Jerusalén ëma kënëkin 'atëkënkëbë ami nishkë unikama atumi kuai kia bana
4
Amiribishinu Jerusalén ëma rurupa aín kënë 'atëkënia kuati ka a kuëënima, Sambalat numi kuaianan 'aisamairai judíos unikamami nishi pëukuti, 2 abëa 'ikë unikama 'imainun Samarianu 'ikë suntárukamax ësai kiakëxa: “¿Atux añu 'ixun kara judíos unikama numin bamai bukukë 'ixunbi usakin ñu 'atëkënkatsi kiti 'ik? ¿Atun kara amiribishi anuxun atun Dios rabitëkënkin ñuina xaroti sinánkanin? ¿'Imainun kara atun achúshi nëtën ishi kananuna ñu mëëkin këñuti 'ain kixun sinánkanin? ¿Atun kara xaró 'aísh bukukë anua maxá upíbu amiribishi bitëkënti sinánkanin?” 3 Usai kia a 'urama 'ikë uni kuati ka Tobías, amonita uni axribi ësai kiakëxa: “Ka kuat, atun ka anun ëma kënëara a birutëkënia: ¡'aínbi ka kapa 'inu achúshinëxa anu 'irukëbë rurukubutisa 'ikën!”Nehemíasnën Dios ñuká bana
4 Ësaia atux kikëa ñuikania kuakin kana Dios ñukákin ësokin kakën: “Nukën 'Ibu Dios: bëtsi unikamaxa numi kuai kikë a kamina kuati 'ain. Atúxa numi kuai kikë ax ka usaía atúxbi 'iti 'ikën, usa 'ain kamina axa atumi nishkë bëtsi unikaman aín menu buántanun 'amiti 'ain. 5 Usa 'ain kamina atun ñu 'atima 'akëkama a tërënxunkin atun 'uchakëkama manutima 'ain, atun ka anun ëma kënëara a 'atëkënkin mënionbi nu chichakin ñuia.”
Anun ëma kënëara 'atëkënia 'akatsi kixun ami nishkë unikaman sinán bana
6 Usai kikëbëtanbi kananuna a tankima anun ëma kënëara 'ikëbia rëupakan a pëuxun aín manámi nëbëtsi sënë́onkin 'akën. 'Akin ka unikaman 'atibi sinánxun kuëënkin 'akankëxa.
7 'Aínbi ka Sambalat, Tobías a 'ianan árabe unikama 'ianan Amónnu 'ikë unikama a 'imainun Asdodnu 'ikë unikama atúnribi anun Jerusalén bëarara kënë kananuna aín kinikama bëtasbiankin 'atëkëni kixun kuati 'itsaira nishakëxa, 8 usai 'ikin ka timë́xun a kamaxunbi Jerusalén kananuna amiribishi atu ëmikin 'atima otëkënti 'ai kixun sinánkankëxa. 9 Usa 'ain kananuna Nukën 'Ibu Dios pain ñukátankëxun, atúan tëiabi nu uxun 'atima kupí, nëtën 'anan imë́ribi nu bërúanti suntárukama nankën.
10 Usakin pëuxun 'akëbëbi ka Judánu 'ikë unikamax kiakëxa: “Anun ëma kënëara 'ikëbia rëupatëkënkan maxáx ax ka 'aisamaira 'ikën, usa 'ain ka an papikëkama kushiñuma 'aish bënainsa tania, usai 'ikëbëtan karanuna uisaxun amiribishi anun ëma kënëara a 'atëkënkin nukaman sënë́oinsa 'ain.” 11 Usakinnu 'amainun ka axa numi nishkë unikaman sinánkëxa, nun isanuna 'unanima, usa 'ainsa atun nukama atsínxun 'akin nun tëëti 'axuma 'anun rakamiti 'ikë kixun. 12 Usakin sinani nu 'akatsi kia kuati ka atu 'urama 'ikë Judíos uni raírinën uxun nu bëtsin kakë 'ikëbi an kuakë raíri unikamanribi nu manonkin kakëxa, a unikaman ka amami amamiax ukin bëarabuinxun nu 'aisatania, 13 usakin ñuixunkëxun kana 'ën unikama atun aintsibë aintsibë mëníokaxun anun 'akánanti manë xëtokë 'imainun masíbun aín kanti akama bitankëxuan, anun ëma kënëara kaxú aín kini tanainuxun, bërúanun kixun 'amiakën. 14 Usai anun 'akánanti biaxi rakuë́tia kana nirukin, aín sinan mëninshi unikama 'ianan an ëmanuxun bana mëníokë unikama 'imainun raíri unikama ësokin kakën: “Nux kananuna atumi rakuë́tima 'ain. Rakuë́kinma kamina mitsun sinánti 'ain Dios ax kushiira 'ianan chaiira 'ixun ka atu rakuëmiti 'ikën, 'imainun ka an mitsun bakë bëchikë bëbukama 'ianan 'ini bëchikë xanukama 'imainun mitsun xanukama këñunbi mitsun ëma upí 'inun bërúanti 'ikën.”
15 Usai nu 'akatsikia kuati mëníokakë 'ain ka axa numi nishkë unikamax asérabi ka nu Diosan atun 'akinia, usa 'ain kananuna nun sinánkësokin 'atima 'ai, atux kikëbëtan kananuna abi nun tëëti ënkinma 'akën. 16 Usakin 'akin kana a nëtënbi, axa tëëti 'ën unikama atiribi an ñu mëëti 'imianan, atiribi an mëníokaxun anun 'akánanti manë xëtokë, 'ianan ami katamëti manë parókë a 'imainun kanti iru, 'ianan ñuina xaká 'akë chupa akama pañuxuan bërúanun 'amiakën. Usakin 'aia ka anu 'ikë 'apukaman Judánu 'ikë unikama kamabi, 17 anun ëma kënëara 'ikëbia rurupa 'ikëa an kënë 'atëkënkë unikama atu 'akiankëxa. Usakin 'akinkëx tëkin ka an ñu papikë unikamanan ënkinma papikinbi, aín mëkën amotanribi anúan atu 'anux aia 'ati aín manë pia xëtokë tuínxun ñu mëëkankëxa. 18 Usa 'ain ka kamabi uni axa anun ëma bëarara kënë 'aia tëkë unikama atux aín manë xëtokë tsiñukin tëkërëkax, usai 'imainun ka an manë banañu banoti anëkëkama atux 'ë rapasubi 'ikankëxa, 19 'ën kana ësokin aín sinan mëninshi unikama 'ianan an ëmanuxun bana mëníokë 'apukama kanan uni raíri ësokin kakë 'iakën: Anunu tëkë ënëx ka chaiira 'aish bëríra 'abuinkinshi sënëoinsama 'ikën, usa 'ain kananuna uni aín patsan raírinën amoxun 'amainun raírinënribi amoxun 'ai, bëtsi 'ura 'ura 'iruax tëi ënanankë 'ian. 20 Usa 'ain kamina anumi tëkankë anuxunbi pakon bana 'oia kuati bënëtishi nubëbi timë́kanti 'ain, usai nux 'ikëbë ka nun Dios ax nubë 'iti 'ikën.
21 Ësai tëi nux bari urukëma 'aínshi 'ipuni bari kuantamainun tëmainun ka 'ati uníxribi ain manë xëtokë tuínxun nun ñu mëia bërúankëxa. 22 'Imainun kana ësokinribi kamabi uni ax tëkë 'imainun an 'akinkë kamaribi kakën, kamabi mitsux kamina Jerusalén mëu ënubi imë́ nëtën ishi tënux ënananima bëruanani 'ikanti 'ain. 23 Usai 'i kana 'ëx, 'ën 'aintsikama 'ianan, an tëia 'akinkë unikama 'imainun an bërúankë unikama axa 'ë rapasu 'ikë, akamabëtanbi kana chupa pëax 'uxkinma kamaxunbi manë xëtokë tuínxun bërúankë.