3 Dieciocho baritia 'apu 'ikin ka Josíasnën anuxun Dios rabiti xubunu an kirika kuënëokë Safán, Asalíasnën bëchikë Mesulam aín xuta a xunuxunpain. Ësokin kakëxa:

4 —Anu kuanxun kamina abë banakin Hilquías sacerdotekaman kushi a kai kuanti 'ain, anuxun Dios rabiti xubu xëkuë an bërúankë unikaman, unin bëia bikë kuríki akama timëxuan, 5 anuxun Dios rabiti xubu bërúanxun mëníotëkënun 'amikë unikama akamina anúan an ñu mëëkë unikama kupíonun kuríki a 'inánti 'ain, 6 ax ka anun carpintero 'imainun an ñu mëia 'amikë a 'ianan, an xubu 'ati 'unánkë uni 'imainun anun i maruanan maxá anuxun Dios rabiti xubu 'ati mëníokin tëapakë akama kupíonun inánkë 'ikën. 7 'Inántankëxun kamina uisa kara kuríki oxa kixun mi ñuixunun kixun katima 'ain, atun ka 'amikëxun upíokin ñu 'aia, kixun ka 'apu Josíasnën Safán kakëxa.

8 Kakëxun ka Safánën anu kuanxun 'apu Josíasnën kakë ñuixunkin Hilquías sacerdotekaman kushi an kirika kuënëokë a kakëxa, kakëxun ka Hilquíasnën Dios kikë a tanti banakama anu kuënëo kirika a isa anuxun Dios rabiti xubunua nan 'ikë mëraxua; 'inánkëxun ka Safánën kirika isakëxa.

9 Usokin 'abiani kuanxun ka Safánën 'apu Josías, a ñuikin ësokin kakëxa:

—Min unikaman ka anuxun Dios rabiti xubunua timëkin bikë manë uxua a anuxun Dios rabiti mëníonun 'amikë unikama 'inánxa kixun kakëxa.

10 Kanan ka Safánën Hilquías mëraxun kirika achúshi 'inánkëxa, 'inánkëxun buánxun ka Safánën 'apu Josíasnën kuamainun isi kiakëxa. 11 Usakin a kirikanua a tanti banakama kuënëo isi kiti 'aia anua banaia kuati ratuti masá nuituti 'ikin ka 'apun aín chupa tukakëxa, 12 usakin 'akinshi ka Hilquías, 'imainun Ahicam Safánën bakë bëchikë akëñun Acbor Micaíasnën bakë bëchikë akëñun Safán an kirika kuënëokë a 'imainun 'apun suntárunën kushi Asaías akama timë́xun kakëxa:

13 —Anu kuanxun kamina 'ë ñukáxuanan unikamami 'anan kamabi Judánu 'ikë unikama Dios ñukáxunti 'ain, 'anan kamina kirika kuënëokëa bërí Hilquíasnën mërakë kirika anua kikë banakama ax kara uisai kia ñukati 'ain; Dios sapi ka nukamami 'aisamairai nishia nun chaitiokëkaman ka ënë kirikanu kuënëokë kikësabiokin 'akin táma 'ikën.

14 Usakia kakëx ka 'ain kushibu Hilquías, Ahicam, Acbor, Safán 'imainun Asaías, an bana ñuikë Hulda kakë xanu Salum kakë uni aín xanu abë banai rikiankëxa, Salum ain bakë bëchikë Ticvá, Harhás aín xuta 'iakëxa, ax ka anuxun Dios rabiti xubunu 'ikë chupakama anu nankë a bërúankë 'iakëxa. Hulda ax ka Jerusalén ëmanuira 'ima a 'uria 'ikë ëma itsinu tsókë 'ikë ka anu kuanxun kakankëxa, 15 kakëxun ka xanuxun atu kakëxa:

—Ësai ka Israel unikaman Dios ax kiaxa: Usa 'ain kamina an 'ëbë bananun mitsu xukë uni ësokin kai kuanti 'ain, 16 'ëx Dios 'aish kana ësai kin: 'Ën kana Jerusalénnu tsókë unikama 'anan ain ëmaribi 'atima oti 'ain, Moisésnën kuënëo banakama kirikanua mërakë anuaxa Judánu 'ikë 'apu banai kia kuakë banai kia kuakë usabi okin kana 'ati 'ain. 17 Atun ka 'ën kakësokin 'akë a ëntankëxun, bëtsi dioskama a rabikin ñu xaroxuanxa, usokin ka 'ë nishmikin a ñukama uisokin 'ati kara kuëënia usabiokin 'axa; usa 'ain kana atumi 'aisamaira oi nishin, usa 'ixun kana ñu 'atima 'aishia bukunun ënkinma atu 'atima oti 'ain. 18 Kanan kamina ësokin Judánu 'ikë 'apu an Diosbë bananun mitsu xukë a kai kuanti 'ain, Israel unikaman Dios ax ka ësairibi kiaxa: Min kamina a bana kuakin asérabi ka ax 'ikë kixun sinan, 19 min kamina masá nuitukin 'ëmi sinani 'ën ënë mekama këñunbi anu 'ikë unikama këñuti sinani, usai 'ikin kamina min chupabi tukai masá nuituti 'ën ismainunbi min unikama 'imainun min 'aintsikama 'ianan min chaitiokëkama ënë bana kuatima 'ucha a sinani 'ian, usaími 'ia kana 'ënbi min bana kuan. 'Ëx Dios 'aish kana ësai kin. 20 Usa 'ain ka bëtsin 'atimokëx ñuia anua ain chaitiokëkama maínkan anubi maínti 'ikën, usokëxun ka 'ën ënë ëma aín unikama këñunbi 'atimokëxa tëmëraia an istima 'ikën.

Usa 'ain ka 'apúan xukë unikama usakin kakë Diosan bana buani a kai anu rikiantëkëankëxa.