3 Anúan ax 'itabati 'apu 'ikë baritia anun ka Ciron ësokian ënë bana kikësabiokin 'anun 'amiakëxa: Anuxun Dios rabiti xubu a ka amiribishi Jerusalénnu 'atëkënti 'ikën. Usakin 'akin ka ami birukin 'ati akama pain nantankëxun 'atënkënkin xubu a sënë́onxun ka anuxun ñuina xarokanti 'ikën. A xubu ka veintisiete metro chaxkë́ 'ianan veintisiete metro aín naxba 'iti 'ikën, 'ianan ka aín manámi trece metro 'imainun medio aín buarukë 'iti 'ikën; 4 'anan ka rabë́ 'imainun achúshi maxá chaiirabu nankë anu i bërí tukakë nanti 'ikën. Akamax ka 'apun kupíokë 'iti 'ikën.

5 Usokin 'anan ka anuxun Dios rabiti xubu Jerusalénnu 'ikë anu nankë 'ikëbia 'apu Nabucodonosornën Babilonianu buan manë uxua 'akë 'imainun kuri 'akë ñukama ax amiribishi Jerusalénnu uantankëxun anuxun Dios rabiti xubu anu uanxun uinu kara anu nanti 'akë 'ikë anu nankë 'iti 'ikën.

6 Usa 'ain ka 'apu Daríonën an pain bëmikëxun Tatenai kakë 'apu an bana mëníokë Éufrates kakë baka 'ukëmanan 'ikë a 'imainun Setar-boznai akëñun abëtan ñu mëëkë a ëmanu 'ikë 'apukamakëñunbi bana buámiakëxa:

Jerusalén ëmanuax kamina mitsux rikianti 'ain, 7 'imainun kamina Judíos 'apukama aín unikamabëtan anuxun Dios rabiti xubu 'atëkënun ënkanti 'ain kixun ka kakëxa.

8 'Ën kana ësokinmi an anuxun Dios rabiti xubu 'atëkënia 'akinun an 'akinkë unikama mitsu kain: Usa 'ain kamina auküaxa bari urukë Éufrates kakë baka amia 'ikë ëma anuxua 'apu kupíokë kuríki anunbi 'akinbima tëoxun rakania usa 'ain, anun kupíoti nëtë 'ikëbë 'ikëbëtainshi basi okinma kupíoti 'ain. 9 'Ianan ka kamabi nëtën ënkinma Jerusalénnu 'ikë sacerdotekama atu, añu kara kuëënia a kamabi 'inánkin, vaca bënë bërí kanikë këñun, carnerokamaribi 'inánan; trigo, tashi 'ianan, uvas baka bikë vino 'imainun, xëni akama Dios naínu 'ikë a xaroxunun 'inánkanti 'ikën, 10 'inánkëxun ka ax kuëëntisabi okin akama Dios xaroxunkin 'ë ñukáxuanan 'ën bakë chikëkamaribi Dios ñukáxunti 'ikën.

11 'Imainun kana ësokinribia 'akánti bana ñuikin, uin kara ënë bana kikësabiokin 'aisama tania ax ka aín xubu 'akin purukë imaxu abi bixun xëtóxun anun tarókin 'akëx bamakë 'iti 'ikën; usakin aín 'ibu 'akë 'ain ka aín xubu aribi rurukubutanun raskapakë 'iti 'ikën.

12 ¡'Imainun ka Diosan Jerusalénnu 'ikë unikama atunbia aín anë rabinun kaisa anbi uinu 'ikë 'apun kara axa kikë bana a kuaisamatankin ax kikësabiokin 'aisama tankin anuxun Dios rabiti xubu Jerusalénnu 'aiabi 'atima okin ëmitisa tania ax 'atimokë 'iti 'ikën! 'Ëx 'apu Darío 'aish kikë bana ax ka anuxun 'ën pëukë anuxunbi upíira okin unin tankë 'iti 'ikën.

13 Usa 'ain ka Tatenai an bana mëníokë 'apu axa Éufrates kakë baka au 'ikë ëma chukúma anu 'ikë a 'imainun, Setar-boznai a 'imainun raíri abëa 'ikë kamabëtan 'apu Daríonën bana nankësabi okin bërúanxun 'akëxa. 14 'Akin ka Judíos unibu an ñu mëia 'akinkë akaman anuxun Dios rabiti xubu a ënkinma an Dios kikë bana uni ñuixunkë Hageo 'imainun Zacarías Idó kakë uni aín bakë bëchikënën kakësabiokin 'akëxa. Usakin 'axun ka Israel unibunën Diosan kásabiokin 'akin, 'apu Ciro, Darío 'imainun Artajerjes Persianu 'ikë 'apu ax kikësabiokin 'akëxa. 15 Usakin 'axun ka anuxun Dios rabiti xubu këñuakëxa, 'apu Darío Persianu 'ikë axa mapai achúshi 'imainun achúshi baritia 'apu 'ikë anúan febrero 'uxë këñuti marzo 'uxë 'irukë axa rabë́ 'imainun achúshi nëtë 'ikë anun sënëonkëxa.

16 Usakin 'axun këñukin sënë́on ka Israel kama 'imainun sacerdotekama 'ianan levita unibu 'imainun raíri unikama axa Babilonianu buánkan 'aish utëkënkë akaman anuxun Dios rabiti xubu sënë́onkë 'ain, 'itsaira kuëënkin anuxun nëtë inúkin fiesta 'akankëxa. 17 'Akin ka a nëtën Dios xaroxunkin cien vaca bërí kanikë, 'ianan doscientos carnero 'imainun cuatrocientos carnero bërí kanikë 'ianan doce chibu, a kamaribi Israel unikama ñakátibi a, achúshi achúshi, 'axuanan kamabi Israel unikaman 'ucha kupín 'akëxa. 18 Usokin 'atankëxun ka sacerdotekamaribi anúan 'ati nëtë 'ikëbëtan an 'ati anëanan, levitakamaribi anuxun Dios rabiti xubu Jerusalénnu 'ikë anua 'inun Moisésnën kuënëo bana kikësabiokin 'akëxa. 19 Usokin 'akin ka axa buánkan 'aish rikuatsintëkënkë unikama atun Pascua nëtëribi inúkin 'uxë 'irutabakë axa catorce nëtë 'ikë anun 'akankëxa. 20 Usa 'ain ka sacerdotekama 'imainun levita unikama atux pain atun ñu 'atima 'akë mëníokakëxa, usai 'ika kamaxi upiti usai 'iti bana kikësabi oí atun ñu 'atima 'akë mëníokankë 'iakëxa. Usai 'ixun ka Pascua nëtë inúkin abë sacerdotekamabia Babilonia menu uan 'imainunbia atuxi kuan 'aish utëkënkë akaman kamáxbi timë́xun 'akankëxa. 21 'Imainun ka kamabi Israel unikaman axa Babilonianu buánkankë 'aínbi utëkënkë akama 'imainun an bëtsi bëtsi menu 'ikë unikaman 'akë ñukama 'akinbi ënkë atúnribi Pascua nëtë inúkin 'akë, piti aribi pikankëxa, usakin 'ai atubëbi timëkamë 'ëoxun ka anuxun Israel unikaman atun Dios rabikankëxa. 22 Usakin rabikin ka mapai achúshi 'imainun rabë́ nëtë fiesta 'ai kuëënkin anun chamiti ñukëñunma 'akë pán pikankëxa, usakin 'ai ka uinsaranbia 'ikësamairai kuëënkin Diosanbia sinánmikëxua Persianu 'ikë 'apun atu nuibakin 'akinkëxua anuxun Dios rabiti xubu 'atëkënxun sënë́on ka usai 'ikankëxa.