Jerusalénnu tsókë unikamax an bana ñuikë Jeremías 'akatsi kia ñuikë bana
26
Anua Joaquím kakë uni Josíasnën bakë bëchikë an Judá menu 'apu 'ikin pëukë 'ain ka, Nukën 'Ibun Jeremías abë banakin, 2 ësokin kakëxa: “Anuxun 'ë rabiti 'ën xubunu 'ikë me mëníokë anu nirakëxun, kamina 'ën mi kakë banakama axa Judá menu 'ikë ëmakamanuax anuxun 'ë rabiti 'ën xubunu ukë unikama kati 'ain. Kakin kamina kamabi 'ën mi kakë banakama a ñuixunkin tëokima kati 'ain. 3 Usakinmi kakëxun kuakin sapi ka atun 'akë ñu 'atimakama a ënti 'ikën, usakin ënia sapi kana atun ñu 'atima 'akë kupí tëmëramikin, 'ën usakin 'ati sinánkësokin 'atima 'ain.4 Ësokin kamina atu kati 'ain, 'ëx min 'Ibu 'aish, kana usai kia kixun kamina kati 'ain: Mitsun kamina 'ën kakëxun kuama 'ain, usa 'ixun kamina 'ën kakësabiokin 'aiman, 5 an bana ñuikë 'ën unikama 'itsokin xutia xutiabi, kamina an kakë banakama kuaisamatankankë 'aínbi kamina atun bana kikësokin 'akankëma 'ain, 6 usa 'ain kana mitsunmi 'ën kakëxun kuaisama tankëbëtan anuxun 'ë rabikë xubu ënë Silónu 'ikë a 'asaribiokin 'ati 'ain. Usakin 'akëbë ka Jerusalén ëma ënëmi kuaiti 'ikën.”
7 Jeremías an bana ñuikë an anuxun Dios rabiti xubu anuxun bana ñuia ka sacerdote 'imainun këmëkin an bana ñuikë unikama 'imainun kamabi unikaman kuakëxa. 8 Usa 'ain ka Diosan a kakë banakama atu katankëxa sënënia, sacerdotekama 'imainun an këmëkinshi bana ñuikë unikama 'imainun kamabi unikaman, ñatankin bikin kakëxa: “¡Mix kamina 'akë 'iti 'ain! 9 ¿Uisa 'aish kaina mix rakuë́timaishi Nukën 'Ibun anë ñui anuxun a rabiti xubu ënëx ka Silónu 'ikë ax 'iásaribiti 'iti 'ikë, kianan ënë ëmaxribisa anu uni 'ikëmasa 'itánun masókë 'iti 'ikë kiax kin?” Usai kiax sënë́nkë ka kamabi unikaman anuxun Dios rabiti xubunu Jeremías bëararakankëxa.
10 Usai 'ikania ñuia kuati ka, Judánu 'ikë aín kushibukama ax, anua 'apun xubu 'ikë anuax kuankëxa anuxun Dios rabiti xubu xëkuë ió 'ikë anu rikiankëxa, anu ka añu kara 'akanxa kixun istankëxun mëníoti anu tsóbukankëxa. 11 Usa 'ain ka sacerdotekama 'imainun an këmëkinshi bana ñuikë unikama atun aín kushibu 'imainun kamabi unikaman kakëxa: “Ënë unix ka 'akë 'iti 'ikën, ax ka ënë ëma ñui 'atimati banaia. Mitsúnbi kamina axa usai kia mitsun pabitanbi kuakan.”
12 Usai kitankëxa atux sënë́nkëbëtan ka Jeremíasnën aín kushikama 'imainun kamabi uni timë́kë a ësokin kakëxa: “Nukën 'Ibunbi ka 'ë xuaxa aín anë ñui rakuë́timaishi bananun, 'ianan anuxun a rabiti xubu ñui kianan ënë ëma ñui kinun, mitsúnbi kamina 'ëx kikë bana a kuakan. 13 Mitsux mi 'atimati tsókë a ënkin kamina, upíokin ñu 'akánti 'ain mitsun 'Ibu Dios kikësa okinshi kamina 'ati 'ain, usaími 'ikankëbëtan ka axa ñu 'atima ka 'inúnuxun 'aia ax kikë, a 'ëx kikë ñukama 'imitima 'ikën. 14 Usa 'ain kamina mitsun kamina 'ë ñatankan usa 'ain, uisa kaina oisatani usokin 'ë 'akánti 'ain. 15 'Aínbi kamina mitsun upíokin ënë 'unánkanti 'ain: mitsunmi ñu 'atima 'akëmabi ënë ëmanu 'ikë unikamabëtan 'ë 'ax kamina 'uchokë 'ikanti 'ain; asérabi ka Nukën 'Ibunbi 'ë ënë bana upíokin ñuianan kamabi a ñukama chikinakin ñuinun 'ë xuaxa.”
16 Usa 'ain ka aín kushibu 'imainun kamabi unikaman sacerdotekama 'imainun an këmëkin Diosan bana 'ikëmabi bana ñuikë unikaman kakëxa: “Ënë uni a kupín nun 'ati ñu 'atima ka 'aíma 'ikën; ënë unin ka Nukën 'Ibu Diosan anën nukama kaxa.”
17 Usakin kai atux sënë́nkëbë atúxribi nirukin ka aín kushibu raírinënribi anu timëkamë 'ëokë unikama a kakëxa: 18 “Anua Ezequías Judá menu 'apu 'ikë a barikaman ka Miqueas Moréset kakë ëmanu 'ikë an, kamabi uni Nukën 'Ibun anën Judá menu 'ikë unikama ësokin kakëxa:
Nukën 'Ibu kamabi kushiñu ax ka ësai kiaxa.
Sión ëma ax ka unin anu ñu 'apáti me buinakë usaribi bërúti 'ikën,
Jerusalén ëmax ka anu uni 'ikëma me 'i ñankáishi 'iti 'ikën,
usa 'ain ka aín bashi anuxun a rabiti xubu 'ikë anu chuku 'atimashi kóti 'ikën.
19 ¿'Apu Ezequías 'imainun kamabi Judá menu 'ikë unikaman kara an bana ñuikë uni Miqueas rëtëakëx? Usakin 'ati ka sinánma 'ikën: 'apun ka ami rakuë́kin Dios atuisa nuibanun kixun kakëxa. Usa 'ain ka Nukën 'Ibun usai ka ñu 'iti 'ikë kixuan aín unikaman ñuia usaía atunu 'inun ñu 'atima 'imiama 'ikën. ¿Usa 'ain karanuna nukaman an bana ñuikë uni 'atankëxun chaiira 'ucha papikë 'iti 'ain?” (Kiax ka 'ain tukurikubu unikama atux kiakëxa.)
20 An uni bana ñuixunkë Urías, Semaíasnën bakë bëchikë Quiriat-jearim kakë ëma 'ikë uni axribi ka ënë me 'imainun ëma ñui Diosan usai kinun kakëx Jeremías kikësaribiti kiakëxa.
21 'Apu Joaquím, 'imainun an ñu mëëxunkë unikama 'ianan aín kushibu akaman ka usaía Urías kikë bana kuakëxa, kuakin ka 'akatsi kixun bariakëxa. 'Aínbi ka an bana ñuikë Urías a bana kuax 'apumi rakuë́ti Egipto menu abákëxa. 22 'Aínbi ka 'apu Joaquímnën Elnatán Acbor aín bakë bëchikë 'imainun bëtsi unikama Egipto menu xuakëxa, 23 xukëx kuanxun ka Egipto menua bitsínkin bëxun 'apu Joaquím a Urías 'inánkëxa, 'inánkëxun ka Joaquímnën, 'atankëxun anu uni ñuñumakama maínti 'akë anu maínun unikama 'amiakëxa.
24 Usa 'ain ka Ahicam, Safánën bakë bëchikë axribi an bana ñuikë Jeremíasnën rabanan nëëti kiakëxa, kikëbëtan ka an 'ati unikama 'ináma 'ikën.