—'Ën iskëx kamina 'itsaira masá nuituti nitë́xëkësa 'ain. ¿Uisai kaina 'ian? 'Ën iskëx kamina 'insínkëmabi 'ain, bëtsi ñu 'inúkë 'ixun sapi kamina a sinanin. Usakian 'ë ñukákë anun kana 'itsaira rakuëan, 3 usai 'ikin kana 'apu ësokin kakën:

—¡Mix 'apu 'aish kamina 'itsa baritia buini tsóti 'ain! ¿Uisa 'aish karana 'ëx 'ën aintsikama anu maían ëma axa rurupakë 'imainun aín xëpútikama axribi në́nkëxa rurukubua 'ain nitë́xëtima 'iti 'ain? 4 Kakëxun ka —¿Añu karana mi 'axúnti 'ain? —kixun 'apun ñukákin 'ë kakëxa. Usakin kakëx Dios naínu 'ikë abë pain banatankëxun kana, 5 'apu kakën:

—Mix 'apu 'ikë 'ën ñu 'axúnkëxun 'ë upí uni 'ikë ñu 'axúntisa tankin kamina Judá menu kuantankëxun anua 'ën aintsikama maínkan ëma 'ikëbia rurupakin masókan a mëníotëkënuxun istánun 'ë xuti 'ain.

6 Ësakin 'apu kaia kuakin ka a rapasu tsókë xanu 'apu anribi 'ë ñukákëxa:

—¿Uiti nëtë kara anumi kuanti basiti 'ik? ¿'Imainun kaina uínsaran utëkënti 'ain? Kixun ñukákëxun ati nëtë kana basiti 'ai kixun kakëxun ka 'ë asabika kamina kuanti 'ai kixun kakëxa. 7 Usokian 'ë kakëxun kana ësaribiokin kakën, 'ëx anu kuanti kuëënkin kamina achúshi kirika kuënëoxun Éufrates kakë baka amia bari kuabúkë 'ukëmanan 'ikë 'apukamama Judá menu kuani atun men kuania 'ë inumima, usa 'ain 'inabiantanun 'ë 'axúnti 'ain kixun kakën; 8 'imainun kana ësokinribi kakën bëtsi kirikaribi kamina 'ë an ni bërúanti 'apun nankë Asaf a 'ëa i anun ëmanu atsínti xëpútikama anuxun Dios rabiti xubu 'ikë 'urama 'ikëkama a mëníonan, anun ëma kënëarakë kënë 'ikëbia rurupakin masókan a mëniomianan anu 'ëx 'iti xuburibi 'aminun 'inánun kirika kuënëoxunti 'ain. Usakin kakëxun ka 'apun 'ën ñukákësabi okin kamabi 'ë 'axuankëxa 'ën Diosanbia 'ë 'akinia.

9 Usakin kakëxua 'ë kirika 'inánkëx kana kuankën, kuanxun kana Éufrates 'ukëmanan 'ikë 'apukama a, 'apúan buámikë kirika kuënëokë a 'inánkën, 'imainun ka 'apun 'ëbëa kuanun suntárunën kushikama 'imainun caballonuax 'akánanti 'unánkë unikamaribi xuakëxa.

10 'Aínbi ka 'ëx anu bëbakë kuati ka Sambalat Horónnu 'ikë a 'imainun Tobías amonitakaman 'apu israel unikama an 'akinsatankë unikama ka atunu bëbaxa kixun ñuikania kuati kuëënima 'itsaira nishakëxa.

11 Jerusalénnu bëbatankëx kana. Achúshi 'imainun rabë́ nëtën anu tantiakën, 12 tanti tankëx kana imë́ 'itsama unibëshi uisakin karana Jerusalén 'ati 'ai kixun Diosan 'ë kakë a ñuikin uibi kaima kuankën. Kuankin kana 'ëx anun nikë burro ashi uankin raíri anun kuanti burrokaman uánma 'ain. 13 A imë́bi kana 'ëx ami me sapan 'ikë xëkuë ami kikiani kuantankëx amia 'umpax manánuax xobuti timë́kë Dragón kakë a 'imainun anu ñu puti kuanti xëpúti ami kikiani kuainakëkin, Jerusalén anun kënëara kënë a rurupakan a isanan kana aín xëkuë në́nkan akamaribi isakën. 14 Usakin amia pain istánkëx kana anuaxa baka xobukë a 'imainun 'apun amia 'umpax 'ikë ami kiribi kuankin isakën; 'aínbi ka anun 'ëx kuankë burro ax anun inútisama 'iakëxa. 15 Usa 'ain kana a 'imë́bi pëkaratisama 'aínshi, xëxá buarukin isanan, anun ëma bëararakin kënëa, akama istánkëx, kana amiribishi anun me sapan kianxa bashi 'irukë anun atsínkë xëkuë anunbi utëkëankën. 16 Usai 'ëx nitsiabi ka anu 'ikë 'apukaman uinu karana 'ëx kuani 'unánan añu 'ai karana nitsi kixunbi 'unánma 'ikën. Usai 'i nikinbi kana 'ën judíos uni sacerdotekama 'ianan, uni upí sinánñu akama kanan 'apukamaribi kakëmapan 'ianan uni raíri atúxribia ñu mëëti 'akëbë anu tëëti unikama abi káma 'ain. 17 Kaxumabi kana 'ën pain istankëxun atu kakën:

—Mitsúnbi kamina upíokin 'unanin, nux kananuna 'aisamaira ñu inuti tëmërain, Jerusalén ëma ënëx ka anun kënëa akama rurupanan aín xëpútikamaribi në́nkan 'aish 'aisama 'ikën. Usa 'ain kananuna anun Jerusalén ëma kënëara 'ikëa rurupakan ënënu mëníotëkënun kamáxbi timë́kanti 'ain, numima unikama kuaia usa 'ain kananuna mëníotëkënti 'ain.

18 Usa 'ain kana Diosan 'ë upíokin 'akinkë a ñuixuanan usakian 'apun 'ë kakë a banakamaribi ñuixuankën, ñuixunkëxun ka atúnribi ësokin 'ë kakankëxa:

—¡Asabi ka usa 'ain kananuna kamaxunbi amiribishi ënë ëma kënëtëkënti 'ain! Usai ki ka kamaxunbi kananuna 'ati 'ai kiax kuëëni bëtsibë bëtsibë kánani kikankëxa. 19 'Aínbi ka usakinu 'ati a banakama kuati Sambalat Horónnu 'ikë a 'imainun, Tobías amonita unikama an 'akinkë a 'imainun Guésem árabe unikaman kushi akamax nukamami kuai nu istisama tani kiakëxa:

—¿Añura 'ixun kara atun usakin ñu 'atëkëinsatanin? ¿Atun kara 'apumi kuaiti sinánkin usakin ñu 'aisatanin? 20 Kixun kakëxunbi kana 'ënribi ësakin kakën:

—Dios naínu 'ikë an ka usakinu nukaman 'atëkënun nu 'amiti 'ikën. Nukamax aín uni 'ixun kananuna an nu 'akinkëxun amiribishi nun ëma aín kënë 'atëkënkin taëoti 'ain, usakin nukaman 'akëbëbi kamina mitsux a ñui uisaibi kikantima 'ain, Jerusalén 'ia a kamina mitsun uisaxunbi sinántima 'ain.