Uvas tuañuma nikë usaribi ka Judá 'ikë kixun ñuikë bana
5
'Ëx kana 'ën 'unairakë uni an ësai kantanun kakë a sinani kantain,'ianan kana aín uvas 'apákë a ñuiribi kantati 'ain.
'Ën 'unánkë uni ax ka uvas 'apákëñu 'iakëxa,
ax ka achúshi me anu upiti ñu koókë anu 'iakëxa.
2 'Anan ka meribi anu 'apáti buinakin anu 'ikë maxákamaribi timëkin bukuntankëxun,
anu ñu bëru upíbu kamaishi 'apákëxa.
'Atankëxun ka ñu bëru 'apákë a nëbëtsi achúshi torre chaiorukin 'anan,
anuxun uvas 'apákë aín baka biti aribi mëníokëxa.
'Ën 'unánkë unin ka an 'apákë uvaskama bataira 'itánun tuati kaíankëxa,
'aínbi ka uvas 'apákëkama an aín bimi kacha 'inun tuakëxa.
3 Usa 'ain ka Jerusalénnu 'ikë 'imainun Judánu 'ikë unikama bërí kiti 'ikën,
uix kara 'uchaxa, 'ën 'apákë uvaskama 'ianan karana 'ëx 'ucha kiax kiti 'ikën.
4 ¿Añu ñuribi karana 'ën 'apákë uvaskama 'ati 'ain?
¿Anu kara usakin 'aisa 'ikëbi 'ën 'akëma 'ik?
'Ën kana 'apákë uvaskama bataira 'itánun bimiti kainkë 'ian,
¿Uisa kupín kara uvas kaman kacha 'itánun tuax?
5 Asábi ka usa 'ain kana uisakin 'ën uvas 'apákëkama
'ati karana, bërí sinani a mitsu kati 'ain:
bërí kana anun bëarakin i muxañukama 'apákë a anun atsínxun vacan 'atima otanun biti 'ain;
bianan kana anun kënëara maxá 'akëkama aribi anun atsínxun vacan 'aisama okin amátanun amanu amanu kinioti 'ain;
6 usokin 'axun kana rakanti 'ain.
Rakanxun kana chuku 'iruiabi mëníokin ëchimitima 'ain,
usokëx ka muxa 'irumainun chuku 'aisamaribi anu 'iruti 'ikën.
Usokin 'atankëxun kana nëtë kuínuaxa,
'uí a chabói 'ibúnun 'imitima 'ain.
7 Nukën 'Ibu Dios kamabi kushiñuira an ka aín 'apákë uvas 'itsaira kuëënia,
usaribi ka Israel menua 'ikë a 'imainun,
Judá ëmanua bukukë unikama atux 'ikën.
Usa 'ain ka Nukën 'Ibun anu tsókë unikama upíokin ñu 'aiama aín bana kikësabiokin 'ati kaíankëxa,
usa 'ain ka unikama bëtsi unikamabë 'atima onani; 'upiokin ñu 'aínmabi; 'itsaira paë tani sharatia kuati 'ikën.