Israel unikama atun menubi riküatsintëkëan ñuikë bana
31
Ësai ka Nukën 'Ibu asérabi kiakëxa: “A nëtë́an ami nishkë unikaman Babilonia menu uan atun menubi utëkëan anun kana 'ëx kamabi ñaká Israel unikaman Dios 'iti 'ain, 'imainun ka atux 'ën unikama 'iti 'ikën.”2 Ësai ka Nukën 'Ibu kiaxa:
“Anu uni 'ikëma menuxun kana bamatinuaxa ië́kë unikama 'ëx kana nuibanan irakë,
'ai kixun 'unánun atu 'akiankën.
Uínsaran kara Israel unikaman anu atux upiti tanti baria anun kana,
3 'ëx kana bërámabi ami mërakën.
'Ën kana nuibairakë 'ixun atu bëríbi xënibua 'aínbi nuibatin,
usa 'ixun kana uisokin karana nuibakë usabi okin mitsu nuibatin.
4 'Ën kana amiribishi atun ëma atëkënun amiti 'ain.
Usokin 'axunkëx ka atun manë sharíkati sharíkai ransai kuëënkanti 'ikën.
5 Amiribishi ka Samaria matákamanu uvas 'apákanti 'ikën,
'apáxun ka uin kara uvas 'apáxa an aín bimi pi 'itsaira kuëëni tsókanti 'ikën.
6 Usa 'ain ka anúan an bërúankë unikama,
munuma kuënkëni Efraínnën matákamanuax kiti achúshi nëtë 'iti 'ikën.
Mitsux kamina anuxun Nukën 'Ibu Dios rabi Jerusalénnu kuanti uti 'ain kiax ka kiti 'ikën. Ax ka nukaman Dios 'ikën.”
7 Ësai ka Nukën 'Ibu kiaxa:
“Israel unikama Jacobnën rëbúnki,
mitsux kamina munuma kantai kuëëni ësai kikanti 'ain,
nux kananuna bëtsi ëma kamasamaira 'ain.
Usa 'ain kamina ësaiki kantakin mitsun bana kuami ësai kikanti 'ain.
Nukën 'Ibun ka aín unikama 'akinkin ië́miakëxa, nukamax kananuna bëtsi menu bua 'aíshbi ñukëma amiribishi utëkëan.
8 Ka kuat, 'ënbi kana aín tsipumia 'ikë me anua bëanan,
uinu kara me kuainakëakëxa anuabi timëbëtsinkin mitsu bëtëkënti 'ain.
Bëkëbë ka atubë bëxuñu uni, aín niti bëtsikë unikama,
xanu ñuitsíkëkama 'imainun aín tuá bakënkëkama;
¡atux ka 'aisamaira uni 'aish amiribishi utëkënkanti 'ikën!
9 Ka kuat, abë banakin ñukánan inkuatsini ka ukanti 'ikën.
Inkuatsini aia kana 'ën anua 'umpax 'itsaira 'ikë me anu bëkin,
bai upí anun kuani uisaibi ñumi tuaxkitima anun uanti 'ain.
Usa 'ain kana 'ëx Israel unikaman papa 'ain,
'imainun ka Efraínëx 'ën bakë bëchikë apansa 'ikën, kiax ka kiakëxa.
10 Bëtsi me kamanu 'ikë unikama, mitsun kamina ësai kana 'ëx ki kuati 'ain,
'ianan kamina parúmpapa kuëbí 'ura tsókë unikama aribi ñuixunti 'ain:
Nukën 'Ibun ka Israel unibu 'ikë nukama abístanun 'imiakëxa,
'aínbi ka amiribishi timëtëkënkin bërúanxun an ñuina bërúankë unían aín
ovejakama bërúankë usaribi okin 'ati 'ikën.
11 Nukën 'Ibun ka Jacobnën rëbúnki,
aín unikama atusama kushiira unikamanua chikíankëxa.
12 Usakian chikinkëx utankëx ka kuëëni kantai Jerusalénnu 'ikë matákamanuax kuëënti 'ikën,
usai 'ia Nukën 'Ibun 'akinkin ñu 'inánkëx ka: 'itsaira kuëënkanti 'ikën kuëënika,
trigo 'imainun uvas baka 'akë vino 'imainun xëni
'ianan, ovejakama 'imainun vacakamañu 'iti 'ikën.
Usa 'ain ka a unikamax an ië́mikëx amiribishi 'ain 'Ibu Diosmi katamëti aín menu tsókë 'aish unin aín xubu rapasu 'apáxun 'upiokin ñu bërúankësa usaribi 'aish,
amiribishi ñusmatëkënima kushi 'ikanti 'ikën.
13 Usai 'ikëbë ka xanu chipash ransai kuëëmainun,
uni bënákama axribi 'ikëbë uni apankama atúxribi usai 'i kuëënti 'ikën.
Usai 'ia nuibakin kana:
masá nuitukë a ënia kuëënun 'imiti 'ain,
'imianan kana masá nuitutia nitë́xëkë usamaira 'inua kuëënun 'imiti 'ain.
14 'Ën kana sacerdotekamaribi upíira piti pinun 'imiti 'ain,
'ën unikamaxribi ka 'ën 'inánkëxun 'aisamaira ñu upíirabu bitsi kuëënti 'ikën.
'Ëx mitsun 'Ibu 'aish kana asérabi ësai kin.”
15 Ësai ka Nukën 'Ibu kiaxa:
“Ramá kakë ëma anua ka
'itsaira rarumati masá nuituti inia uni kuakanxa.
Ax ka Raquel axa aín tuákama rabanan inkë 'iaxa,
usai 'ika uínbi kuëënmisamai aín tuákama bamakë 'ain ianxa.” (Usai ka kiaxa.)
16 'Aínbi ka Nukën 'Ibun ësokin kaxa:
“Raquel 'itsaira ini kamina;
min bëunan mëskuti intëkëntima 'ain, 'aínbi kana 'ën mixmi 'itsaira masá nuitukë a kupín min biti ñu mi 'inánti 'ain,
usa 'ain ka mixmi masánuituti inkë 'aínbi:
min tuákama ax ami nishkë unikaman menuax, utëkënti 'ikën.
'Ëx Mitsun 'ibu 'aish kana asérabi ësai kin.
17 Min kamina uisa upí ñu kara minan 'inuxun 'aia a kaínti 'ain:
min tuákamax ka amiribishi aín menu utëkënti 'ikën.
'Ëx min 'Ibu 'aish kana asérabi ësai kin:
18 'Ën kana Efraínën rëbúnkikama 'itsaira masá nuituti ësai kikania kuan:
'Ëx kana bana kuakëma 'aish achúshi vaca tuá raëmisama usaribi 'iakën,
usa 'ikëbi kamina min 'ë 'unánmamiakën;
usa 'ain kamina amiribishi mi rabitëkënun 'ë 'imiti 'ain,
mix kamina 'ën 'Ibu Dios 'ain.
19 'Ëx kana mi rabiti ëanx mix kikësokin 'aíma mi 'ura 'ikësa 'ian,
'aínbi kana 'ën ñu 'akëkama ëni mimi sinántëkëan;
usai 'ikin kana 'ën 'akë 'uchakama a mi ñuixua,
usai 'i kana 'ën kisinu kítimëti 'ian;
usai 'i kana katë́kësa 'ianan ñuumasara tan,
'ën bëná 'ixun 'á 'uchakama sinani kana usai 'ian.
20 Efraínnu 'ikë unikama ax ka, 'ëx amira sinánkë bakë bëchikë usaribi 'ikën;
usa 'aish ka ax 'ën kuëëinrakë 'ën bakë bëchikë 'ikën.
Usa 'ikë kana ñu 'atima 'aia usakin kamina 'atima 'ai kixun kan,
'aínbi kana ami manukima usakin kamina 'atima 'ain kixun kain;
usa 'ain kana 'ën nuitunën upitani kuëënkin,
atu 'itsaira nuibatin. 'Ëx min 'Ibu 'aish kana asérabi ësai kin.
21 Israel unikama mitsun kamina anúnmi kuankankë mitsun bainu istisabi okin 'unánti oti 'ain:
anun kamina mitsun menubi a isëtsini uin kuanti kara kimashi utëkënti 'ain;
anunmi nikan baikama akamina upiokin iskanti 'ain.
¡Israel unikama mitsux kamina,
amiribishi mitsun ëmakamanubi utëkënkanti 'ain!
22 ¿Uínsaran kaina 'ën kakësabiokin 'aíma amami amami kuani,
xanu tuá aín papan bana kuatima nikësaimi 'ikankë a ënkanti 'ain?
'Ëx mitsun 'Ibu 'ixun kana achúshi ñu ió okin ënë menu 'akën,
xanúan 'ain bënë ënxun bitëkënkë usaribi okin ka Israel unikaman 'ëx kikësabiokin 'anuxun 'ë mërati 'ikën. Kiax ka kiakëxa.”
Diosan an bana ñuikë Jeremías uisaia Israel unikama 'iti namámia bana
23 Nukën 'Ibu kamabi kushiñuira, Israel unikaman Dios ax ka ësai kiaxa: “Uínsaran kara 'aisama ñu inuti tsóa 'aishi Judánu 'ikë unikama aín menu kuania anun kana 'ën amiribishi buántëkënti 'ain, anun ka upiti tsóti 'ikën: nun kananuna Nukën 'Ibu Diosan kakëxun 'ain bana tankin anunu tsókë anuxun 'aisatani, an nu upiokin sinánxunun, usokëxun kananuna nukamanribi kamabi ñu upiokin 'ati 'ain.
24 Usa 'ain ka Judá menuax umainun atun ëmakamanuax kuan akama kuantëkëni, naën tëkë unikama 'imainun an ñuina 'arakakë bërúankë unikama a menu tsóti 'ikën.
25 Anuxun kana axa numikëkama a ain piti 'inánan, axa xëaima kushiñuma 'i atsánkë akaman xëati ñu 'itsaira 'inun 'imiti 'ain” Kiax kiakëxa. 26 Ësokin namati kana 'ëx bësuakën. Bësukin kana 'ën namákë anunbi upí tankën.
27 Ësai ka Nukën 'Ibu asérabi kiakëxa: “Ka kuat, kamina kuakanti 'ain, anun 'ën uni kaikamë 'ëomainun ñuinakamaribi 'aisamaira Israelnu 'imainun Judá menu 'imiti achúshi nëtë ka 'iti 'ikën. 28 'Imainun kana uisokin karana 'ën bërámabi ëchíkin rurupakin menu pakëtanun 'aisama okën usaribikin, bërúanxun amiribishi birutëkënkin 'anun 'amitëkënti 'ain. 'Ëx mitsun 'Ibu 'aish kana asérabi ësai kin.
29 Usa 'ain ka a nëtë 'ikëbë uíxbi amiribishi ësai kitëkëntima 'ikën: Atun papan ka uvas kacha piaxa, usa 'aínbi ka atun bakë bëchikëkama aín xëta xëmanxëtia kitima 'ikën.” 30 'Aínbi ka uin kara uvas kachakë piaxa, ax aín xëta xëmanxëti 'ikën. Usa 'ain ka achúshi achúshi uni uix kara 'uchaia ax aín 'uchakë anunbi bamati 'ikën. Kiax ka kiakëxa.
31 Nukën 'Ibu ka ësai asérabi kiakëxa: “Ka kuat, kamina kuakanti 'ain achúshi nëtë ka anun Israel unikama 'imainun Judánu 'ikë unikamabëtan achúshi ñu ió okin 'atëkënti 'iti 'ikën.” 32 Ënë achúshi ñu 'ati ax 'ën aín chaitiokëkamabëtan 'asa usama 'iti 'ikën, atun ka Egipto menua 'ën mëkënan tuínxun 'akësokin chikinkëxunbi; 'ëx atun bënësa 'aínbi ka 'ën atubëtan 'ën 'akë achúshi ñu ax kikësabiokin 'aisama tankëxa. 'Ëx mitsun 'Ibu 'aish kana asérabi ësai kiakën. 33 Usa 'ain ka achúshi ñu mëníokin 'ën Israel unikamabëtan anun 'ati nëtë aia, usa ka 'iti 'ikën: Anun kana 'ën bana aín nuitu mëu upíokin sinankian manukima aín maxkátan 'unánun 'amiti 'ain. 'Ëx kana atun Dios 'iti 'ain, 'imainun ka atux 'ën unikama 'iti 'ikën. 'Ëx mitsun 'Ibu 'aish kana asérabi ësai kiakën. 34 Usa 'ain ka uínsaranbi uínbi bëtsi uni usa ka Nukën 'Ibu 'ikë kixun 'unámitima 'ikën, an 'unánkë unikama 'imainun aín aintsikama 'ëa 'unánun 'unánmitëkëinsama 'iti 'ikën, atun ka kamaxunbi uni apanbu 'imainun tuáxura kamanbi ka Dios 'ikë 'ë 'unánkë 'iti 'ikën. 'Ën kana atun ñu 'atima 'akëkama mëníoxunkin, atun 'uchakëkama a amiribishi sinántëkëntima 'ain. 'Ëx mitsun 'Ibu 'aish kana asérabi ësai kiakën.
35 Nukën 'Ibu an bari nëtën pë́kati 'anan
'uxë 'ispa akamaribi an imë́ pë́kati 'á,
an ka parúmpapa bëchunia aín bëchun xukirui bananun 'imia,
aín anë ka Nukën 'Ibu kamabi kushiñu kakë 'ikën, ax ka ësai kiakëxa:
36 “Achúshi nëtën 'ën anubi 'itiokin
'ën nankë a tanti banakama kikësokin 'aima ka nëtën,
Israel unikama 'ën uni 'itima 'ikën.
'Ëx mitsun 'Ibu 'aish kana asérabi ësai kiakën.
37 Ësai ka Nukën 'Ibu kiaxa:
achúshi nëtën kara unin naíkamë 'ëo tupúanan meribi aín tapunkama ñachati 'ikën,
a nëtën kana 'ën uni Israelkama kuëënkima atu timati 'ain, atun kamabi ñu 'atimakin 'akë kupí.
¡'Aínbi ka uínsaranbi a ñu 'itima 'ikën!
'Ëx mitsun 'Ibu 'aish kana asérabi ësai kiakën.”
38 Ka kuat, ësai ka Nukën 'Ibu asérabi kiakëxa: “Achúshi nëtë ka anun 'ën ëma 'atëkënti nëtë 'iti 'ikën, 'akin ka torre Hananel kakë anuxunbi 'abianxun aín xëputi 'ipitiu 'ikë anubi sënë́onkin 'akë 'iti 'ikën.
39 Usa 'ain ka anua sënë́nkë aín tupunkë ax puntëira kuani Gareb kakë matá me sënë́nkë anuax, Goá kakë me amibi kuainakëkë 'iti 'ikën.
40 Kamabi me sapankama anua uni ñuia maínkë a 'imainun anua chimapu unin pukë, 'imainun kamabi me axa Cedrón kakë xëxá anubi sënënakëkë a 'imainun, amiaxa bari urukë anua 'ikë xëputi 'ipitiu 'ikë Caballo kakin anëkë akamaxbi ka 'ënan 'iti 'ikën, usa 'ain ka kamabi ënë mekamax uínsaranbi rurupakin 'atima okëma a ñukamax 'iti 'ikën.”