Azarías 'imainun Hilquías 2 Salum, Sadoc, 'imainun Aítub, 3 Amarías, Asarías 'imainun Meraiot, 4 Zeraías, Uzí, Buquí, 5 Abisúa, Finees, Eleazar 'imainun ka ax pain sacerdote 'ikë Aarón akama 'iakëxa. 6 Esdras ënëx ka achúshi sacerdote an upíira okin 'unánkin Diosan 'amikëxun Moisésnën kuënëomia bana 'unánkë 'iakëxa, usa 'ikëa Diosan 'akinia ka 'apu Artajerjesnën kuëënkin an ñukákësabi okin kamabi ñu 'axuankëxa. Ësokin pain ñu 'aia 'unánxua 'apun xukëx ka Babilonia menuax Esdras kuankëxa, 7 kuankëbë ka Jerusalénnu raíri Israel kama 'imainun sacerdote, levita unikama 'ianan axa kantati 'unánkëkama 'ianan an xëkuë bërúankëkama 'imainun anuxun Dios rabiti xubunuxun an ñu mëëkë unikama atúxribi rikiankëxa, 'apu Artajerjes mapai achúshi 'imainun rabë́ baritia 'apu 'ain ka usai kuankëxa. 8-9 Kuanx ka Esdras Diosanbia 'akinkëx Jerusalénnu bëbakëxa, mapai achúshi 'imainun rabë́ bari anun 'apu Artajerjes ax 'apu 'ikë 'aia 'uxë 'irutabai nëtë 'irutabakë 'ain, mapai achúshi 'uxëribi 'irukë 'ain anun nëtë 'irutabakë a barinbi ka Babilonianuax Jerusalénnu ai chikíkankë 'iakëxa.

10 'Imainun ka Esdrasnën upíokin a tanti Diosan bana a 'unánkin, Israel unikaman ribia a tanti banakama 'imainun ax kikësabi 'iti bana 'unánun 'amiakëxa.

11 Ënëx ka kirika kuënëo 'ain kata itsia 'apu Artajerjesnën Esdras sacerdote an ñu 'unánkë a 'inan 'ikën, an ka kamabi usaía Israel unikama 'iti bana 'unánkë 'iakëxa:

12 Usa 'ain ka Artajerjes uisa kara ax 'ikë kixun kakin Esdras, sacerdote an ñu uni 'unánmitia, Dios naínu 'ikë anbi a tanti aín banakama 'unánmikë a kuënëoxunkin kirikanu ësokin kakëxa. 13 'Ëx kana 'apu 'aish kian kamabi Israel unikama ax ënë menu 'ikëkama ax ka uix kara Jerusalénnu kuainsatania ax mibë kuanti 'ikën, kuankëbë ka levita 'imainun sacerdotekamaxribi kuainsa tani kuanti 'ikën. 14 'Ën kana 'ën unikama mapai achúshi 'imainun rabë́ këñun Judá 'imainun Jerusalénnuxun kara Diosan bana min 'unánmikësabi okin 'anan a tanti bana kikësabiokin 'akania isi kuantanun mi këñun xuti 'ain. 15 Usa 'ain kana kuankimi uantanun 'ën unikamabëtan kuri 'imainun manë uxua 'akë kuríki, 'ëx 'apu 'ixun Israel unibunën Dios 'inainshitisa tankë ënë Jerusalénnu 'ikë anuxun a rabiti xubu anu nani kuanti 'ain, 16 'imainun kamina kamabi manë uxua 'akë kuríki 'imainun, uiti 'itsa kuri karamina Babilonianu 'ikë ëmakamanuxun 'inánkëxun bianan, unikaman sacerdotekamaribi atux kuëënxun Jerusalénnu 'ikë anuxun Dios rabiti xubunu buánti nankankë aribi uanti 'ain. 17 Buánkë a kuríkinën kamina vaca bërí kanikë aín bënë, 'imainun carnero bërí kanikë akama anun maruti 'ain, maruxun kamina akama këñun trigo a 'imainun uvas baka akama Jerusalénnu 'ikë anuxun Dios rabiti anua 'ikë anuxun xaronun 'inánti 'ain. 18 'Anan kamina kuri 'imainun kuríki tëxëkëbëtan anun añu kaina 'aisatani a mitsun abëtami ñu 'akë kamabëtan sinántankëxun Dios kuëënkësabi okin 'ati 'ain. 19 Usokin 'anan kamina ami xëanan ami piti tasunkama aribi an bërúankë unikama anuxun Dios rabiti xubu Jerusalénnu, 'ikë anua nanun 'inánti 'ain.

20 Bëtsi ñukamaribi anuxun min Dios rabiti xubunu nanti kuëënkin, kamina anua 'apun ñukama bukunmikë anuashi biti 'ain. 21 'Ëx 'apu Artajerjes, 'ixun kana kamabi an kuríki bërúankë Éufrates baka 'ukëmanan 'ikë a unikama ësokin kamin Esdras sacerdote asérabi an ñu 'unankëira uni 'imainun an Dios naínu 'ikë ax kia bana 'unánkëira an ñukákëxun ka añu kara ñukatia a asérabi 'inánti 'ikën, 22 'inánkin ka tres mil trescientos 'ëñë tupunkë kuríki këñun, veintidós mil litro trigo a këñun, dos mil doscientos litro vino, aribi 'inánan dos mil doscientos litro xëni a 'imainun tashi akamabi ñukákëxun 'inánkanti 'ikën.

23 'Inánan ka kamabi Dios naínu 'ikë a anuxun rabiti xubunu nankan ñukama ñukákëxun aribi bënë́kinshi 'inánti 'ikën, usokëbëtan ka Diosan anu 'ëx 'apu 'ikë me ënë 'atimonan 'ën bakë bëchikëkamaribi tëmëramitima 'ikën.

24 'Imainun ka ënëribi 'unánkanti 'ikën, uisaxunbi ka sacerdote, Levitas 'imainun axa kantati 'unánkë unikama 'ianan, an xëkuë bërúankë a 'imainun an anuxun Dios rabiti xubunuxun ñu mëëkë unikama atúxribi ka kupíonun kixun 'apun kakë 'itima 'ikën. 25 Esdras min kamina min Diosan 'unánmikëxun aín bana 'unánkësabi okin anëti 'ain, uni manánkëxua an bana mëníoti kamina 'apukama an upíokin ñu 'akë, axa amia bari kuabúkë Éufrates kakë baka 'ukëmanan 'ikë ëma chukúma anu bukukë an Diosan bana kuënëo 'unánkë akama kamina anëti 'ain; anëkëxun ka an a 'unánkëma unikama aribi 'unánmiti 'ikën. 26 Usakin 'unánmikëxunbia min Diosan bana kikësabiokin 'aisamatanan 'ëx kikësabi okinribi 'aisamatankë a unikama kamina, anu 'imikinma bënë́kinshi anua chikíanan, sipuananbi bënë́kinshia basikinma kupíonun 'amiti 'ain, 'amikin kamina uin kara kupíoisama tania a bënë́kinshi 'amiti 'ain.

27 Usakin kirika uamikë a isi banatankëxun ka Esdrasnën Dios ñukákin kakëxa: Nukën 'Ibu Dios nun rarakaman rabia mix kamina upíokin rabikë 'iti 'ain, min kamina 'apu anuxun mi rabiti xubu amiribishi Jerusalénnu 'amitëkënun sinánmia, 28 'imainun ka 'ëribia 'apun aín unikamabëtanbi nuibamainun uni aín kushibu ñu 'unánkë, an sipu bërúankë atúnribi nuibanun 'amiaxa, usakin 'akinkëx kuëënkin kana Israel unikaman kushibu Jerusalénnu 'ëbë kuanuxa timë́kanun 'imia.