Diosan namámikësokin usaía 'iti ñuikin Isaías ka bana
6
A baritian 'apu Ozías ñukë anun kana Dios anua tsókë manainra anuxunbia; aín chupa kuëxitan anun anuxun a rabiti xubu a mapukë isan.2 Isanan kana unisa akamaxa tsi rëkirukë kamasa 'aish a manámi tsókë isan. Usa 'aish ka achúshi achúshinëx mapai achúshi 'imainun achúshi pëchiñu 'iaxa. Usa 'aish ka rabë́ pëchin bëmápuküanan, rabëtan aín chixumixun aín nami mapuanan ka rabëtanribi nuanxa.
3 Usai 'ika bëtsibë bëtsibë kánani ësai kiaxa:
“Nukën 'Ibu kamabi kushiñu ax ka upíira upí, upíira upí 'ikën;
kamabi an menu unio ñukaman ka ax ka kushiira 'ikë kixun 'unania.”
4 Ësai kikin rabikëbë ka anuxun a rabiti xubu 'ain xëpútikama shaíkimainun, ka tsin kuinsa axribi anu 'ibúkin a xubu mapuruaxa.
5 Usakin 'aia iskin sinani kana ësai kian: “¡Uisai karana 'iti 'ain, bërí sapi kana bamati 'ain! 'Ënbi kana 'apu 'aish kamabi kushiñu Dios a isan; 'ëx kana achúshi uni 'ën kuëbitan 'atimati banakë 'imainun, kana achúshi ëma 'atimati banakë unikama nëbëtsi tsotin.”
6 Usai 'ëx kikëbëbi ka unikama achúshi tsi rëkirukësa 'aish 'ëmi kikuatsini nuankuatsini uaxa. Ukin ka xëta rabë́ okin 'akë anun tsi ëxku ënxaira achúshi anuxun ñuina xaroti 'akë anua bitsínkin bëaxa,
7 bëkin ka anun kuëtíkakin 'ë kaxa:
“Ka kuat, tsi ëxku ënxaira ënën kana mi kuëtikan.
Usa 'ain kamina bërí min ñu 'atima 'akë kupí 'uchokëma 'ain,
usa 'aish kamina min ñu 'atima 'ai 'uchakëkama bërí mëníokë 'ain.”
8 Ësai kia kuatankëxun kana Dios ësai kikë aín banaribi kuan:
“¿Uinu 'ikë uni karana xuti 'ain?
¿Uix kara nukamax kikë bana uni ñuixunkë 'iti 'ik?”
Kia kana 'ën kan:
“Ënu kana 'ëx 'ain 'ë kamina xuti 'ain.”
9 Ësokin kakëxun ka an 'ë kaxa:
“Anu kuanxun kamina ëmanu 'ikë unikama ësokin kai kuanti 'ain:
'Itsokin ñuixunkëxun kuakinbi ka 'ën bana uisai ki kara kia kixun 'unánkantima 'ikën;
'ianan ka 'itsokin 'ën ñu 'aia iskinbi, uisakin 'akin karana usakin 'ai kixun 'unánkantima 'ikën.
10 Ënë unikama kamina upíokin sinánxuma 'anun 'imiti 'ain;
'imianan kamina atun pabitan kuakinbia aín pabí xëpúkësa 'ixuan kuakasmanun 'imiti 'ain; 'imianan kamina iskinbia aín bëru bëpankësa 'ixun iskasmanun 'imiti 'ain.
Usa 'ixun ka kuatima 'ianan istimabi 'ikën,
usai 'ikin ka atun 'ën bana kuatíbi 'ëmi sinanatima 'ikën,
'ën atun 'akë 'uchakama mëníoxunun.”
11 Ësokin kakëxun kana 'ën ñukákën:
“¿'Ën 'Ibu uiti bari 'imi kara ënë ñukama min bana kikësai 'inux basiti 'ik?”
Kixun kakëxun ka Diosan 'ë kakëxa:
“Ënëx ka ëmakama masókin 'atima okëbëa
anu 'ikë unikamax uniñuma 'ianan;
atun xubukamaxribi uniñuma 'imainun,
anu ñu 'apákë me kamaxribi anu uni 'ikëma mesa bërutamainun anu sënën 'iti 'ikën,
12 'imainun ka anu 'ikë unikama Diosan axa ami nishkë unikaman,
ñatanbiankin buánkëbë ñankáishi anu 'ikë me 'imiti 'ikën.
13 'Ianan ka cien uni buankëbëa mapai rabë́ uni bërúkë akamaxribi këñúkë 'iti 'ikën,
usakin 'akëx ka i unin bëríbi tëakëx 'ikësai 'ain buru ishi bërúkë usairibi 'iti 'ikën”
('aínbi ka aín mo bërúkë axa upíira 'inun kotëkënkë, usaribiti anuax an kuëënkësa okían 'ati unikama mëratëkënti 'ikën).