Chumu tukikë ñui kikë bana
19
Nukën 'Ibun ka 'ë kakëxa: “Anuxua 'akë anu kuanxun kamina achúshi chumu mapú 'akë maruti 'ain, usokin 'atankëxun kamina ëmanu 'ikë 'ain kushikama 'imainun sacerdote aín kushibu raíri timëti 'ain. 2 Usokin 'abiani kamina Ben-hinom kakë me sapan anu kuanti 'ain, anua Chumu sani pukë kakë Xëputi 'ikë a bëtánain kuantankëx, anu bëbatankëxun kamina 'ën mi kakë banakama atu ñuixunti 'ain. 3 Ënë bana: Ka Judá menu tsókë 'apukama 'imainun Jerusalén ëmanu tsókë unikaman kuati 'ikën, ësokin mitsu kakëxunmi kuakanun ka Nukën 'Ibu kamabi kushiñu, Israel kaman Dios ax kiaxa: 'Ën kana ñu 'aisama chaiira ënë menu, tsókë unikamaxa a ñuia kuati 'itsaira rakuë́kantanun 'imiti 'ain. 4 Usa 'ain ka Israel kaman 'ëmi manutankëxun ënë me 'unánkëma mesa 'imikin anuxun bëtsi dioskama rabiakëxa. Rabikin ka unínbia 'akë ñukama sanuira ñu xaroxuankëxa, 'aínbi ka atúnbi a dioskama 'unánma 'ikën, a dioskaman ka a nëtëkaman uisai kara 'iabi uínsaranbi 'akianma 'ikën, 'imainun ka atun chaitiokëkama 'ianan Judánu 'ikë 'apukamanbi 'unánma 'ikën. 'Unánkima ka a menuxun uni ñu 'atima 'akëmabi aín imi menu 'ëbankiantanun 'akankëxa. 5 'Anan ka anuxun atun bakë bëchikëkama Baal kakë atun dios a 'aímai këñutanun xaroxunti 'akëxa, 'aínbi kana usakia ñu 'anun káma 'ain, 'ianan kana 'ënbi usakin ka ñu 'ati 'ikë kixun sinánma 'ain. 6 Ka kuat, anun ënë me Tófet kanan me sapan Ben-hinom kakima, me sapan anuxun uni 'akë kakin anun anëti nëtë 'iti 'ikën. 'Ëx min 'Ibu 'aish kana ësai kin.7 Ënë menuxun kana atun sinánkësokian Judá menu 'ikë unikama 'imainun Jerusalén ëmanu tsókë unikaman 'anun 'amitima 'ain. Usokin 'akima kana axa ami nishkë unikaman atuira 'akanankin 'akëxa, ñuia ñuina pëchiñu 'imainun axa pianankë raëkëma ñuinakaman piti 'imiti 'ain.
8 Ënë ëma kana anu uni 'ikëma mesa 'imiti 'ain 'imikëbë ka anu 'ikë unikamax 'itsaira rakuë́ti 'ikën. Usa 'ain ka axa anun inúkë unikamax masókin 'aíma 'itánun këñua a isi ratuti rakuë́kanti 'ikën.
9 'Anan kana axa aminishkë unikama atun ëma bëarabuinkë 'aia, panankin a piti 'aíma 'ain bënë́kin unikaman atun bakë bëchikë bëbukama 'imainun 'ini bëchikëkamaribi piti 'ikën, 'imainun ka unínribi uni itsi piti 'ikën kixun kakëxa.
10 Ësokin pain atu katankëxun kamina, axa mibë 'ikë mi rapasu 'ikë unikaman ismainunbi ñutë mushkin tukapakin, 11 ësokin kati 'ain: Nukën 'Ibu kamabi kushiñu ax ka ësai kiaxa: Ënë unikama këñunbi kana atun ëma ñutë me 'akë tukibukënëxa mëníotëkëinsama usaribi 'itánun atu 'ati 'ain. Usakin 'akë ka unin uni ñukë anu maínti me 'aíma 'ain Tófet kakë anu maínti 'ikën. 12 Usakin kana ënë ëma anua tsókë unikama këñunbi 'ati 'ain. 'Akin kana Tófet 'ikësaribitia 'itánun 'ati 'ain. 'Ëx min 'Ibu 'aish kana ësai kin. 13 Jerusalénnu 'ikë xubukama 'imainun, Judánu 'ikë 'apun xubukama 'imainun xubu maskuan anuxua naínu 'ikë 'ispakama 'imainua bëtsi dioskama, rabikian uvas baka anpënkaxunkë 'aish ka ñu 'ati 'aisama anuxun 'akë kakë usaribi 'aish Tófetsaribi 'iti 'ikën.”
14 Ësokin pain 'anuxun atu kanua Nukën 'Ibun xukëxun Tófet anuxun atu kabiani kuanxun ka Jeremíasnën, anuxun Dios rabiti xubu Jerusalén anu 'ikë me mëníokë anu nixun kamabi unikama kakëxa: 15 Nukën 'Ibu kamabi kushiñu Israel unikaman Dios ax ka ësai kia: 'Ën kana ënë ëma anua 'ikë unikama këñunbi 'ëx kikësokinbi tëmëramiti 'ain. Usa 'ain kana atun ka aín nuitu iruarakin 'ën bana kikësabiokin 'aisamatania kiaxa Dios kikë ka Jeremíasnën atu ñuixuankëxa.