 17 Usai 'ikin ka min kakëxun kuaisama tanan minmi chaiira ñu atu 'axuan abi sinánkama 'ikën. Usai 'ikin ka min bana kuaisama tankin achúshi 'apu an isa anuaxa tëmërakë Egipto me anubi uantëkënun kixun anëakëxa. 'Aínbi kamina mix Dios an 'uchaiabi uni nuibakë a 'ixun uisabi okinma, nuibairakin 'atimokinma 'akinkin ñu 'atima 'aiabi atu ëanma 'ain. 18 'Imainun ka atúnbi sinánxun vaca bakë tankin achúshi ñu a rabinuxun manë charóxun 'akëxa, 'atankëx ka ënëx ka nun dios an Egipto menua chikínbëtsinkin nu bëkë a 'ikë kiax kikankëxa, usakin atun ñu 'akë ax ka 'aisamaira ñua 'akë 'iakëxa, 19 usai 'iabi kamina min atu nuibakin, anu uni 'ikëma menuxun uisa kara nitsia usai 'itánun ënkinma 'akiankën. Usokinmi 'akinkëbë ka nëtë kuinsa ax atu ënima nëtënbi a isbiania kuankanun rëkuë́nkiankëxa, 'imainun kamina imë́ribia tsi rëkirukësa 'ixun anun kuankanun pë́kati 'imiakën. 20 Usa 'ain kamina min atu 'akinkin uisai kara tsóti 'ikë min kushin 'unamikin uínsaranbi ënkinma atun piti maná 'inánan shimakian xëati 'umpax aribi 'inánkën. 21 'Inánkin kamina cuarenta baritia anu uni 'ikëma menu nitsia atun piti panax nikinma pinun 'inánkën, usakinmi 'akëx ka uínsaranbi ain piti ñuñuma 'ima 'ikankëxa: 'ianan ka atun pañuti chupabi chë́kima 'ianan, 'itsaira nikëbëbi atun taëbi paë 'uatimabi 'ikankëxa.

22 'Imainun kamina bëtsi bëtsi me anua 'apu 'ikë 'imainun ëmakama bitankëxun achúshi achúshi uni atunan 'inun 'inánkën, usokin 'inánkëxun ka atun Hesbón kakë me anua 'ikë 'apu Sihón aín me 'imainun Basán kakë me anua 'ikë 'apu Og aín meribi bikankëxa. 23 Usonan kamina atúxa 'itsaira bëchipati naínua imë́ 'ispa iskësa 'itanua bakë bëchipanun 'imianan, atunan 'inun a 'inánnuxumi nun chaitiokëkama ká me a bitsi kuanun minbi a menu kuanun atu buánkën. 24 Usakin 'imikëxun ka atun Canaán kakë me anu kuanxun bikankëxa; bikëbëtan kamina minbi anu 'ikë unikama atu uisabi oxunma 'anun 'imiakën, 'imia ka atun 'apukama këñunbi atu 'urama 'ikë unikama uisokin kara 'aisa tania usakin 'akankëxa. 25 'Akin ka ëmakama upíokian kënëarakama a 'imainun me upíbu anu ñu 'apákëxa upiti kookë 'imainun atun xubu anua ñu upíirabu bukúnkë a 'ianan anua atun 'umpax biti me kinikë upíirabu a 'ianan atun uvas 'apákë a 'ianan olivos 'imainun raíri i bimi an tuákë akama bikankëxa; bitankëx ka a menu upíokin puchákin pi xuati atun kuëënkësa oi 'i tsókankëxa.

26 Usokinmi min 'akinkëxbi ka min kakësokinshi 'aíma a tanti bana kuaisama tani 'ikankëxa. 'Anan ka an min bana ñuikë unikamaribi, mimia sinánun kakëxunbi kuaisatankin, kamaxunbi kuamainun mimisa 'atimai banaxa kixun këmëkin 'uchoxun rëkankëxa. 27 Usakin 'aia kamina axa ami nishkë unikama tëmëraminun 'inánkën. Usakin 'akian tëmëramikëxun tankin ka atun min 'akinun kixun mi ñukákëxa, ñukákëxun nuibakin kamina naínuxunbi atun bana kuakin; an 'atimokë unikamanua an chikínti unikama bariakën.

28 Usakinmi 'akinkëx upiti tsótankëxi ka amiribishi 'atima ñu 'ai atux mimi 'uchatëkëankëxa; usai 'ia kamina axa ami nishkë unikaman 'atimonun ëankën, ënia ka atun an kuëënkësokin 'akankëxa. Usakin 'akëxun ka minmi 'akinun kixun amiribishi mi ñukátëkëankëxa, ñukákëxun kamina 'itsaira nuibakin naínuxunbi atun bana kuakin, ënkinmaira 'itsa okin atu 'akiankën. 29 Usokin 'anan kamina a tanti bana amiribishi ax kikësabi okían 'anun atu kakën; 'aínbi ka a banakama isa 'unánxa kikin atun min banakama kikësokinbi 'ama 'ikën; uin kara min bana kikësabiokin 'aia ax ka upitax tsóti 'iakëxa, usa 'aínbi ka min bana kikësabiokin 'akinma 'atimakin 'akëxa usakin 'aika atux a bana kuaisamatani ax kuëënkësa 'oíshi 'iakëxa. 30 Usaia 'itsa baritia 'iabi kamina atu munu nuibakin min bëru ñunshin 'imainun; an min bana ñuikë unikaman usai kamina tëmërakanuxun 'ai kixun kakëxa, kakëxunbi kuaisama tankën, usai 'ia kana ami nishkë unikama bëtsi menu 'ikë unikaman atu 'atimonun ëankën. 31 Usai 'iabi kamina min 'itsaira nuibakin kamabi atu këñuananbi manukin ëanma 'ain; usa 'aish kamina mix nuibanairakë Dios a 'ain.

32 Mix kamina chaiira 'ianan Dios kushiira 'ain 'imainun ka kamabi unix mimi rakuë́tia, usa 'aish kamina Dios ñu 'akatsi kiax kana 'aima kikínma an ñu asérabi 'akë a 'ain, 'imainun kamina uínsaranbi nu nuibakin ënkëma 'ain, minbi kamina isan uitishi kara nun 'apukama 'imainun ain kushikama 'ianan, nun sacerdote 'imainun an min bana ñuikë unikamabë nun chaitiokëkama 'iásaribiti tëmëraia, a nëtëkaman Asiria 'apun aín suntárukamabëtan 'akëxnu 'ia usaibi kananuna bëríbi tëmërai 'in. 33 'Aínbi kamina nuxnu nun ñu 'atima 'akë kupí usa ñukama 'inúkëbëbi uisa karamina mix 'ain usabi kamabi ñu 'inúkëbë 'in; min kamina upíokin ñu 'ain, 'aínbi kananuna nukama 'atimakin ñu 'ai mimi 'uchakën. 34 Usa 'aínbi ka nun 'apukama 'imainun aín kushikama 'ianan sacerdotekama, 'imainun nun chaitiokë kamanbi ka min bana a tanti bana kikësokinbi 'ama 'ikën. 35 'Aima 'ianan ka anua atun 'apubë tsókë me anuxunbi min 'itsaira 'akinkë a sinánkin mi rabiama 'ikën, 'ianan ka atun ñu 'atima 'akëkama ëinsamatankin ñu 'atimashi 'akankëxa.

36 Usa 'ain kamina nukamami sinánti 'ain, bërí kananuna bëtsi unikaman ñu mëmikë uni 'ain, usa 'aish kananuna nun chaitiokëkamami anu ñu 'apáxun bimia pia bukunun 'inan me ënu uni itsin ñu mëëmikë 'ain. 37 Usa 'ain ka 'aisamaira ñu 'apákëxa bimikë ax 'apukamananshi 'ikën, minbi kamina nun 'ucha kupían atun usakin nu 'anun ëan. Usa 'ain ka nukama 'imainun nun 'arakakë vaca atun kuëënkësa okin 'aia. Usakin nun ñu 'akëbë kananuna a sinani 'itsaira masá nuituti tëmërain.”

38 Usa 'ain kananuna kamabi ënë ñukama inuti nux tëmëran, usa 'ixun kananuna bërí Nukën 'Ibu Diosan bana kikësa okinshi ënkinma kirikanu kuënëoti, 'amianan anun atun ñu takáshkakë anua nun 'apukamabëtan Levitas unikama 'imainun sacerdotekaman 'anun 'amiti 'ain.