Israel uni 'imainun Judánu tsókë akaman ka anun tëmëratima nëtë a kaínti 'ikë kixun ñuikë bana
23
Ësai ka Nukën 'Ibu asérabi kiakëxa: “¡Uisai kara an 'ën unikama aín ñuina 'arakakë unin 'akësa okin bërúankinma 'ën ovejakama nëtë́nun 'imianan abísnun 'imikë akamax 'iti 'ikën!”2 Nukën 'Ibu Israel unikaman Dios an ka aín unikama 'akinkë 'apukama ësokin kaia: “Mitsun kamina 'ën kaískë unikama bërúankinma abístanun abámian. Usa 'ain kana 'ën uisakin kaina ñu 'aisama 'an usakinbi mitsu tëmëramiti 'ain. 'Ëx kana Dios 'aish ësai kin.
3 'Ënbi kana 'ën unin raírikama anuaxa abánun 'ën 'imia anubi utëkënun 'imiti 'ain, 'imikëx ka aín ëmanubi 'utëkënti 'ikën, usai ika ovejakama 'ain pastonu kuantëkënkë usairibi 'iti 'ikën, anuax ka bakë bëchipati 'uakamë 'ëoti 'ikën.
4 'Ën kana an ñuina bërúankë uni 'akësa 'inua an bërúanti 'apu nanti 'ain, usakin nankëxun bërúai ka uimibi rakuë́tima 'ianan achúshibi nëtë́nun 'imitima 'ikën. 'Ëx min 'Ibu 'aish kana ësai kin,”
5 Ësai ka Nukën 'Ibu asérabi kiakëxa:
“Ka is achúshi nëtë ka uti ikë, anúan Davidtan rëbúnki 'ibuira,
ax 'apu achúshi ñu 'unairakë 'ixun unikama 'akinkin,
Judá menu 'ikë unikama ainra upíokin ñu 'aia bukunun 'akinti 'ikën, usokëx ka ñu 'atima 'aíma upiti tsóti 'ikën.
6 A nëtëkama ax 'apu 'ain ka, Judá menu 'ikë unikama 'ië́mainun,
Israel unikamaribi uínbi ubíokëma upitax tsóti 'ikën.
Ësokin anëkë ka 'iti 'ikën:
Nukën 'Ibu ax ka an nu ië́mikë 'ikën.”
7 Ësai ka Nukën 'Ibu asérabi kiakëxa: “Ka kuat, anúan uínsaranbi 'ëmi sinántëkënima ësai asérabi kikanti nëtë ka 'iti 'ikën: 'Ëx kana Nukën 'Ibu axa tsókë aín anë ñui kin an ka Israel unikama Egipto menua chikíankëxa, 8 usai kima ka sinanátëkëntimoi ësai kiti 'ikën: Nukën 'Ibu axa tsókë an ka Israel rëbúnkikama aín tsipumia 'anan bëtsi mekamanua abisa 'ikëbi chikíankëxa. A unikamax ka aín menubi tsótënkënti 'ikën.”
An Diosan banamabi këmë bana ñuikë unikama ñui kikë bana
9 'Ëx Jeremías an Diosan bana uni ñuixunkë 'aish kana këmëkinshi bana ñuikë unikama ñui kin:
'Ëx kana 'itsaira 'ën sinánkë anunbi 'aisamatani;
'ën namikama bërërui paë́nkësa tanin,
usai 'ikin kana achúshi unia uvas baka 'itsaira xëaxun tankësa usaribi tanin.
Atux ka Nukën 'Ibumi 'atimati bananan aín bana upíira amiribi 'atimati banaia kana kuatin.
10 A menuxun ka unikaman 'aisamaira 'atima ñuira 'aia,
'ën kana usaía 'inun 'atimakin sinánxuan,
usa 'ain ka a me masá nuitukë 'ikën.
'Imainun ka anu uni 'ikëma menu kookë nikamaribi ëskiaxa
usa 'ain ka atun kushínbi uni 'atimakin ñu 'axunia.
11 Ësai ka Nukën 'Ibu asérabi kiakëxa:
“An Dios kikë bana uni ñuixunkë 'imainun sacerdotekamaxi ka 'ën bana 'unánkëmasa 'ikën;
usa 'ain kana anuxun 'ë rabiti xubu anuxunbi 'aisama ñu 'aia atu mëran.
12 Usa 'ain ka atun tsóti ax tëira 'aish bai bëánkibukë 'ianan,
anun nikëxa me tsëtsërui tuñukë usaribi 'ikën:
'ën kana bëtsin titikakëx pakëkësa usairibi 'inun atu 'imiti 'ain usokin 'akin kana atun sinánkësokin 'anun 'amiti 'ain.
Uínsaran karana 'ën atun ñu 'atima 'akëkama
mënioin anun kana atun ñu 'atima 'akë, uisakin karana 'ati 'ai usakin 'ati 'ain.
'Ëx Dios 'aish, kana asérabi ësai kin.
13 Ësai ka Nukën 'Ibu kiaxa: 'Ën kana Samarianu 'ikë an 'ën bana ñuixunkë unikama,
'atima ñukama an 'ë 'aisama 'imikë 'aia isan:
usakin ñu 'akin Baalnën anë ñuixunkin ka 'ën kaisa Israel unikama,
'ëmi manuti 'uranun 'imiakëxa.
14 'Ën kana Jerusalénnu 'ikë an 'ën bana uni ñuixunkë unikama
'atima ñu an 'ë 'aisama 'imikë ñuira 'aia isan:
usakin ka atun aín xanuma bëtsi xanu aín nami 'anan, bëtsi unikama këmëkin paránia,
usakin 'akin ka uni 'atima sinánñukama,
a uínbia 'ain ñu 'atima 'akë ënxuma 'anun kixun sinánmia.
Usa 'ain ka atu 'imainun a ëmanu tsókë unikamax Sodoma 'imainun Gomorranu 'ikë uni tsóasaribi 'ën iskëx 'ikën.
15 Usa 'ain kana Nukën 'Ibu kamabi kushiñu 'ëx
an këmëkinshi asérabi 'ikëmabi bana ñuikë unikama a ñui kin:
'Ën kana piti 'imainun 'umpax muka rokëñun;
mëskukësamaira 'umpax xëanun 'inánti 'ain,
an bana uni ñuixunkë Jerusalénnu 'ikë unikaman ñu 'aisama 'akë
aka kamabi Judá menu 'ikë Israel unikamanribi 'aia.”
16 Nukën 'Ibu kamabi kushiñu ax ka ësai kiaxa:
“Israel unikama mitsun kamina,
an këmëkinshi uni 'ën bana ñuixunkë unikama ax kikë a kamina kuatima 'ain.
Atúxa kikë ax atúnbi sinanx këmëishi,
usai ka 'iti 'ikë kiax kikë 'ikën,
'ën kana usai karamina kiti 'ai kixun atu kakëma 'ain.
17 Uikaman kara 'ën bana kikësabiokin 'aisama tankin timaia,
atun ka mitsu kati 'ikën: Kamabi mitsun 'akë ñukama ax upí 'ia.
'Imainun ka 'ain sinánkësa okinshia,
an ñu 'akë unikamanribi mitsu kaia: Uisa ñu 'atimabi ka mitsunu 'itima 'ikën.”
An bana ñuikë Jeremías munuma banai kia
18 ¿Uix kara anua Nukën 'Ibu 'unántisama 'inun timë́kë anu 'iakëx?
¿Uin kara a isanan aín bana kuakëx?
¿Uin kara axa kia bëmë́kin kuakëx?
19 Ka kuat: Nukën 'Ibu nishkë ax ka nëtë masákuatsini
tunankuatsinkë usa 'ianan,
suñúan kushiira ukian ñu këñubëtsinkë usaribi 'atima sinánñu unikama ainan 'ikën.
20 Nukën 'Ibu nishkë ax ka
uisakin kara ñu 'aisatania usakin 'axma tantitima 'ikën.
Usa 'ain ka anun mitsun ax ka asérabi 'ikë kixun sinanan,
ënë ñukama upíira okin kuati nëtë 'iti 'ikën.
Nukën 'Ibu usai ka an këmëkin bana ñuikë unikama 'iti 'ikë kiax kia ñuikë bana
21 “Ësai ka Nukën 'Ibu kiakëxa. 'Ën kana an këmëkinshi an 'ën bana ñuikë unikama a xukëma 'ain,
'ianan kana uisa banabi 'ën atu kakëma 'ain,
'aínbi ka atúxbi usai 'iti kuëëanx 'ën anë ñui banati sinanx bënëruxun 'aisatanxa.
22 'Aínbi ka anu 'ëx 'ikë anu kuanxun kuni 'ën bana kuakë 'itsíanxa, kuaxun ka
'ën bana 'ën unikama ñuixunkë 'itsíanxa;
usakin 'akin ka atun ñu 'atima 'akëkama
ënun 'imianan 'atimai tsókë akama ënun 'imikë 'itsíanxa kiax ka kiakëxa.”
23 Ësai ka Nukën 'Ibu asérabi kiakëxa:
“'Ëx kana 'ura 'iananbi 'urama 'aish Dios 'ain.
24 ¿Uix kara 'ën istimaisakiax unëti 'ik?
'Ëx kana naíkamë 'ëonu 'ianan kamabi menuribi 'ain.
'Ëx min 'Ibu 'aish kana ësai kin kiax ka Dios kiakëxa.
25 Ësai ka Nukën 'Ibu kiakëxa: 'Ën kana kuan an bana ñuikë unikamax ka atúnbi namátankëx këmëi 'ën isana namámikin atu ká kiax kia.
26 ¿Uínsaran kara an këmëkinshi bana ñuikë unikama atun, 'ën usai kinun kakëxumabia këmëkin atúnbi sinánkin bana ñuikankë a ënti 'ik?
27 Usa 'ain ka këmëkinshi an bana ñuikë unikama an namákë bëtsi ñuixunkin, 'ën unikama 'ëmi manunun 'imia, usakin ka aín chaitiokë kamanribi Baal rabikin 'ë manuakëxa.
28 ¡An Dios kikë bana ñuikë unin namáxun ka aín namákë ashi bëtsi ñu ñuikinma ñuiti 'ikën, 'aínbi ka uin kara 'ën bana ñuia an 'ën banaishi ñui kiti 'ikën! Usai ka Nukën 'Ibu kiakëxa.
29 ¡Nun karanuna basikëñun trigo abëtan sënën kara kixun tupúnti 'ain! 'Ëx kikë bana ax ka tsi rëkirukësa 'imainun achúshi manë taxuñunën mapara tukapakësa usaribi 'ikën. 'Ëx min 'Ibu 'aish kana ësai kin.
30 Usa 'ain kana 'ëx an këmëkinshi bëtsibë paránankin 'ën banaisa kixun bana ñuikë unikama ami nishin kiax ka asérabi Nukën 'Ibu kiakëxa.
31 'Ëx kana an bana ñuikë unikama sinánñuma kuainxun an bëtsin bana ñuikë ami nishin.
32 'Ëx kana an bana ñuikë unikama an këmëkinshi namákë ñuixunkin 'ën unikama; bëtsiokin sinánmia. 'Ën kana xukin uisa bananbi kakëma 'ain, usa 'aish ka 'ën unikama 'akinsama 'ikën. 'Ëx min 'Ibu 'aish kana asérabi ësai kin.”