Esdras uni timë́kë 'ain a tanti bana kuënëo isi kia bana
8
Usa 'ain ka mapai achúshi 'imainun rabë́ 'uxë 'ikë 'ain, kamabi Israel unikama anua tsóti atun ëmabi anua 'iti 'akin pëuakëxa. 1 Usa 'ain ka kamabi ëmanu 'ikë unikama plaza, anun 'umpaxnu atsínti xëpúti a puntëbi 'ikë anu timë́akëxa, anuxun ka an ñu 'inánkë uni Esdras a usai Israel unibu 'itia Diosan Moisés kuënëomia banakama a bënun kakankëxa. 2 Anúan mapai achúshi 'imainun rabë́ 'uxë ax achúshi nëtë 'itabati 'irukë anun ka sacerdote Esdrasnën anúan usai Israel unikama 'iti kuënëo a kirikanua kuënëo bana kamabi unibëbia xanukama 'imainun tuá xumabu an bana kuakë akamanbia uisai kara kia kuati bëakëxa; 3 bëkë ax ka pëkarakëma 'aínshi 'apunkin bari manímikin kamabi unikama axa plaza anun 'umpaxnu kuanti xëpúti puntë, anu timë́kë atun kuati 'iakëxa. Usa 'ain ka kamabi unikama timë́kë an usai 'itia kuënëo bana isi kia uisaibi 'ikinma timë́xun kuakankëxa. 4 'Imainun ka an ñu 'unánmikë Esdras ax anuxun a kirika istia i tapuakin 'akë anu nikë 'iakëxa. 'Imainun ka a rapasu Matatías, Sema, Anías, Urías, Hilquías 'imainun Maaseías akama 'iakëxa. 'Imainun ka a mëkeuribi Pedaías Misael, Malquías, Hasum, Hasbadana, Zacarías 'imainun Mesulam akamaribi anu sëtë́kë 'iakëxa. 5 Usa 'ain ka Esdrasnën kamabi unikama timë́kë atun ismainunbi, atun kamaxunbi istisabi 'inun manámi nixun kirika isi ki bananuxun bákakëxa; bákakëbë ka kamabi unikama timë́kë ax nirukankëxa. 6 Usakin 'atankëxun ka Esdrasnën Dios kamabi kushiñu a rabiakëxa, 'imainun ka kamabi unikama timë́kë atun ka mëkën manámi oi mëshpati kikankëxa: “Asábi ka asábi ka.” Usakin 'atankëx aín bëmánanën me tikai tsóbukin ka Dios rabikankëxa.7 Rabimainun ka levita unikama Josué, Baní, Serebías, Jamín, Acub, Sabtai, Hodía, Maaseía, Quelitá, Azarías, Jozabed, Hanán 'imainun Pelaías ënë unikaman ka uisai kikë kara a bana 'ikë kixun kuakanun ñuixuankëxa. Usakin ñuixumainun ka a unikama ax anubi sëtë́kë 'iakëxa, 8 usaía anubi sëtë́kankë 'ain ka munuma banakin a tanti bana Diosan kakëxun kuënëo isi kia, raírinën uisai kara a banakama kia kixuan 'unánun unikama upiokinra ñuixuankëxa. 9 Usakin a banakama ñuixunkin këñuia kuatia 'itsaira masá nuituti inia ka kamabi unikama timë́kë a an bana mëníokë 'apukama 'imainun Nehemías, an ñu 'inánkë unikama sacerdote Esdras 'imainun Levitas an unikama timë́kë a uisai kikë kara a bana 'ikë kixun ñuixunkë a kaman kamabi unikama kakëxa, mitsux kamina masá sinani nitë́xëti intima 'ain, ënë nëtëx ka anun Dios rabiti nëtë 'ikën. 10 Kanan ka ësakinribi Esdrasnën kakëxa: “Mitsun 'ikënu rikianxun kamina upíokin 'axun pianan uvas baka vino bataira 'itánun 'akë a xëanan ui kamax kara ñuñuma 'ixun aín piti 'akëma 'ikë akama kuëntankëxun pikianan xëakinti 'ain, bërí ka achúshi nëtë anun Dios rabiti nëtë 'ikën. Usa 'ain kamina masá nuitukinma Diosan ka nukama 'akinti 'ikë kixun sinánkanti 'ain.”
11 Usakian Esdrasnën kakëx inkaniabi ka Levitas unikamanribi kamina 'aisamaira masá nuituti inkantima 'ain kixun kakëxa, bërí ka masá nuitukinma anun nun 'Ibu Dios rabiti nëtë 'ikë kixun ka atu kakëxa. 12 Usakin kakëx chuámarua tani kuëëni rikianxun piananbi xëakin axa pitiñumakama aribi kuënxun pikianan xëakikin fiesta chaiira atun 'akëxa, upíokian atu bana ñuixunkë a kuatankëx kuëënkin ka usakin 'akankëxa.
Anun 'uta 'atankëx anu 'iti nëtë 'ikëbëtan fiesta 'akan ñuikë bana
13 Usakin 'axun ka anunbi a nëtë nuikin ónkë a pë́karakë 'ain ka kamabi aín aintsi kushikama 'imainun sacerdotekama 'ianan Levitas unikamaribi 'imainun an ñu 'unánkë Esdras abë timë́xun, uisai kara a tanti banakama anubi aín sënë́nkënua 'ikë bana ax kara uisaira kia upiokin 'unánkatsi timë́kankëxa, 14 timë́xun kuakëxbi ka kirikanua Diosan usakin kuënëonun kakëxuan Moisésnën kuënëo bana ax kara uisai kia kuakatsi timë́kankëxa, kamabi Israel unikamax ka timëkamë 'ëoxun fiesta 'ai 'uta 'atankëx mapai achúshi 'imainun rabë́ 'uxë 'ikëbë anu 'iti 'ikë kiax kikë bana kirikanua kuënëo 'ikë mërakëxa. 15 Mëraxun ka ëma kamanu chanionan Jerusalén ëmanuribi bana ñuiakëxa, ñuikëbë ka a bana kuati kamabi unikamax ninu 'ikë olivos pëi 'imainun i pëñanakëkë aín pëi 'imainun xëbin pëi akamakëñun bëtsi i pëikamaribi kuënëo bana kikësabiokin 'uta 'ati bitsi tsuákirukankëxa. 16 Tsuákirukiani kuanxun ka i pëi bitsínkin bëxun atun 'utabi 'utabi 'akin xubu manámi 'anan me mëníokënu, 'anan anuxun Dios rabiti xubunu me mëníokë anun niti anuribi 'anan anun 'umpax 'ikënu kuanti xëpúti bëtánain 'ikë plaza anubi 'anan Efraínën plaza kakënu anun atsínti xëpúti a puntë anuribi 'akëxa. 17 Usa 'ain ka kamabi uni axa bëtsi menu buan 'aish utëkënkë unikama atúxribi 'uta 'atankëx anu 'ikankëxa, usakin ka Nunnën bakë bëchikë Josué an 'amikëxun ishi 'a 'ixun ëan 'ixunbi 'akëxa. Usai ka 'aíma 'i në́a 'ixun, 'ai a unikamax 'itsaira kuëënkankëxa. 18 Usaia fiesta 'ai kamabi uni timë́kë 'ain ka Esdrasnën anúan timëkankë a nëtën pëuëxanxun mapai achúshi 'imainun rabë́ nëtë sënë́nmikin a tanti Diosan bana kuënëo a isakëxa; 'imainun ka usakin 'atankëx usabi okin 'ati kikësabiokin 'ai, achúshi nëtë 'imitëkëni anúnribi timëkamë 'ëotëkëankëxa.