An chua me tëkë 'imainun an mapú 'akë uni ñuikë bana
18
Nukën 'Ibun ka 'ë amiribishi katëkëankëxa: 2 Axa chua men tëëkë achúshi uni aín xubunu kamina kuanti 'ain, anuxun kana achúshi bana mi kati 'ain. 3 Ësokin kakëx kana 'ëx anua chua men tëkë uni aín xubunu kuankën. 4 Kuankin iskëxunbi ka ñutëa 'akë a 'atima bërútia amiribishi tukapatankëxun a mapúbi, añu kara 'aisatania usakinbi upí isi kuëënuxun 'akëxa.5 Usa 'ain ka anuxun Diosan ësokin kakëxa: 6 ¿'Ën karana Israel unikama an chua me 'akë unían mapú 'akësaribi okin 'atima 'ain? Mitsux kamina 'ën ënkëma 'aish 'ën mëkënubi 'aish an chua me 'akë unían aín mëkënan mapú añu kara 'aisatania usakin 'akë usaribi 'ain. 'Ëx Dios 'aish kana ësai kin. 7 Usa 'ain kana 'ëx kuëënxun achúshi menu 'ikë ëmakama 'anan, anua aín 'apukama 'ikë aribi bënë́kinshi këñunun 'imiti 'ain. 8 'Aínbi kana a menu 'ikë unikama aín ñu 'atima 'akëkama a ënia, usakin 'ati 'ën sinánkë usakin 'atima otima 'ain. 9 Usakin 'akinma kana bëtsi nëtën ñu 'apákëx koókë usaribiti 'i 'uakamë 'ëonanbi 'apuñu 'inun 'imiti 'ain. 10 'Aínbi kana a ëmanu tsókë unikama ñu 'atima 'akin, usai kamina 'itima 'ai 'ën kakë usai 'iama, kana a usakin 'akinti 'ën mëníokin sinánkë usakin 'akintima 'ain. 11 Usa 'ain kamina Judá menu tsókë unikama 'imainun Jerusalén ëmanu tsókë unikama ësokin kati 'ain, 'ëx Dios 'aish kana ësai kin: 'Ën kana uisokin karana mitsu 'atima oti 'ai kixun sinánkin, mitsu 'atima oti sinanin. Usa 'ain kamina mitsunmi 'atima ñu 'akë a ënkin; upí ñukamaishi 'ai upiti bukukanti 'ain. 12 'Aínbi ka atun mi kati 'ikën: ¡Ñankáishi kamina usai 'itima 'ain! Nukamax kananuna nun kuëënkësa 'oíshi tsókin, nun sinánkësa okinshi ñu 'ati 'ain.
13 Usa 'ain ka Nukën 'Ibu ësai kia:
Bëtsi bëtsi ëmanu tsókë unikama kamina uin kara usaribiti ñu 'ia kuaxa kixun ñukáti 'ain.
¡Israel unikaman ka 'aisama ñuira axa!
14 ¿Líbano bashinu 'ikë maparakama anua 'ikë matsin tita ax kara uínsaran nëtë́ti 'ik?
¿'Umpax matsira bashinuax shióbukë ax kara
'ain bashi kamanuax ëskiti 'ik?
15 Usa 'aínbi ka 'ën kaískë unikaman 'ë manutankëxun,
ro sanuira aribi xarokin, atunbia 'akë ñukama ashi rabikin 'ë manukanxa.
Usai 'ika anua nia bai xëni a ëni,
'ën usai 'iti kakë banakama a manui,
atun 'unánkëma bain kuankësa 'inun 'ëx kia banakama a manukankëxa.
16 Usaia 'ikëbë ka atun ëmakama anu uni 'ikëma mesa 'inun 'iakëxa,
usaía 'ikë 'ain ka kamabi menu 'ikë unikama ami kuaiakëxa.
Usa 'ain ka uikamax kara anun inuti kuania akaman rakuë́kin tankin 'ain maxká shaíkai tënkëti 'iti 'ikën.
17 'Ën kana amiaxa bari urukë amiax suñu kushi bëki 'ikësai 'ikin, Israel unikama abistanun 'imiti 'ain;
usakin kana ami nishkë unikaman 'atirabanan abátanun 'imiti 'ain.
'Imianan kana uínsaran nëtën kara 'ën kakësakin 'aíma tëmëraia,
anun 'ën 'atima okëxa tëmëraiabi 'akintima 'ain.
An Dios kikë bana ñuikë uni Jeremías 'akatsi kiax unikama 'ësë́nan
18 Ësai ka unikama kiakëxa: “Bërí kananuna uisoxun karanuna an Dios kikë bana ñuikë Jeremías 'ati 'ai kixun sinánti 'ain. Uinsaranbi ka nunu sacerdotekama an bana nu ñuixunti 'ianan, an bana 'unánkë an nu 'ësëti 'ianan, an bana ñuikë unikama an Diosan bana nu ñuixunti akama nunu 'ima 'itima 'ikën. Usa 'ain kananuna unikaman 'anun nun 'uchoti 'ain. Usa 'ain kananuna uisai kara ax kia abi aín bana tantima 'ain.”
An bana ñuikë Jeremíasnën Dios ñuká ñuikë bana
19 ¡Nukën 'Ibu Dios 'ën mi ñukákëxun kamina kuati aín!
¡Axa 'ëmi nishkë unikamaxa usai 'ë ñuikikë a kamina kuati 'ain!
20 ¿'Ën upíokin 'akinkëxunbi atun 'ë usokin 'atimokë ax kara upí 'iti 'ik?
¡Atun ka anu 'atankëxun 'ë mainkatsi kixun kini 'axa!
Usa 'ain kamina atun rabanan në́kin kanan,
atumi nishkin 'atima oxunma 'anun 'ën mi
kakë akamina sinánti 'ain.
21 'Aínbi kamina bërí atun 'ini bëchikë xanu 'imainun bëbukama numin 'iananbi manë xëtokën 'akëx bamanun 'imiti 'an,
usakin 'akëbë ka atun xanukama kasunamëti tuáñuma bërúkanti 'ikën.
¡'Imainun 'insinan atun bënëkamaribi këñuti 'ikën,
'imainun uni bënábukama axribi 'akanankënuax manë xëtokën 'akëx bamati 'ikën!
22 'Ën kana kuëënin xuisa tankin sapi kamina atu ratuia,
mëkama unibu atux kuankëbëa atun xubunuax kuënkëni ratúkantanun xuti kuëënin.
Usa 'aínbi ka atun anu pakëtia 'ë bikatsikixun kini chaiira 'anan,
anun 'ëx niti bainuribi unëkin ami 'ëx 'iti ñuribi nanxa.
23 'Aínbi kamina mix Dios 'ixun, kamabi ñu uisokin 'axun 'ë bamamiti kara sinánkanxa akamabi min 'unanin.
¡Usa 'ain kamina atun ñu 'atima 'akëkama a mëníoxuanan atun 'uchakama a manutima 'ain!
¡Usa 'ain kamina atiaira uínsaran kaina atumi nishi anun,
uisa kaina oisatani usakin min atu 'atimoti 'ain!