Ax ami nishkë Pashur axa usai 'iti ñuia Jeremías kia ñuikë bana
20
An anuxun Dios rabiti xubu bërúankë aín kushi Pashur sacerdote ax ka Imernën bakë bëchikë 'iakëxa, an ka usai ka ñu 'inuxun 'aia kiaxa Jeremías kia kuakëxa, 2 kuaxun ka ñatanxua mëëtankëxun i kiniokë anun tabiataxkin sipuanun 'amiakëxa, ax ka Benjamínën menu kuani anun chikiti xëkuë cha au 'iakëxa, anuxun Dios rabiti xubu a rapasu 'ikë anu ka sipuakëxa.3 Usokin ónkë achúshi nëtë 'inukëbëtan ka Pashur, an Jeremías sipuakë anua chikínti uni xuakëxa, xukëxuan bitsínkin bëkëxun ka Jeremíasnën kakëxa: “Bërí ka Nukën 'Ibun min anë Pashur 'ikëbi bëtsiokin nankin Magor-misabib kakin min anë nanxa, ‘Magor-misabib ënë banax ka kamabinuax ka uni rakuë́ti 'ikë ki kikë 'ikën.’ 4 Ësai ka Nukën 'Ibu kiaxa: 'Ën kana mi 'imainun min 'unánkë unikama axribia 'aisamaira rakuë́nun 'imiti 'ain; usa 'ain ka min ismainunbi ax aminishkë unikaman aín manë xëtokën min 'unánkë unikama 'ati 'ikën. 'Ën kana kamabi Judánu 'ikë unikama Babilonianu 'ikë 'apun aín suntárukamabëtan ñatanbiankin aín manë xëtokën anuxun atu rëtëanan raíri unikama aín me Babilonia anu tsónun buánun 'amiti 'ain. 5 'Amianan kana axa mitsumi nishkë unikama ënë ëmanua 'ikë ñu upíbu, 'imainun unikaman ñu upíirabu a 'ianan Judánu 'ikë, 'apukaman ñu upíbu akama Babilonianu buánun 'amiti 'ain. 6 'Imainun ka Pashur miribi axa mimi nishkë unikaman Babilonianu min aintsikama këñunbi buánti 'ikën. Anuax ñuia ka min 'unánkë unikama këñunbi anubi mi mainkanti 'ikën, min kamina këmëkin asérabi 'ikëmabi usai isa ñu 'iti 'ikë kixun bana atu ñuixuankën.”
An bana ñuikë Jeremías unikaman 'akë ñu kuëënima nishi Nukën 'Ibubë bana
7 'Ën 'Ibu, min kamina 'ë paránkën,
usa 'ikëbi kana minmi 'ë
paránun 'amian;
usa 'ikëbi kamina mix 'ën kushisama 'ixun 'ë isin.
Kamabi hora ka unikaman 'ë 'usani
'ëmi kuaikania.
8 'Ëx banakëtibi kana bënë́kinshi ñu 'atima 'ati
'imainun ñu masóti a ñui banain;
usai kikin min bana ñuia ka ënkinmaira 'ë 'ichati 'ëmi kuaikania,
'ën mix kikë bana ñuikëbë.
9 Uínsaran nëtën karana 'ëx kian: “'Ën kana amiribishi Nukën 'Ibumi sinántëkëntima 'ain,
usa 'ain kana amiribishi aín bana ñuitëkëntima 'ain,”
usa 'ain ka min banakama ax tsi
rëkirukënën 'akësa okin 'ën xokama 'ë
'ukëmëuxun xarokësa okin 'aia.
Usa 'ain kana mixmi kikë banakama 'ëbi
ñuikinma sinaínshitisa tanin
'aínbi ka usokin 'aisama 'ikën.
10 Usa 'ain kana munura banai unikama ësai kanania kuatin:
“¡Kamabinuax ka 'itsaira rakuë́kania!”
Usa 'ain ka ësai kikania: “¡Uisax karanuna a unimi manánti 'ai isti kamina rikuatsinti 'ain!”
'Ën 'unánkë unikamanbi ka 'ën ñu 'atima 'ati kuëënkania.
Usai 'i ka ësai kikania: “¡Parántisa 'ikë
parántankëxun kananuna nun ira a 'atimokin kananti 'ai kiax ka kikania!”
11 'Aínbi kamina mix Nukën 'Ibu 'aish 'ëbë 'ai,
achúshi uni 'akánanti 'unáinra 'ikë uínbi kanánkëma usaribi 'ain;
usa 'ain ka an 'ë 'akatsi kixun nuikë unikaman, 'ë rëtëtima 'ikën;
usai 'ika atun 'anuxun sinánkë usakin 'aíma rabinkë bërúti 'ikën,
usaía rabinkë ax ka uínsaranbi uínbi manukëma 'iti 'ikën.
12 Nukën 'Ibu kamabi kushiñuira,
min kamina upí unikaman ñu 'akë a 'unanin,
min kamina unin aín nuitu 'ukëmëu ñu 'aisatankin sinánkë, akamabi 'unánin,
'ën kana 'ëmi 'akinun mi ñukan,
usa 'ain kamina uisakin kaina a unikama tëmëramiti 'ai a 'ë ismiti 'ain.
13 ¡Nukën 'Ibumi ka kantakan Nukën 'Ibu ka rabikan!,
an ka 'atima ñu 'akë unikaman tëmëramikëx bënëtiabi uni ië́mia.
14 ¡'Atimokë ka anun 'ën titan 'ë tuá nëtë ax 'iti 'iakëxa!
¡Anun 'ën titan 'ë bakë́an nëtë ax ka 'upiokin sinánxunkëma 'iti 'ikën!
15 ¡'Atima okë ka an 'ën papa bëbu tuá ka min
bëchikë bakë́anxa kixun kakin kuëëmia uni ax 'iti 'ikën!
16 ¡A unix ka ëmakama Diosan xënibua 'aínbi
usabi rakátanun këñuasaribi 'iti 'ikën!
¡An ka pëkarakëma 'aínshi uni rakuë́ti 'akánanti 'ain kuënkënkë a kuanan,
bari xamarukëbëtan anun bënëtishi mëníokati ñu banókë kuati 'ikën,
17 uisati kara Diosan 'ën titan puku 'ukë mëuküax
rëmumënun 'ë 'imiama 'ikën!
Usaribiti ax anu uni ñuia maínkë kinisa 'ain kana 'ëx uínsaranbi bakë́ama 'itsían.
18 ¿Uisa kupín kara 'ëx paë tani masá nuituti 'ianan,
'ëx anun tsókë nëtëkaman rabinishi tsótiokin 'ën titan 'ë tuakëx?
¿Uisa kupín karana 'ën titan puku 'ukë mëuküax rabinishi 'ëx bamati nëtë 'itámainun tsónux bakë́ankën?