Chaiira 'inun me ëskia ñuikë bana
14
Nukën 'Ibu Diosan ka Jeremías Judá menua 'uí 'ibúkëbëma me ëskikë 'ain ësokin kakëxa:2 Judánu tsókë unikama ka nitë́xëti inia,
usa 'ain ka anu 'ikë ëmakamanu 'ikë unikamax tëmëraia,
usai 'ika anu 'ikë unikama menu tsótax masánuitutia.
Usai 'ika Jerusalénnu 'ikë unikama munuma kuënkëni paëtani inkania.
3 Usai 'imainun ka ñuñuira unikaman an ñu mëmikë unikama 'umpax bitánun xutia;
xukëx kuanxunbi ka atun anua 'umpax biti 'akë kini anua 'umpaxñuma okin,
anun 'umpax biti 'akë na buankankë a ñankáishi buani ritëkënkiani;
'umpaxbitsi kuanxi 'umpaxñuma obiani kuani,
chupan rabinkësa 'aish mamápukukankëxa.
4 'Imainun ka naën tëkë unikamaxribi,
paránkësa bërúti 'itsaira rabinia
usai 'ika chupan mamapukutia,
'uíka 'ibutima usa 'ain
'imainun ka me ë́ski tukibutia.
5 Usai 'ikëbëtan ka chaxu aín xanu kamanribi aín
tuá bërí bakënkërakama a piti,
xubikama 'aíma 'ain rakania,
6 'imainun ka burro raëkëmakama axribi,
aín bashi anu ñu 'ikëmakama anu
nitsax munuma uin bitsi ñuina chukúmabu an nami paxa pikëkama 'ikësaribiti 'ia;
usai 'ika a piti pastobi 'aíma 'ain
numikëa bakishan mapukëxun upíokin isima.
Jeremíasnën Judá menu 'ikë Israel unikama Dios ñukáxua bana
7 ¡Nukën 'Ibu Dios nun 'uchakë anbi ka nukama 'aisama 'imia,
usa 'ain ka mix nuibanankë 'ain min anë ax upíokin rabikë 'iti 'ikën!
Usa 'aínbi kananuna mix kikësoi 'ima 'itsaira nukamax mimi 'uchan.
8 Mix kamina 'ashia Israel unikaman kainkë a 'ain,
usa 'ain kamina anun nux tëmërati nëtë 'ikëbëtan nukama ië́miti 'ain,
¿uisakatsi kaina achúshi uni 'unánkëmaxa ënë menuax 'ikësai,
'ianan uni 'urakuani imë́ uinu kara 'ia anu 'uxi bërúkë usaribiti mix 'in?
9 ¿Uisa kupín kaina achúshi uni ñu 'ianan,
axa 'akánanti 'unánkë 'ixunbi raíri uni 'akinkin ië́mikëma usaribi 'ain?
Usa 'aínbi kamina mix nun Dios 'aish nukama nëbëtsi 'iti 'ain,
usa 'ain ka nux kananuna min unikama 'ai kixun kamaxunbi 'unánkanxa;
¡usa 'ain kamina nukama ëntima 'ain!
10 Diosan ka Jeremías Judá menu tsókë aín uni Israelkama ñuikin kakëxa: Ënë unikamax ka atun kuëënkësa oi ñu 'aíma bëtsinu bëtsinu kuani niti kuëënia. Usa 'ikë kana a unikama 'ën kuëënkin isiman. Usa 'ain kana bërí atun ñu 'atima 'akë a sinánkin,
atun 'uchakë kupí 'atima oti 'ain.
11 Nukën 'Ibu Diosan ka 'ë kakëxa: 'Ë kamina ënë unikama upiokin 'akinun kixun katima 'ain.
12 Usa 'ain kana 'itsa nëtë imi pima samákin atun ñukákëxunbi kuatima 'ain; 'ianan kana 'itsaira ñuina xaroxuanan ñu 'apákë aín bimi 'ë bëxun nanxunkëxunbi 'ën upí istima 'ain. Usa 'ain kana 'ën suntárukama abë 'akanankin 'akëx 'ianan, atun piti 'aíma 'ain numin 'ianan, 'insinan këñunun 'imiti 'ain.
13 Ësai kiabi kana 'ën Dios kakën: Nukën 'Ibu Dios an bana ñuikë unikaman ka unikama ësokin bana ñuixunia, 'akánanti ka 'aíma 'inuxun 'aia, 'imainun ka numiribi 'itima 'ikën, usa 'ain ismina min ënë menu basi uni upitax nuibanani tsónun 'iminuxun 'ai ka atux kia.
14 Ësokin kakëxunbi ka Nukën 'Ibu Diosan 'ë kakëxa: Asabi ka usaika 'ën anë ñui 'ën kakëxmabi, an bana ñuikë unikama këmëi kia. 'Ën kana usakian ñu 'anun a unikama kaiskëma 'ain, 'imainun kana uisa banabi kakëma 'ain. Akamax ka 'ën usakin anun namákësokin ismikëxumabi këmëkinshi 'anan atúnbi usakin 'ati sinanx kikë 'ikën. Ësai ka ënë ñukama ñui an bana ñuikë unikamax kia.
15 Usa 'ain kana 'ëx Dios 'aish, an bana ñuikë unikama 'ën anë ñuiti xukëmaxia atúnbi sinánbiani kuanx 'akanantisa 'aíma 'inuxun 'aia kianan, numiribisa ënë menu 'aíma 'inuxun 'aia kiax kikë, an bana ñuikë unikama ax ka ami nishkë unikaman 'akëx 'ianan numin këñuti 'ikë kin.
16 'Imainun ka unikama an atun bana kuakin atu nuikë akamaxribi ami nishkë unikaman 'akëx ñuti 'ikën, 'imainun atún xanukama 'ianan atun bakë bëchikë bëbukama 'imainun 'ini bëchikë xanukamaribi ka numin bamati 'ikën. Usa 'ain ka aminishkë unikaman 'akëx uni ñukë Jerusalén ëma anun niti baikama anubi an maínti uni 'aíma 'ain uni ñukë rakati 'ikën. Usakin kana atun ñu 'atima 'ai 'uchakë kupí 'ati 'ain.
17 Usa 'ain kamina ënë bana ñuikin unikama kati 'ain:
Nëtë 'imainun 'imë́bi kana 'ëx ënimaira bëunan mëskuti masánuituti,
'ën kaískë unikamax ka 'ain 'atima ñuira 'akë
anunbi 'ain nami tëakësa 'inun 'atimaxa.
18 'Imainun kana ninu kuankin,
anuaribi 'akanania anuax uni ñuia isanan;
ëmanu atsínkin anuaribi a piti
'aíma 'ain numin bamaia uni isin.
Usaia 'ikankëbë ka an Dios kikë bana ñuikë unikama 'imainun sacerdotekamax an 'unánkëma
bëtsi ëmakamanu kuani añu kara 'ati 'ikë kixun 'unánimabi nitsia.
Dios kikë bana ñuikë Jeremíasnën uisai kara Israel unikama 'iti 'ikë kixun abë banakin ka
19 'Ën 'Ibu Dios, ¿min kaina Judá menu 'ikë unikama asérabi ashikin ëan?
¿Min kaina ami atsanxun Jerusalén ëmanu tsókë unikama ëan?
¿Uisa kupín kaina anun romëti 'aíma 'aínbi 'aisamairai 'atimanun 'imian?
Nun kananuna nux upiti tsóti a kainkin,
'aínbi ka añu upibi nunu 'ikëma 'ikën.
Nun kananuna uisabi 'insinima tsótishi sinánkën,
'aínbi ka anun rakuë́tisa ñuishi 'ia.
20 Nukën 'Ibu Dios nun kananuna 'atima ñu
'akë 'imainun nun chaitiokëkamaxa mimi 'ucha akamaribi 'unanin;
usa 'ain kananuna nukamax mimi 'uchan.
21 ¡Min anë axa rabikë 'inun kamina nu timakësa otima 'ain,
'ianan kamina anua min kushi 'ikë
xubu 'upiokin 'akë anuxun 'apun bana ñuia kuakë a timakësa otima 'ain!
¡'Ianan kamina nubëtan mi nëtë́timokin ñu 'a a sinánkin,
ñankáishisa 'inun 'imitima 'ain!
22 ¿Anu kara 'iti 'ikë unínbia a rabinuxun 'akë
dios an 'uí 'ibúmiti 'iti 'it?
¿'Ianan kara naíkamë 'ëo abi 'uí kushiira 'ibúnun 'imiti 'ik?
¡Usama ka, Nukën 'Ibu Dios!
Mix kamina an 'uí 'ibúnun 'imikë a 'ain.
Mix kamina an kamabi ënë ñukama usaía 'inun 'imikë a 'ain;
¡usa 'ain kananuna mimishi katamëti 'ain!