Jeremías 'apu Sedequíasnën Dios ñukáxunun kixun ká bana
37
Babilonianu 'ikë 'apu Nabucodonosornën ka Judá menua 'apu 'inun, Sedequías Josíasnën bakë bëchikë a 'imiakëxa, 'imikin ka Jeconías Joaquímnën bëchikë a 'apu 'ikëbi chikíankëxa. 2 'Aínbi ka 'apu Sedequías 'ianan, abëa aín xubunu tëëkë unikama 'imainun unikamanbi an Dios kikë bana ñuikë Jeremíasnën usakin kanun Diosan kakë banakama unikaman kuama 'ikën.3 Usa 'ain ka 'apu Sedequíasnën Israel uni rabë́, an bana ñuikë Jeremíasbë banatanun xuakëxa, akamax ka Jucal Selemíasnën bakë bëchikë 'imainun sacerdote Sofonías Maaseíasnën bakë bëchikë a rabë́ xukin ka ësokian katánun kakëxa: “Nukama kamina Nukën 'Ibu Dios ñukáxunti 'ain.” 4 A nëtëkaman ka sipunu atsímiti ñatankëma pain 'aish unikamanu kuani niakëxa. 5 Usaia 'imainun ka faraónën suntárukama Egipto menuax chikíkë 'iakëxa. Chikíkiani kuania kuati ka Babilonio suntárukama an Jerusalén bëarabuinxun 'akë atux ka aia kixun ñuikania kuati anuax chikikankëxa.
6 Usa 'ain, ka Nukën 'Ibun an bana ñuikë Jeremías abë banakin an ësokin kanun kakëxa, 7 min kamina ësai ka Nukën 'Ibu Israel unikaman Dios ax kiaxa kixun axa ukë unikama kati 'ain: “Judánu 'ikë 'apu an 'ëbë banati uni xukë a kamina kati 'ain, axa ukë faraónën suntárukama axa a 'akini ukë ax ka bainu bërukiani Egiptonu kuantëkëanxa. 8 Usa 'aínbi ka Babilonio suntárukaman utëkëntankëxun Jerusalén ëmanu 'ikë unikama 'anan ñatankin bianan aín ëma në́nti 'ikën. 9 'Ëx mitsun 'Ibu 'ain kamina bërúankati 'ain: mitsúxi paránani kamina ësai kitima 'ain, Babilonio unikamax ka rikianxa, usa 'ain ka amiribishi nu 'ai utëkëntima 'ikën kiax kamina kitima 'ain, usai ka 'itima 'ikë usa 'ain. 10 'Imainun ka mitsubë 'akanankënuxun mitsun kanankin atun suntárukama 'akëbëbi uiti kara 'akin ramiokë anua 'ikë atun 'utanu 'iti 'ikën, a unikaman ka amiribishi nirutëkënkin ëma në́nti 'ikën. Kiax Nukën 'Ibu kiakëxa.”
An bana ñuikë Jeremías sipuakan ñuikë bana
11 Usa 'ain ka Babilonio suntárukama Jerusalén 'anux ami 'ikuaiaxi faraónën suntárukama ka 'aia kixun kuati anuax chikíakëxa,
12 usa 'ain ka an bana ñuikë Jeremías Jerusalén ëmanuax achúshi me kasunankë Benjamínën menu kuanxun aín 'aintsi 'ibukama 'inánan, anribi ainan 'inun me bitsi kuankëxa.
13 'Aínbi ka Benjamínën xëputi kakë anu bëbakëbëbi achúshi uni Irías kakë Selemíasnën bëchikë Hananíasnën xuta suntárukama an ëma bëruankë 'ain kushi capitán ax anu 'iakëxa, an ka Jeremías kuaniabi bërunkin kakëxa:
—Mix kaina Babilonia unikamanu abati kuani ain.
14 Kakëxunbi ka Jeremíasnën kakëxa:
—¡Usama ka, asérabi kana kin 'ëx kana Babilonio unikamanu abátankëx anu 'inamëti kuaniman!
'Aínbi ka Iríasnën usakin kakëxunbi kuaisamatankin ñatanbiankin 'apun unikamanu buánkëxa. 15 A unikaman ka 'itsaira ami nishkin an bana ñuikë Jeremías mëëtankëxuan an bërúankë suntárukaman sipuanun kakëxa, anu uni xëpútia Jonatán an kirika kuënëokë an aín xubunu 'akë anu xëpúnun 'amiakëxa. 16 Usakin sipuakin ka Jeremías 'ukëmëuira anua 'itsa nëtë 'itinu sipuakëxa. 17 Usakin 'akë 'ain ka 'itsa nëtë 'ikëbëtan 'apu Sedequíasnën aín xubunu an bana ñuikë Jeremías buánxunun kixun kakëxa, kakëxun buánkë ka unin kuanuma ñukákëxa:
—¿Mi kara min 'Ibun 'ë ñuikin achúshi banabi kakëma 'ik?
Kixuan kakëxun ka Jeremíasnën kakëxa:
—Usa ka, ax ka ësa 'ikën: mix ismina 'apu 'ai, 'aínbi ismina mix Babilonianu 'ikë 'apun aín unikama bimikë 'iti 'ai kiax ka kia.
18 Usakin katankëxun ka an bana ñuikë Jeremías anribi 'apu Sedequías ñukákëxa:
—¿Uisa ñu 'atimaira 'ai a tanti bana kikësokin 'aíma mimi 'uchanan, min unikamamiribi 'ianan, unikamami 'uchakë kara 'ë sipuakanx? 19 ¿Uinu kara an Dios kikë bana ñuikë 'ixunbi 'atimakin ñuikin Babilonianu 'ikë 'apun ka aín suntárukambëtan 'anan mitsun meribi 'atimotima 'ikë kixun ká unikama ax 'ik? 20 Usa 'ain kamina bërí ësokin mi kamainun mix 'apu ixun, 'ën mi ñukákësabiokin 'ë 'axunti 'ain: Usa 'ain kamina amiribishi Jonatán an kirika kuënëokë ain, xubunu 'ë buántëkënun 'amitima 'ain, anuax atuna bamai usa 'ain.
21 Usa 'ain ka 'apu Sedequíasnën 'ain suntárukama anua atux 'ikë me mëníokë anua Jeremías 'iminun kixun kakëxa, usakin 'akë 'ikë ka kamabi nëtën pán ëmanua bixun uanxuankëxa. Usakin ka a ëmanua 'ikë bai anuxun pán 'akë kakin anëkë anua bixun 'inánkëxa. Usakin ka a ëmanua pán këñutisama pain 'ain kamabi nëtën achúshi pánra 'inánkëxa, usai 'ika Jeremías anua ëmanu 'ikë suntárukama 'ikë me mëníokë anu bërúakëxa.