Jeremías an Diosan bana an usai ka Israel unikama tëmëramiti 'ikë kixun ñuia bana
15
Ësakin ka Nukën 'Ibun 'ë kakëxa: Mitsun chaitiokë Moisés 'imainun Samuelnën 'ë bëtánain nirakëxun usakin kamina 'atima 'ai kixun kakëxunbi kana ënë unikama nuibatima 'ain. Usa 'ain kamina anu 'ëx 'ikë ënuax chikíkiania kuantanun ënë unikama kati 'ain.2 Kakëxua uinu karanuna kuanti 'ai kixun ñukákëxun kamina, 'ën mi kakë ësokinbi kati 'ain:
Uix kara 'insinan bamati nankë 'ikë, ax ka anunbi bamati 'ikën;
'imainun ka uix kara 'akánanti nankë 'ikë ax 'akanani bamati 'ikën, 'ianan ka uix kara numin bamati nankë ax numinbi bamati 'ikën; 'ianan ka uix kara axa ami nishkë unikaman ñatanbiankin buánti nankë 'ikë ax ñatanbiankin buánkë 'iti 'ikën.
3 'Ëx Dios 'aish kana ësai kin: 'Ën kana rabë́ 'imainun rabë́ anun bëtsi bëtsi okin tëmëramiti xuti 'ain: akamax ka 'inuxun 'aia, 'akanantinuax bamati, kamunkaman bamakë nirinti, ñuina pëchiukaman bamakë piti 'imainun raëkëma ñuinakaman bamakë 'ikë piti akama ka 'iti 'ikën.
4 Ësokin kana kamabi menu 'ikë uníxa a isi rakuë́tanun 'ati 'ain, Judá menua 'apu 'ikë Manasés Ezequíasnën bakë bëchikë an ka 'atimakin Jerusalénnu ñu 'axa usa 'ain.
5 ¿Uix kara Jerusalénnua tsókë unikama anun rabanan nëëti 'it?
¿Uix kara minun rabanan masá nuituti inti 'it?
¿Uix kara mitsúxmi 'insinima upitax tsóti kuëënti 'it?
6 Mitsux kamina 'ën kakëxun kuaisama tani 'ëmi manúkankën.
'Ëx Min 'Ibu 'aish, kana asérabi ësai kin.
Usa 'ain kana 'urainra mitsu nuibati tënëxun,
'ën 'akësa 'itanua axa mimi nishkë unikaman këñukin 'anun mitsu ëankën.
7 Usakin 'akin kana min unikaman ñu bëru tákaia, suñun 'ain chua nuámikësa okin 'akën, 'akin kana
a menua 'ikë ëmakamanua abisi chikínun 'imiakën;
usakin 'akin kana 'ën uni 'ikëbi atu bakë bëchikëñuma 'itánun masókin këñuakën,
usokin kana atun ñu 'atima 'akë ëinsama tania 'akën.
8 Usakin 'akin kana atunua 'itsaira xanu kasunamëkë,
parúmpapa masi bëru iskësaira 'inun 'imiakën.
'Imikin kana bari manikëbëa nëtë xabá 'ain
xanukaman aín bakë tuá bënábu 'akánanti 'unanbu akamaribi bamanun 'imiakën;
usakin 'akin sapi kana a ëmanu 'ikë xanukama 'aisamaira rakuëkënun 'imiakën.
9 Usakin 'akëbë ka tuá 'itsañu xanukamaxribi,
aín ñunshin nëtë́ti suñu bikamati uinkamai bë́nani kushi uíni 'iti 'ikën;
usai 'i rabini ka ñuumasara 'aish 'ikësai atun tuákama nëtë xabá 'ain bamakë 'ain 'iti 'ikën,
usai 'ikëbë ka nëtë xabá ax bëánkibukë 'iti 'ikën.
Usa 'ain kana axa bërúkë unikama ami nishkë unikaman 'anun 'amiti 'ain.
'Ëx Min 'Ibu 'aish kana asérabi usai kin.
Jeremíasnën 'itsaira ñu inuti tëmërakin Dios ñuká ñuikë bana
10 ¡Ësai ka an bana ñuikë kiakëxa: Uisai karana 'iti 'ain, uisa 'ixun kara 'ën titan
bëtsi rabanan nëëti kamabi unibë mëëananti okin 'ë tuakëxa!
Uibi kana 'ën kuríki 'inántëkënua 'ë kuríki 'inánun ñukákëma 'ain,
'ianan ka 'ëribi kuríki 'inantëkënuxun ñukákëma 'ikën,
usa 'aínbi ka kamaxunbi 'atima okin sinánkin 'ë ñuia.
11 Usa 'ain ka atumi 'atimakin sinánxunkë ax asérabi 'iti 'ikën, 'ën 'Ibu Dios,
'ën mi asérabi axa 'ëmi nishkë unikama 'aisama ñu inuti
bënëtiabi ñukáxunkëbëma ka mix kikë usaibi 'iti 'ikën.
Dios usakian Israel unikama 'atima oti kia bana
12 ¿Uin kara aín tsipumixuan anun 'akánanti,
manë tunan 'anan manë panshian anun 'akánanti uniokë a tsasipati 'ik?
13 Usa 'ain kana Israel unikama mitsux 'uchakë kupín kana
'ën axa mitsumi nishkë unikaman mitsun ñu
kupírakëkama 'imainun ñu upíirabu 'ianan,
kamabi mitsun menua 'ikë ñukama kupímashi bibianun 'amiti 'ain.
14 'Ën kana axa mimi nishkë unikaman
mitsun 'unánkëma menu buántankëxun tëmëramikin ñu mëëminun mikama 'imiti 'ain,
'ëx mimi 'itsaira nishkë anbi ka
tsi rëkirukënëa ñu këñukësa usaribi okin mitsu 'ati 'ikën.
An Dios kikë bana ñuikë Jeremíasnën Dios katëkëan ñuikë bana
15 ¡Nukën 'Ibu Dios min kamina kamabi ñu 'unanin!
¡Usa 'ain kamina 'ëmi sinánkin 'ë 'akinti 'ain!
¡An 'ë 'atima okin ubíokë unikama akamina 'atima oti 'ain!
Usa 'ain kamina atu nuibairatima 'ain,
'ëma 'aia usa 'ain;
min kamina isti 'ain, 'ën kana mi kupí atun 'ichakëxunbi tënëin.
16 Uínsaran kaina min 'ë kai anun kana 'ëx upíokin min bana kuati piti nëishokin 'akë pi kuëënkë,
usaribiti kuëënun 'ë 'imiakëxa, minmi kakë bana an ka 'ë kuëënun 'imiakëxa 'ëx minan 'ikë.
Nukën 'Ibu Dios mix kamina kamabi kushiñuira 'ain.
17 'Ën kana an nëtë 'inukin xëati sinánishi bukukë
unikamabë amiribishi timëtëkënti a ëankën;
anunmi min uni 'iti 'ë 'imia anun 'ia 'aish
kana bëríbi 'ëxi upiti tsotin,
usai 'ikë kamina mixmi 'uchakëbë nishkë usaribiti 'inun 'ë 'imiakën.
18 ¿Uisa kupí kara 'ëx paëtani tëmërakë ax uínsaranbi nëtë́timin?
¿Uisa kupí kara 'ëx tëmërakë ax ñumi 'ikë ronkëxbi mookëma usaribi 'ik?
Minmi 'ë 'akinkëma ax ka 'umpaxñuma 'inua xëxá ëskikë usaribi
'ianan, kamina anu 'umpax buákiti 'akë axa 'umpaxñuma 'inun barin ëskikë 'ain ñankáishi 'ikë usaribi 'ikën.
An bana ñuikë Jeremías an kakëxun 'aisamataniabi ábia ñu anun katëkëan bana
19 Usa aín ka Diosan ësakin 'ë katëkëankëxa:
'Ëmi sinántëkënia kana 'ën mi amiribishi bitëkënti 'ain, 'ëmi upíokin ñu 'axúnun,
usa 'ain kamina upíokin 'ë ñu 'axunti 'ain.
Usa 'ain kamina mix 'atimati banai min sinánkëshi banakë a ëni,
mix an 'ëx kikësa 'itánun an 'ën bana upíokin ñuikë uni 'iti 'ain.
Usa 'ain ka Israel unikama min 'ën bana ñui kia kuati minu utëkënti 'ikën,
usa 'ain kamina min atun kakëxun kuatima 'ain.
20 'Ën kana mixmi ënë unikamanan
achúshi kënë manë panshianën kënëarakin kushiokin nitsinkë usaribi 'inun mi 'imiti 'ain.
Usa 'ikë ka mibë 'akanankinbi uínbi mi kanantima 'ikën,
'ën kana mi bërúankin ië́miti 'ain.
'Ëx kana Min 'Ibu 'aish usai kin.
21 'Ën kana 'atima unikaman mi 'ibuakëx atubë 'ikëbi mi anua chikíanan,
¡an bënë́kinshi ñu 'ati kuëënkë unikamanua 'ën mitsu ië́miti 'ain!