Jeremías achúshi me naëkë ëskikënu tëmëramikin ënkan ñuikë bana
38
Achúshi nëtën ka Jeremíasnën Jerusalénnu 'ikë unikama bana ñuixunia ënë unikaman kuakëxa. Sefatías Matánën bakë bëchikë, Guedalías Pashurnën bakë bëchikë, Jucal Selemíasnën bakë bëchikë 'imainun bëtsi uni Pashur Malquíasnën bakë bëchikë ënë kaman ka ësai kia küakëxa. Ënë kamax a banakama 'ikën: 2 “Nukën 'Ibu Dios ka ësai kiaxa: Uix kara ënë ëmanu bërútia atux ka 'akanani 'ianan numin 'iananbi 'insinan 'i këñuti 'ikën. 'Aínbi ka uikamax kara Babilonio unikamanu chikiti 'inamëtia akamax kuni bamatima 'ikën. 3 Nukën 'Ibu ka ësai kia: Ënë ëma ka Babilonianu 'ikë 'apun suntárukaman ñatankë 'iti 'ikën. Usakin 'aia ka atu uínbi usakin kamina 'atima 'ai kixun katima 'ikën. Ësai ka Jeremías kiakëxa.”4 Usa 'ain ka aín unikama raírinën 'apu kakëxa:
—Ënë uni kananuna 'ati 'ain, aín bana kuakin ka suntáru axa ëmanu bërúkëkama 'imainun kamabi unikama atúnribi bëtsiokin sinania. Ënë unin bana kuati ka suntárukama axa ëmanu bërúkë 'imainun kamabi unikama rakuë́tia.
5 Kixun kakëxun ka 'apu Sedequíasnënribi atu kakëxa:
—Ka kuat, asábi ka, mitsun kuëënkësa okin kamina a uni 'ati 'ain. 'Ën kana uisokin kaina 'akatsi usokin 'axuma 'anun mitsu kaiman.
6 Usokian 'apun kakëxun ka Jeremías atun ñatantankëxun kini ëskikë 'umpaxñuma anu nampákankëxa, a kinix ka 'apun bakë bëchikë Malquías ainan 'iakëxa, ax ka anua suntárukama an ëma bëruankë 'ikë me mëníokë anu 'iakëxa. Anua itsin nanpakë ax ka 'umpaxñuma 'aíshbi me kini anu nisama chua 'iakëxa, anu ka Jeremías ënuma sënëni nanë́ax niakëxa.
7 Usokin 'akë 'ain ka achúshi etíope uni Ébed-mélec kakë 'iakëxa, ax ka 'apun uni an unikama 'ësëti aín xubunu nankë 'iakëxa, an ka Jeremías ka me kinikë 'ukëmëu nipakë 'ikë kixun ñuia kuakëxa. Usa 'ain ka a nëtën 'apu bana mënioi Benjamínën xëkuë kakë a 'urama timë́kankë 'iakëxa. 8 Usa 'ain ka Ébed-mélec 'apun xubunuax chikíkiani 'apu kai kuankëxa, kuanxun ka Benjamínën xëkuë kakë anu tsókë mërakëxa, mërakin ka ësokin kakëxa:
9 —'Ën 'Ibu, unikaman an bana ñuikë uni Jeremías usakin me naëkënu nipakë ax ka ñu 'atimaira 'akë 'ikën. Usa 'ain ka anuax a piti ñu ëmanu 'aíma 'ain numin bamatisa tania.
10 Kakëxunshi ka 'apun Ébed-mélec kakëxa: Treinta uni bibianxun kamina atubëtan bënë́kinshi Jeremías me naëkënua bamakëmaishi bitsi kuanti 'ain. 11 Kakëxun unikama buani kuanx ka Ébed-mélec anua 'apun xubu 'ikënua chupa bukúnkë anua uiti chupa xënikara bibiankë, a itsin nanpákin ka Jeremías me naëkë anua, 12 ësokin kakëxa:
—Chupa xënikama ënën kamina min pëñanu mima itsin rashutia usa 'ain përabukuti 'ain kixun kakëxa.
Kakëx ka Jeremías usai 'iakëxa. 13 Usai 'ikëbëtan ka unikaman itsi sarakapakin nanpakëbëa anun tëkërëkia itsinbi bërúakëxa. Usokin 'akëx kuanx ka anua suntárukama 'ikë me mëníokë anu Jeremías bërúakëxa.
'Apu Sedequías an bana ñuikë Jeremíasbë bana ñuikë bana
14 Achúshi nëtën ka 'apu Sedequíasnën aín suntárukama anua an Dios kikë bana ñuikë Jeremías bënun 'amiakëxa, ax ka anuxun Dios rabiti xubu xëkuë rabë́ 'imainun achúshi anun atsínti 'ikë anu 'iakëxa. Anuxun ka 'apun kakëxa:
—'Ën kana mi 'achúshi ñu ñukatin, usa 'ain kamina kamabi ñu min 'unánkëkama asérabi 'ë kati 'ain.
15 Kakëxun ka an bana ñuikë uni Jeremíasnën 'apu kakëxa:
—'Ën min ñukákëxun mix, 'apu 'ikë kakëxun kamina min 'ë 'anun 'amiti 'ain; 'imainun kamina 'ën usokin kamina ñu 'atima 'ai kixun kakëxunbi kuatima 'ain.
16 'Aínbi ka uínbi kuanuma 'apu Sedequíasnën unëxun asérabi ësokin an bana ñuikë Jeremías kakëxa:
—'Ën kana Nukën 'Ibu an nu tsóti 'inánkë an ismainun asérabi mi kain, 'ën kana mia 'anun uni 'inánan an mi 'aisatankë unikaman mia 'anun 'amitima 'ain.
17 Usa 'ain ka Jeremíasnën 'apu Sedequías ësokin kakëxa:
—Nukën 'Ibu kamabi kushiñu Israel unikaman Dios ax ka ësai kiaxa: Mix Babilonianu 'ikë 'apun suntárunën kushikamanu bënëti 'inamëti kamina mi 'imainun min aintsikamabë ië́ti 'ain, usai 'ikëbë ka ënë ëmaribi në́nkë 'itima 'ikën. 18 'Aínbi ka mixmi atunu 'inamëkëbëtama ënë ëma 'ibuakin Babilonia unikaman në́nti 'ikën, në́nkëbë kamina mix abátima 'ain.
19 Kixun kakëxun ka Sedequíasnënribi kakëxa:
—'Ëx kana judioskama axa Babilonia unikamanu 'inamëkiani kuankë atumi rakuë́tin; usa 'ain ka atun bixun 'ë uisa kara oisatania usokin 'akin tëmëramiti 'ikën.
20 Kia ka Jeremíasnën kakëxa:
—'Aínbi ka mix 'ën 'ibu 'ikë atun mi bitima 'ikën. Usa 'ain kamina asérabi 'ën mi Nukën 'Ibu kikë banakama kakë ënë upíokin kuati 'ain, usakin 'ai kamina uisabi okëma 'ianan ië́kë 'iti 'ain. 21 Nukën 'Ibun ka usaía 'iti ñukama 'ë 'unánmiaxa, usa 'ain kamina mix Babilonianu 'ikë 'apunu 'inamëisama tani kërutima 'ain: 22 ka kuat, kamabi xanukama axa Judánu 'ikë 'apun xubunu bërúkë akamax ka bitankëxun Babilonianu 'ikë, suntárunën kushikama 'inánkë 'iti 'ikën, a xanukamax ka ësai kiti 'ikën:
Ka kuat, an 'unainrakë unikamanbi ka 'apu
paránxun 'anun 'amiaxa;
'amikin ka chua menu tatsimëti nanë́kësa 'itánun 'imiakëxa 'imianan ka 'apu 'ikëbi iskëmasa okëxa.
23 Usa 'ain ka Jeremíasnën 'apu abi kakëxa:
—Kamabi min xanukama 'imainun min bëchikëkama ka Babilonianu 'ikë unikaman bikë 'iti 'ikën, 'imainun kamina mix 'apu 'aíshbi atunuax abátima 'ain, mi ka suntárukaman atun 'apu Babilonianu 'ikë a 'inánti 'ikën, 'imainun ka Jerusalén ëma ënëribi tsin në́nkë 'iti 'ikën.
24 Usa 'ain ka 'apu Sedequíasnën an bana ñuikë Jeremías kakëxa:
—Mix abi tsótisa tanan bamatisama tankin kamina nuxnu banakë bana ënë uibi ñuixuntima 'ain. 25 Usainu nux banakë ënë kuabëtsini uxun ka 'ën unikaman min 'ë kakë bana ënë ñukánan 'ën mi kakë abi mi ñukáti 'ikën, nukaman mi 'axuma 'anun kamina uisai kaina 'apubë bana akamabi nu nukama kati 'ai kixun mi kati 'ikën. 26 'Aínbi kamina min ësokin atu kati 'ain, 'ën kana 'ëa Jonatánnën xubunu amiribishi xutëkënxuma 'anun kan, anuax atuna bamai usa 'ain, kixun ka Jeremíasnën kakëxa.
27 Ësai banatankëx sënë́an ka kamabi aín kushikama anu rikianxun Jeremías ñukáti kuankëxa, kuanxun ka ñukákankëxa, ñukákëxun ka uisakin kara 'apun kaxa usakinbi a banakama kakëxa. Usa 'ain ka uínbia 'apubë banaia kuakëma 'ikë uisabi okima ënkankëxa. 28 Usa 'ain ka Jeremías anua suntárukama 'ikë me mëníokë anu bërúakëxa, anúan axa ami nishkë Babilonianu 'ikë unikaman biti nëtë 'itámainun ka usai 'iakëxa.