4 Usa 'ain ka Jeremíasnën Baruc Neríasnën bakë bëchikë a kuëankëxa, kuënkë́xa aia ka kamabi usakin Diosan kakë banakama ñuixuankëxa, ñuixunkëxun ka Barucnën achúshi kirika tarankënu a banakama kuënëokëxa. 5 Usakin kuënëomitankëxun ka Jeremíasnën Baruc kakëxa: “Ka kuat, 'ë ka anu kuainsama okin bëarakania usa 'ain kana anuxun Nukën 'Ibu rabiti xubunu kuainsa tanibi kuaniman. 6 Usa 'ain kamina mix kuanti 'ain. Anua piti mëëti nëtë 'itëkënkëbë kamina kirika tarankënumi 'ën kakëxun kuënëokë banakama a anuxun Dios rabiti xubunua timë́kë a 'imainun kamabi uni Judá ëma kamanuaxa ënu ukë atun kuanun mitsun 'Ibun banami kuënëokë ënë min isi kuanti 'ain. 7 Usakin mi 'aia kuati sinanakin sapika atun ñu 'atima 'akëkama Nukën 'Ibu chikinaxunkin ënti 'ikën. Usa 'ain ka Nukën 'Ibu 'itsaira nishaxa, usa 'ain ka usakin unikama 'akatsia kikë ax 'aisama ñuira atunu 'iti 'ikën.” 8 Usakin an bana ñuikë Jeremíasnën kakëxun ka Barucnën an kakësabiokin kamabi 'akëxa: 'aika anuxun Dios rabiti xubunu kuanxun kirika tarankënu kuënëokë Nukën 'Ibu kikë banakama a unikaman kuanun 'isi kiakëxa.

9 'Apu Joaquím Josíasnën bakë bëchikë axa mapai achúshi baritia Judá menu 'apu 'ikë 'aían nueve 'uxë 'irukë anun ka Jerusalénnu tsókë 'imainun Judá menu 'ikë ëmakanuaxa Jerusalénnu ukë akamax ka samákin pikëmëti Nukën 'Ibu kuëëntanun 'ai anu 'ikankëxa. 10 Usai anu 'ikankë 'ain ka anuxun Dios rabiti xubu 'ukëmëu me mëníokë anun kuanx xëpúti ió kakë anun atsínti anua Israel uni Safán suntárunën kushi aín bëchikë Guemarías ax kirika kuënëoi tëkë manámi anu atsíankëxa, anuxun ka Barucnën kamabi unikaman kuanun kirika tarankënua Jeremíasnën kakëxun kuënëokë banakama a isnun 'ai kiakëxa.

11 Achúshi uni Micaías kakë Guemaríasnën bakë bëchikë Safánën xuta, an ka Barucnën kirika tarankënua Dios kikë bana kuënëokë a isi kia kuakëxa, 12 usa 'ain ka a kuabiani 'apun xubu anua an kirika kuënëokë uni tëëkë anu kuankëxa, anu ka kamabi axa 'apubë tëkë aín kushikama timë́kë 'iakëxa: ax ka Elisamá an kirika kuënëokë a 'iakëxa, 'imainun ka Delaías Semaíasnën bakë bëchikë, Elnatán Acbornën bakë bëchikë, Guemarías Safánën bakë bëchikë; Sedequías Hananíasnën bakë bëchikë, 'imainun 'apubë tëkë uni raíri akamaribi 'iakëxa. 13 Usa 'ain ka Micaíasnën kamabi unikaman kuamainúa kirika tarankënua isi kia Baruc kuabiankë a ñuixuankëxa.

14 Ñuixunkëxun kuatankëxun ka 'apubë tëkë unikaman Jehudínën papa Netaníasnën bakë bëchikë Selemíasnën papa Cusí aín bakë bëchikë a xuakëxa, xukin ka unikaman ismainunbi isi kikë a kirika uania kuanun Baruc katánun kixun kakëxa. Xukëx kuanxun kakëxun kirika tarankë a bibiani kuanx ka atunu Baruc bëbakëxa, 15 bëbaia ka atun kakëxa:

—Nu rapasu tsóbukin kamina kirika tarankë mi bëkë a nukaman kuanun isi kiti 'ain. Kakëxun ka Barucnën atu iskin 'axuankëxa, 16 usokin 'axunkëxun kuatishi ka 'itsaira rakuë́ti bëtsibë bëtsibë isánani kanankankëxa.

—Ënë banakama kananuna 'apu bënë́kin kati 'ain. 17 Usai kanantankëxun ka atu achúshinën Baruc kakëxa:

—Nukama karamina uisokin ënë banakama kuënëo ñuixunti 'ain. 18 Kixun kakëxun ka Barucnën kakëxa:

—An bana ñuikë Jeremías anbi ka usokin kuënëonun 'ë kaxa, kakëxun kana 'ën mëkënanbi kirika tarankënu kuënëon. 19 Usa 'ain ka achúshinën Baruc kakëxa:

—¡Mi 'imainun Jeremías ka uínbi 'unántisamanu unëti kuanti 'ikën!

20 'Apubë tëkë unikamax ka anua Elisamá kirika kuënëoi tëkë anubi kirika tarankë a nabiani aín xubu anuabi na kuakë banakama 'apu kai rikiankëxa. 21 Rikianxun kakëxun ka 'apun Jehudí kirika tarankë anua Elisamá kirika kuënëoi tëëkë anua bitánun xuakëxa, xukëx kuaxun bitsínkin bëxun ka Jehudínën 'apu 'imainun a rapasu 'ikë aín unikama kuanun isi kiakëxa. 22 A nëtën ka nueve 'uxë 'irukë anun mita 'ain xubu panaitsi anua tsi tikakë 'iakëxa. 23 Usa 'ain ka anuxun Jehudínën iskin rabë́ 'imainun achúshi okin 'anan rabë́ rabë́ okin anua bana sënë́nkë anu sënë́onkëtibi ka 'apun manë xëtokën tëaxun tëaxun tsi rëkirukënu xarátanun 'aruakëxa. Usakin 'akin ka kirika tarankë kuënëokë a xarokin këñuakëxa.

24 Usokin kamabi kirika iskin 'aia kuatíbi ka 'apu 'imainun aín unikamax rakuëanan masánuituti anun paëama 'ikën. 25 Usokin 'aia ka Elnatán, Delaías a 'imainun Guemarías an munuma banakin 'apu kirika kuënëokë tarankë a xaroxuma 'anun kakëxa, 'aínbi ka atun kakëxun 'apun kuaisama tankëxa. 26 Kuaisama tankin ka aín aintsi 'ibuira Jerahmeel a 'imainun bëtsi Israel uni 'ibuirama, Seraías Azrielnën bakë bëchikë a 'imainun Selemías Abdeel ain bakë bëchikë akama, an Dios kikë bana ñuikë Jeremías 'imainun an kirika kuënëoxunkë Baruc ñatanun kixun kakëxa. 'Aínbi ka Nukën 'Ibunbi a uni rabë́ unëkë 'iakëxa.

27 Usakin Jeremíasnën kakëxuan Barucnën kirika tarankë kuënëokë a 'apun në́nkë 'ain ka Diosan, Jeremías kakëxa: 28 “Amiribishi bëtsi kirika tarankë bitëkënxun kamina anu kamabi a painmi kuënëomikë 'ikëbia 'apu Joaquím Judánu 'ikë an xarokë a banakamabi kuënëonun 'amiti 'ain. 29 Ësokin kamina kati 'ain: Ësai ka Nukën 'Ibu kiaxa: Min kamina kirika tarankë a nëëanan Jeremías atima banan uisa kupí anu kuënëokin Babilonianu 'ikë 'apux isa aimama 'ima, ënë ëma masókin uniñuma 'ianan ñuinañuma 'itánun këñui aia kixun kan. 30 Usa 'ain kana 'ëx Dios, 'ixun ësokin mi kain, Joaquím Judánu 'ikë 'apu, min rëbúnkinëx ka David 'iásaribiti 'apu 'itima 'ikën. Usa 'ain ka uínbi mi ñuia mainiama nëtën ëman rakákë bari xanan 'abaitia imë́ribi matsi 'ibúkë anribi min nami 'ati 'ikën, 31 mi 'imainun ka min rëbúnkikama 'imainun an mi min xubunuxun ñu mëëxunkë unikama atun 'uchakama kupín 'atima oti 'ain. 'Anan kana mitsunu 'imianan Jerusalénnu tsókë 'imainun Judánu tsókë unikamanuribi ñu 'aisama 'imiti 'ain 'ëx kiabimi mitsun kuaisama tankë axa atunu 'inun.”

32 Usakin kakëxun ka Jeremíasnën bëtsi kirika tarankë bixun an kirika kuënëoxunkë Baruc a 'inánkëxa, 'inánkëxun ka Jeremíasnën kamainun Barucnën a paian bëtsi kirika tarankënu kuënëokëbia 'apu Joaquímnën xarokë a bana kamabi kuënëokëxa. 'Anan ka Jeremíasnën a pain kuënëokë banakama a kuakësabi 'itánun amiribishi bëtsi banakamaribi kuënëomiakëxa.