2 Usa 'ain ka Josué kakë uni Josadac aín bakë bëchikë 'imainun abëtan ñu mëëkë sacerdotekaman, Zorobabel Salatielnën bakë bëchikë 'imainun aín aintsikama timë́xun anuxun Israel kaman Dios rabikin ñuina xaroti 'akë 'ikëbi rurupakin masókan, 'ikëbi amiribishi a tanti bana Moisés Diosan uni ax kiásabiokin 'atëkëankëxa.

3 Usokin ka anuxun ñuina xaroti a upí 'itánun, a menu 'ikë unikamami rakuë́kin 'akëxa, 'atankëxun ka anuxun pëkarakëbëtan 'apunkin ñantabukëbëtan anuxun Dios achúshi achúshi nëtë ñuina xaroxuankëxa. 4 'Anan ka anun 'uta 'ati fiesta nëtë aribi rabi timë́xun anun ñuina xaroti nëtë 'ikëbëtan nëtë́tibi a tanti bana kuënëo ax kikësabiokin atun 'akësabi okin, ñuina xarokin, uiti 'itsa achúshi nëtën 'ati kara atibi 'akëxa, 5 usakin 'akin ka 'uxë ió 'ain fiesta nëtë inúti aribi usaribi okin 'akëxa 'akin ka kamabi nëtë́n Dios ñuina xaroxuankëxa, usokin 'amainun ka uin kara kuëënia anribi anbi kuëënxun Dios 'axuankëxa.

6 Anuan mapai achúshi 'imainun rabë́ 'uxë 'irutabakë nëtë anun ka anuxun Dios rabiti xubu 'atëkënkin pëukëma 'aínbi ka Israel kaman Dios ñuina atun 'ucha kupí xaroxuankëxa.

7 Usokin 'akin sënë́ontankëxun ka an xubuati 'unánkë unikama 'imainun carpinterokama kuríki 'inánkëxa, 'inánan ka atun piti 'imainun xëati, xëni akamaribi Tiro 'imainun Sidónu 'ikë unikama Líbano menuxunbia parúmpapa bakan uanxuan kunxan tukapakë Jopenubi uanun 'apu Ciro kakë Persia menu 'ikë an kirika 'axun 'inánkëxa, 'inánkëxun ka usabi okin 'akëxa.

8 Anuxun Dios rabiti xubu 'atëkënkin ka Zorobabel Salatielnën bakë bëchikë 'imainun Josadacnën bakë bëchikë Josué an abëtan ñu mëëkë sacerdotekama, 'imainun Levitas 'ianan unikama axa Jerusalénnu rikuatsinkëtëkënkë akamabëtan anuxun Dios rabiti xubu 'atëkënkin taëokëxa, anua Jerusalénnu atux rikuatsintëkënkë rabë́ bari 'itankëx rabë́ 'uxë 'irukë anun ka levita unikama veinte baritiañukama ashia atun 'aminun anëakëxa.

9 Usa 'ain ka Josué 'imainun aín bakë bëchikë 'ianan aín xukë́n akamax achúshisa 'inun timë́ti Cadmiel 'imainun aín bakë bëchikë Judánën rëbúnki 'imainun Henadad aín rëbúnkinën bakë bëchikë 'imainun aín xukë́n akamax ka Levitas 'iakëxa, usa 'ixun ka anuxun Dios rabiti xubu 'atëkënia atun 'amiakëxa.

10 An xubu 'ati 'unánkë unikaman ami birukian anuxun Dios rabiti xubu 'ati aín tapunkama a 'akëbë ka sacerdote unikama, bërámashi atun chupa pañukë 'aish atun pakon banonux sëtë́rakëkë 'iakëxa. Usai 'imainun ka Levitas Asafnën rëbúnkikama atúnribi manë parókin 'akë a Israel unikama 'apu David ax kiásabiokin 'anux sëtë́rakëkankëxa. 11 Usa 'ain ka raírinëxa kuëëni kantamainun, rairinëxribi ësai Diosan kuanun kikankëxa: Usaia kuëëni kamabi uni kantamainun ka raírinëxribi 'itsaira kuëëni nëtë́misamai sharákë ax kantakë abë mëskuti 'uranxubi kuakë 'iakëxa. Usakin anuxun Dios rabiti xubu 'akin pëukëbë ka 'itsaira kuëëni usai 'ikankëxa. 12 Usai 'ikëbë ka sacerdotekama 'imainun levitakamabë achúshi achúshi ñakánu 'ikë uni apanbu an anuxun Dios rabiti xubu bërámabi 'atabakin 'aia isa akamaxribi anuxun Dios rabiti xubu 'atëkënia isi munuma nëtë́misamai kuënkëni 'inkankëxa. Usai 'ia isi ka rairinëxribi kuëëni munuma kuëënkëni sharákankëxa. 13 Usaia 'ikë a ka uínbi munuma nëtë́misamai kuëëni sharámainun rairinëx ini munuma sharákë axribi uisai 'i kara atux usaira 'ia kixun 'unántisama 'itánun 'ikë ënuxunmabi kuakëx 'iakëxa.