Diosan Judánu 'ikë unikama Senaqueribnën suntárukaman 'aisataniabi 'amiama ñuikë bana
(2 Cr 32.20-23; Is 37.1-38)
19
Usakian kakëxun kuabianxun atun ñuixunkëxun kuakin ka 'apu Ezequíasnën ain chupa tukai nishkin bëtsi chupa xëni pañuakëxa, usakin pañubiani ka anuxun Dios rabiti xubunu kuankëxa.2 Kuanx Diosbë banatankëxun ka Eliaquim an 'apun xubunu 'ikë ñukama bërúankë a 'imainun an kirika kuënëokë Sebná akëñun, kamabi sacerdotekama 'imainun uni 'ain tukurikubukama aturibi 'itsaira paëkin bëtsi chupa pañubiania, an Dios kikë bana ñuikë Isaías Amósnën bakë bëchikë abë banatanun kixun xuakëxa, 3 xukin ka ësai ka 'apu kiaxa katánun kixun kakëxa: Bërí kananuna tëmëramikë 'iti 'ain, usa 'aish kananuna bakënuxa aín nëtë 'ikëbë xanu paëtani bënëtibi aín nami bamax kushima 'aish 'ikasmakësa usaribi 'iti 'ain. 4 'Ën sinánkëxun sapika min Diosan aín 'apúan xukëx Asirianu 'ikë suntárunën kushikama 'atimai banai kikë atun banakama kuakë 'iti 'ikën atux ka Israel unikaman Dios ñui 'atimati banaxa usa 'ain sapi ka a kuaxun Diosanbi a ñuia kikë akama 'aisama okin tëmëramiti 'ikën. Usa 'ain kamina axa bërúkë nukama achúshi okin Dios ñukáxunti 'ain.
5 Ësakin kaxúan xukëx ka suntárunën kushikama an bana ñuikë Isaías isi kuankëxa, 6 kuanxun ka 'apu Ezequíasnën usakin katánun kixun kakë banakama ñuikin kakëxa, kakëxun kuatankëxun ka an bana ñuikë Isaíasnënribi atun 'apua ësokin katánun kakëxa: Nukën 'Ibu Dios ka ësai kiaxa: Asirianu 'ikë 'apun suntárunën kushikamaxa 'ë ñui 'atimai banakë a mi kamami rakuë́kantima 'ain. 7 Ka kuat, 'ën kana a kuabiania bënëtishi ratúkiani aín menubi kuantëkëntanua bana 'aisama ñuixunun uni achúshi 'imiti 'ain usokin 'akëx kuanx ka 'ën 'amikëxun unin 'akëx këñuti 'ikë, kixun ka Diosan Isaías kakëxa.
8 Usaia anu atux 'imainun ka Asirianu 'ikë 'apu Senaquerib ax aín suntárukamabëbi Laquis ëmanuax rikiankë 'iakëxa. Usai anu kuankëbë ka Jerusalénnuax suntárunën kushikama atúxribi anu kuankëxa, kuakinbi ka Libná kakë ëmanua 'ikë unikama axa 'anux ami 'ikuainkë mërakëxa. 9 Anuxun ka Asirianu 'ikë 'apun Tirhaca kakë uni Etíopia menu 'ikë unikama 'apu kaisa mitsubë 'akananun aín suntárukamabë Judánu 'ikë suntárukama 'akinux aia kixun ñuikania kuakëxa.
Usa 'ain ka amiribishi Asirianu 'ikë an aín suntárunën kushikama Ezequías Judá menua istëkëntanun kixun xuakëxa, 10 xukin ka achúshi kirika ësokin 'atankëxun buámiakëxa: Min Dios ami mitsux katamëkë an ka 'ën suntárukaman 'axuma 'anun anu mitsux tsókë Jerusalén ëma a bërúanti 'ikën; usa 'aínbi kamina mia paránkëxunbi usa ka kixun aín bana sinántima 'ain. 11 Minbi kamina kuan uisakin kara Asirianu 'ikë 'apun aín suntárukama bëtsi unikama 'amiaxa kixun. ¿Usa 'ain kaina mix uisax ië́ti 'ain? 12 ¿Bëtsi dioskama kara 'ën chaitiokëkama raíri ëma masókin 'aia Gozán, Harán, Résef 'imainun Bet-edén menua 'ikë ëma Telasar anua bukukë unikama ië́miakëx? 13 ¿Uinu kara Hamat, Arpad, Serfavaim, Hená 'imainun Ivá a ëmakamanua 'ikë 'apukama ax 'ik?
14 Usakin xukëx kuanxua Senaqueribnën suntárunën kushikaman Jerusalénnu bëbakin 'inánkëxun ka Ezequíasnën kirika kuënëokë a biakëxa, bitsi ka a isi anuax banakëxa.
'Abiankin ka anuxun Dios rabiti xubunu kuanxun anu pëokakin nankëxa, 15 nantakëxun ka Dios abë banakin ësakin kakëxa: Israel unibunën Dios mix kamina min ángelkama a manami 'ain, usa 'aishi kamina mix kamabi menu 'ikë 'apukaman Dios 'ain, min kamina naíkamë 'ëokëñun me uniokën. 16 'Ën mi ñukákëxun kamina upíokin kuati 'ain. Min kamina ësaia ñu 'ia isin nun 'Ibu Dios. Senaqueribnën ka 'atima banakama mi ñuikin kuënëoxun 'ë kirika bëmiaxa, mix Dios 'aish këñutima oi unia 'aínbi ka.
17 Dios asérabi ka, Asirianu 'ikë 'apukaman ka ëmakama 'anan atun meribi 'aisama oxa, 18 'anan ka atún dioskamaribi xarátanu nënkin 'aisama oxa, akamax ka asérabi Diosma 'iaxa, usa 'aish ka i 'akë 'ianan maxábia unin 'akë 'iaxa. Usa 'ikë ka Asiriokaman masókin këñúaxa. 19 Usa 'ain kamina mix nun Dios 'ixun bërí an 'aisatankë unikaman 'aisataniabi nu bërúanti 'ain, usakinmi nu 'akinia ka kamabi menu 'ikë unikaman mix kamina asérabi Dios ira a 'ai kixun 'unánti 'ikën.
20 Usa 'ain ka Isaíasnën ësokian Ezequías katánun kixun kamiakëxa: Ësai ka Nun 'Ibu Dios Israel unibunën Dios ax kiaxa: 'Ën kana Asirianu 'ikë 'apu Senaquerib a ñuikian 'ë kakë banakama kuan. 21 Ënë banakama ka Dios Asirianu 'ikë 'apu ñui kiaxa:
Jerusalénnu 'ikë unikama ax ka xanu xuntaku 'ikësai mimi kuaia Senaquerib.
Jerusalénnu tsókë unikama ax ka mixmi kuainkëbë aín maxká shaíkai mimi kuaia.
22 ¿Ui kaina min 'atimakin ñuikin 'ichan?
¿Uimi 'atimai banai kianan
karamina mix ismina usaira 'ai kiax manámia isi kian?
¡Uimima Israel unikaman Dios upíira a ñui ka usai kiaxa!
23 Min unikamax ka kuanx Dios 'ichakin ñui ësai kia.
“'Ëx anuax 'akánanti caballonën nirinkëkama
nun tupuntisamaira anun kuani kana aín bashi mapë́rakëan, 'ianan kana Líbano anu 'ikë aín bashi nun mapërakëtisamaira abi mapë́rakëan.
Anuxun kana atun kunxan
chaxkë́irabu a tëapanan pino kakë i upíirabu aribi 'akën.
'Ai kana aín bashi rëbu aín
manainra anu nukuanan,
anua ñu 'apákësa kian 'aish
ni rakákë anubi nukuakën.
24 'Unánkëma menu kana me naëxun anua 'umpax xëakën,
'imainun kana 'ën taë napatan
akësokin Egiptonu 'ikë bakakama ë́skati 'ai kiax ka kiakëxa.
25 ¿'Aínbi kaina Dios 'ixun kana kamabi ñu ësokin 'imi kixun 'unánma 'ain?
Bërámabi kana nëtë ió 'ain 'ën usaía 'iti ñukama mëníokën.
Usa 'ain kamina min bërí ëma upíokin kënëkë abi tankinma rurupakin 'ati 'ain;
usakinmi rurupakin 'akëx ka tsamaintsi tsamaintsi 'itánun aín tukibukë ax rurukubuti bukubuaxa.
26 Usokin 'akëbë ka anu 'ikë unikama rakuë́ti kushiñumasa 'aish 'itsaira rakuëaxa,
usai 'ika xubi naënua iskësa 'ianan pasto paxa iskësaira 'iaxa, 'ianan ka xubu manan xubi koiabi amiaxa bari urukë amixun bëkakian suñun 'akëx chushikë usaribi 'iaxa.
27 'Ën kana 'unanin uinuax kaina aín,
uinu kaina kuanin akamabi;
'imainun kana 'unanin kamabi min 'akë ñukama, 'unánan kana mix kamina 'ëmi 'aisamairai nishan kixun 'unan.
28 'Ianan kana 'ën 'unan mix nishkimi min kuëënkësokin ñu 'aia,
usa 'ain kana caballo 'akësabiokin achúshi ñu mi rëñumianan,
caballo anun nitsinanan anun buinati aín kuëbínu 'akësaribi okin min kuëbínu nanti 'ain.
Usa 'ain ka Jerusalénnuax ukë bai anunbi kuantëkëntanun mi xuti 'ikë ka Dios kiaxa.”
29 Ësokia kakëxun ka Isaíasnën Ezequías kakëxa:
Ënëx ka axa kikësoibia 'iti a 'ikën:
Ënë bari 'imainun bëtsi bari 'irukë anun kamina axi kotankëxua tuákë bimi a mitsun piti 'ain,
'aínbi kamina baritsi 'irutëkënkë anun,
'apátankëxun tuaia pain mitsun uvas këñun bëtsi ñukamaribi piti 'ain.
30 Axa ñukëma 'aish Judá menu utëkënkë akamax ka:
'apákëxa ñu tapuni 'ikësaribiti bakë bëchipati kaikamë 'ëoti 'ikën.
31 Usa 'ain ka Jerusalénnu 'itsama unishi bërúmainun
aín bashi Sión kakë anuribi axa ñukëmakama axribi anu tsóti 'ikën.
Ësokin kana 'ën atu nuibakin Dios kamabi
kushiñuira 'ixun 'ëx kiásabiokin 'ati 'ain.
32 Ësokinribi ka Isaíasnën Ezequías Asirianu 'ikë 'apu a ñuia usai Dios kikë bana kakëxa: Jerusalénnu ka atux atsintima 'ikën, 'ianan ka atun pia achúshirabi atumi nianan, aín manë parókë ami katamëxunbi 'atima 'ikën, 'anan ka anúan atun ëma kënëkë a rapasu buinarakin 'akë anunbi 'irukiani kuanxun atu 'ati ñubi 'atima 'ikën.
33 Anun uaxa Jerusalén menu bëbakë bai, anunbi ka aín menubi kuantëkënti 'ikën; ënë ëmanu ka uisaxi atsintima 'ikën. 'Ëx kana Dios 'aish ësai kin.
34 'Ën kana a ëma bërúankin ië́miti 'ain, 'ën uni David an ka 'ën kakësabiokin 'akëxa, 'imainun kana 'ëxi usokin 'akinkatsi kiakën.
35 Usakian kakë a imë́bi ka anu kuanxun Diosan ángelnën, ciento ochenta 'imainun cinco mil uni asirio unibunën suntáru anua 'ikankën anuabi maë rakátanun këñuakëxa, usokin 'oonkëka iskankëxa. 36 Usakian an ka Asirianu 'ikë 'apu Senaquerib ax aín suntárukama uani Nínive kakë aín ëmanubi kuantëkëankëxa.
37 Achúshi nëtën ka 'itsa baritia inúkëbëtan Senaqueribnën anuxua aín dios Nisroc kakë a rabiti xubunu atsínxun rabiakëxa, rabikëbëbi anu atsínkin ka aín bakë bëchikë rabë́ Adramélec 'imainun Sarézer a rabëxun aín papa 'akëxa, 'abiani ka Ararat kakë menu abákëxa. Usakin 'abiania abán ka aín bakë bëchikë itsi Esarhadón kakë ax aín papa 'iásaribiti 'apu 'iakëxa.