2 Kamikëx ka kamabi uni Judá menu 'ikë 'imainun Jerusalénnu tsókë unikama 'ianan sacerdotekama an Dios kikë bana uni ñuixunkë unikama 'imainun kamabi a menu 'ikë unikamabë uni ñuñuira 'ianan uni ñuñuma akamaxbi timë́kankëxa, usa 'ain ka 'apu Josías atubë anuxun Dios rabiti xubunu timëkamë 'ëokëxa. Anuxun ka 'apu Josíasnën munuma banakin a tanti bana kuënëoxun nan 'ikëa anuxun Dios rabiti xubunua sacerdotekaman kushi Hilquíasnën mërakë a isi 'apu kiakëxa. 3 Usokin 'atankëx ka 'apu anua xubu nitsínkë itá puntë nirakëti ax irapain Diosan kuamainun, an a banakama kikësabiokin 'akin asérabi ax kikësabi oi 'iti bana 'imainun a tanti banakama Moisésnën kirikanu kuënëo akama upíira okin 'akatsi kiakëxa. Kia 'apu sënë́nkëbë ka kamabi unikama timëkamë 'ëokë atúxribi usaribi okin a bana 'akatsi kiax kikankëxa.

4 Usakin 'atankëxun ka 'apu Josíasnën sacerdotekaman kushi Hilquías a kakëxa, an sacerdote rairi 'imainun an xëpúti bëruankëkama, anuxun Dios rabiti xubunu 'ikë ñukama anuan atun dios rabikë a kamabi chikinun 'amiakëxa, ax ka Baal Aserá 'imainun kamabi 'ispa naínu 'ikë tankin 'akë aba Jerusalén ëma 'uri chikinbianxun anua xëxá Cedrón kakë 'ikë kuainakëkë anuxun xaronun kixun kanun kakëxa, 'abiankin aín chimapukama Betelnu uanun 'amiakëxa. 5 Usokin 'atankëxun ka 'apu Josíasnën ax 'iisama 'aia Judánu 'ikë 'apukaman anëa an bëtsi dioskama rabikin chimapu bashi mananxun xaroti anëa sacerdotekama chikiankëxa, ax ka anua aín dios rabi uni timë́kë bashinu 'akë xubu ëmakama 'uruma Judá 'imainun Jerusalén 'ikë anu 'iakëxa, anuxun ka sacerdotekama an Baal bari 'uxë 'ispa axa pëkikëma 'imainun pëkikëkama rabikin ñuina xaroxunkë akama chikiankëxa.

6 'Anan ka Jerusalén ëma 'uri Aserá tankin 'akë Nukën 'Ibu rabiti xubunu 'ikë aribi chikinun 'amiakëxa, chikintankëxun ka Cedrón kakë xëxa anuxun aín chimapuishi 'itanun xarokëxa 'atankëxun ka anu uni ñuia maínkë anu abístanun aín chimapu sakakëxa.

7 'Atankëxun ka anuax unikama bëtsibë xanumabi atun dios rabi uax 'ikë, anuxun Nukën 'Ibu rabikë xubu pana itsikama aribi rurupanan anuxuan xanukaman Aserá kakë diosa a rabi ukë unikaman maruti ñuman xëokin 'akë akamaribi masókëxa.

8 Usokin 'atankëxun ka Judá menu 'ikë ëmakamanu 'ikë sacerdotekama Jerusalénnu unun kamiakëxa, kamikëxa ukë ka mitsumi Gueba 'imainun Beerseba bashikamanu 'ikë xubunuxun ñuina 'axun xarokëkama ax ka upima 'ikë kixun kakëxa, 'imainun ka ñunshin 'atimakama anuxun ñuina xaroxunkë aribi rurupakëxa, ax ka anun Jerusalénnu atsinkë xëkuë mëmiu alcalde 'ixuan Josuénën aín xubu 'urama 'amikë 'iakëxa. 9 'Aínbi ka Josíasnën sacerdotekama an anua timë́kankë anuxun ñuina xarokëkama a pan anun chamiti këñuma 'akë Jerusalénnu timë́xun pinun kakëxa, kanan ka anuxun Nukën 'Ibu rabiti xubu anuxun uinu 'ikë atu achúshinënbi ñuina xaroxunma 'anun kakëxa.

10 Josíasnënribi ka aín uni rairi Ben-hinom kakë me sapan anuxun ñuina xarokë aribi masótanun xuakëxa, anuxuan bëráma 'akësokin uínbi aín bakë bëchikë 'imainun 'ini bëchikëkama bërama Israel unikaman dios Moloc kakë a 'axuansa okin 'axuma 'anun masónun ka xuakëxa.

11 Josías 'apu 'iisama 'ain Judánu 'apu 'ia atun caballo 'ianan caballonën nirinkë anun bari rabi sënënbi kuani 'ikë akama masókëxa, ax ka anuxun Nukën 'Ibu rabiti xubu rapasu anua Natán-melek an bëruankë 'ikë kataitsi anu 'iakëxa, usa 'ikë ka caballo 'imainun caballonën nirikë aribi xaronun 'amiakëxa.

12 'Anan ka 'apu Manasésnën anuxun dioskama rabiti anuxun Nukën 'Ibu rabiti xubu 'ikë me mëníokë anu 'amia, 'imainun bëtsi 'apukaman anuxun Dios rabiti xubu kataitsi anua 'apu Ahaz 'ikë a manami 'amia akama masónun 'amiakëxa; 'amikëxun ka sacerdotekama 'imainun an xëkuë bëruankë kaman añukama masótankëxun aín rurupakëkama a Cedrón kakë xëxa anu punun 'amiakëxa.

13 'Amianan ka 'apu Josíasnën an Diosan bana kuakëma unikama anu timë́ti amiaxa bari urukë Jerusalénnu 'ikë Olivos kakë aín bashi abu bari kuankë anu 'apu Salomónnën Israel kaman 'apu 'ixun Astarté kakë diosa sidonia unikaman 'axuan, 'imainun Quemós kakë dios moabitakaman rabia, 'imainun Milcom, amonitakaman rabia akama masónun 'amiakëxa, ënë ñukama ka Dios asérabi an kuëanma 'ikën.

14 Maxá chabu atun rabikë tukapanun 'amianan ka i tëakë upíbu akama anua masókë anua uni ñukë xo timëxun buakanun 'amiakëxa.

15 Usokin 'anan ka anuxua Diosan bana kuakëma unikaman ñuina xaroti Betel kakë ëmanua Jeroboam Nabatnën bakë bëchikë an Israel unikama 'uchamikin 'amia, akama Josíasnën masókin tukapakëx kupúkë bërutanun 'amiakëxa, 'atankëxun ka tsinbi Aserá tankin 'akë aribi xarokëxa.

16 Usakin 'akë 'ain ka Josíasnën matá me anua uni ñukë mainkëkama a isakëxa, iskin ka abëa nikë unikama anua uni maínkë anua xokama bëxunun kixun kakëxa, kakëxun bëia ka xokama anuxun ñuina xaroti 'akë anuxun xarokëxa. Usakin ka an Dios kia bana ñuikë uni usai ka 'inuxun 'aia kia sënë́nkëbëtan 'akëxa. 17 Usokin 'atankëxun ka Josíasnën ñukákëxa:

—¿Añu tankin 'akë kara 'uri nitsinkin 'akë 'ën iskë ux 'ik?

Kia ka a ëmanu 'ikë unikama achúshinën kakëxa:

—Ax ka an bana ñuikë uni Judánuax uá a ñukë maían 'ikën, ax ka Betel ënu 'ikë anuxun ñuina xaroti ami mix 'apu 'ixun masókë a ñui kiakëxa.

18 Usa 'ain ka Josíasnën kakëxa:

—Usabi kamina ënti 'ain. 'Ën kana uínbi aín xokama mëëti kuëëniman.

Usa 'ain ka an bana ñuikë uni rabë́ aín xo Samarianuax ukë an bikinma isëshiakëxa.

19 Usa 'ain ka Samarianu kuanxun xubu chukúmakama bëráma 'a 'aish anu bëruakama anuxuan Diosan bana kuakëma unikaman atun rabikë ñu upíbu bukunti Israelnu 'ikë 'apukaman Nukën 'Ibu 'itsaira nishmikin 'amia, a ka Josíasnën Betelnu 'ikë 'asaribiokin masókin këñuakëxa. 20 Usokin 'atankëxun ka anuxua an Diosan bana kuakëma unikaman ñuina xarokëkama anu 'ikë, anuxun kamabi sacerdotekama 'anun 'amiakëxa, 'amitankëxun ka anuxunbi uni ñua aín xokama akamanan bukunxun xaromiakëxa. Usokin 'atankëx ka Jerusalénnu kuantëkëankëxa.

21 Achúshi nëtën ka 'apu Josíasnën kamabi unikama Pascua nëtë inúkin aín 'Ibu Dios rabikin, 'atia Moisésnën kirikanu kuënëosabi okin 'anun kakëxa. 22 Uinsaranbi ka ësaribi okin Pascua nëtë 'inúkin an Israel kama 'akinkë 'apukama nëtën 'ama 'ixumbi ka Israel 'imainun Judá menu 'apukama 'ainribi 'ama 'ixun usakin 'akëxa. 23 Usa 'ain ka Josías dieciocho baritia Jerusalénnu 'apu 'ikë 'ain ka Pascua nëtë inúkin Dios rabikankëxa.

24 Josíasnën ka ñubë́ unikama 'imainun an ñutankë unikama, 'ianan aín aintsi kamabëtan rabikë unínbia 'akë ñu a 'ianan bëtsi ñukama 'imainun kamabi ñukama anun atun dioskama rabikë 'ikëa Nukën 'Ibun kuëënkëma ñukama Judá 'imainun Jerusalénnu 'ikë akama këñuakëxa. Usakin ka a tanti bana kirikanu kuënëo 'ikë sacerdote Hilquíasnën anuxun Nukën 'Ibu rabiti xubunua mërakë usakinbi 'ati kupin 'amiakëxa. 25 Usa 'ain ka achúshi 'apubi 'aíma 'iakëxa, ax 'isamapain 'aia 'ikë 'imainun ax 'iasaribiti 'apu 'iti 'aíma 'iakëxa, an 'akësokin aín 'Ibumi asérabi kuëëni ami sinani aín kushibëtanbi Moisésnën kuëënëo bana kikësabiokin 'akë aima 'iakexa.

26 Usa 'aínbi ka Nukën 'Ibu atian ira Judá menu 'ikë Israel unikamami nishakëxa, usai ka Manasésnëan ax kikësabiokin 'akinma a nishmikëx ka usai 'iakëxa. 27 Usa 'ain ka Nukën 'Ibu kiakëxa: bërí kana Judánu 'ikë unikama ënti 'ain, Israel unikama 'asaribiokin, usa 'ain kana Jerusalén ëma 'ën kaisa 'imainun anuxun 'ë rabiti xubu anu 'ëx mitsu nëbëtsi 'ia a ënti 'ain.

28 Kamabi usai Josías 'ia 'imainun usakian ñukama 'a ax ka, crónicas kakë kirika Judánu 'ikë 'apukama 'ikë anu kuënëokë 'ikën. 29 A baritiakaman Josías 'apu 'ain ka, Egipto menu 'ikë 'apu faraón Necao kakin anëkë ax, ain suntárukamabë Éufrates baka abu kikiani Asirianu 'ikë 'apu 'akini kuankëxa. Kuankëbë ka 'apu Josías ain suntárukamabë atubë akananux chikiakëxa, 'aínbi ka Meguido kakë ëmanua mërakin Egiptonu 'ikë 'apun 'akëxa. 30 Usokin 'akë ka ain suntárunën kushikaman Josías ñukë a caballonën nirinkë anu 'aruxun Meguido kakë ëma anuxun, Jerusalénnu 'ikë ain me anu maínti 'akë anu mainkin uankëxa. Usakin 'an ka a ëmanu 'ikë unikaman Josíasnën bakë bëchikë Joacaz ain papa 'iasaribitia 'apu 'inun xëni ami tutukakin anëakëxa.