Bana ñuixuntabakin Judánu 'ikë 'apu Ahaz kakë Isaíasnën Sirianu 'ikë unikaman ka Jerusalén ema 'ati 'ikë kixun ká bana
7
Sirianu 'ikë 'apu Resín kakë 'imainun ka Israelkaman 'apu Pécah Remalíasnën bakë bëchikë a rabëxun ka 'ain suntárukamabë kuanxun Jerusalén 'aisa tankëxa, 'aínbi ka atun 'aisama okëxa. Ax ka 'iakëxa Ahaz Jotamnën bakë bëchikë 'ianan Ozíasnën baba axa Judá ëmanu 'apu 'ain.2 Usai 'ikëbëtan ka a nëtë kaman 'apu Ahaz 'imainun aín aintsikama 'unánun ënë bana ñuixuni kuankëxa: Kuanxun ka siria unikamabë ka Efraínën rëbúnkikama mitsu 'anux birananxa kixun kakëxa. Ësakian kakëxun kuati ka 'apu Ahaz 'imainun anua 'ikë unikama rakuëntan bamai bërëkirui nikama suñun bëkakëx 'ikësaribiti bërëi 'ikankëxa.
3 Usa 'ain ka Nukën 'Ibun Isaías kakëxa: “Min bakë bëchikë Sear-iasub abë kuanx kamina 'apu Ahaz anua 'umpax buchukë aín sënë́nkë anuax abë mëranani kuanti 'ain, ax ka anun naënu kuanti bai 'ipitiu anuxua axa tëkë unikaman ami mëchukatankëx mëtërëmëti chupakama bëntankë kakë anu 'iti 'ikën, 4 kuanxun kamina anua kai kuanti 'ain:
'Ën mi kakëx kamina bërúankati 'ain, 'aínbi kamina ratutima 'ain;
'ianan kamina ami rakuë́ti ñusma kantima 'ain
a 'apu rabë́ ax ka tsi bimikëxa aín kuin tëxëkirui ënxakë usaribi 'ikën, 'itankëx nëtë́kë usaíshi ka Resín aín suntáru siriokamabë,
'ianan Remalíasnën bëchikë akamax tsi ërë́rukësaribi 'itánun nishaxa.
5 Sirio unikamax ka Efraínën rëbúnki 'imainun
Remalíasnën, bëchikë achúshi abëmi
'aisama oti sinani kananxa. Kánani ka ësai kiaxa:
6 Nun kananuna Judánu 'ikë unikama rakuë́nun:
'imitankëxun atun ëma 'ibuati 'ain,
usakin 'atankëxun kananuna Tabeelnën bakë bëchikë a 'apu 'inun 'imiti 'ain.
7 'Aínbi ka Dios ësai kiaxa:
¡Atun sinánkësa okin ka uínsaranbi atun ñu 'atima 'ikën!
8 Axa mitsumi nishkë unikama ax isa kushiira 'ikë kixunmi mitsun, sinánkë ax ka usama 'ikën, Damasco ëma ax ka chaiira ëma Asiria menu 'ikën,
usa 'ain ka Resín ax Damasco ëma anu 'apu 'ikën;
'imainun ka Samaria axribi ëma chaiira Efraín menu 'ikën,
usa 'ain ka Remalíasnën bakë bëchikë ax Samaria ëmanu 'apu 'ikën; 'aínbi ka sesenta 'imainun cinco baritia 'ikëbë Efraínën ëma ax nëtë́ti 'ikën;
9 mitsúxribi 'ëmi katamëtima kamina, atux 'ikësaribiti ëmañuma bërúkanti 'ain.”
Isaíasnën Emanuel kakë tuá ka bakënti 'ikë kixun 'apu Ahaz ka bana
10 Ësakinribi ka Diosan 'apu Ahaz kakëxa:
11 “'Ë kamina min Dios 'ikë achúshi ñu min iskëma 'anun ñukákin kati 'ain, ax ka ësai 'iti 'ikën, meu 'ianan a 'ukë mëu 'imaka me manámi 'iti 'ikën, 'ima ka a manámi 'ianan a manánmira 'iti 'ikën.”
12 Kakëxun ka Ahaznën kakëxa: “Usama ka 'ën kana Dios 'ë kamina achúshi ñu 'axunti 'ai tankin kaima.”
13 Ësai kia ka Isaíasnën kakëxa:
“Ësokin mitsu kamainun kamina 'apu Davidtan rëbúnkikama mitsun kuati 'ain:
¿Mitsun iskëx kara unikama anribia, 'ën Dios ubioisa tankë akamaribi ubioti asábi it?
14 Diosan ka unibë 'ikintankëma xanu:
Xuntaku achúshi tuuñu 'inun 'imiti 'ikën, 'imikëx bakëntankëxun ka Emanuel kakin anëti 'ikën. Emanuel kikë ax ka, ‘Dios ka nubë 'ikë ki kikë 'ikën’.
15 Anua bakëntankëx kanikë a baritiakaman ka a tuákën vaca xuma sëruakin 'akë 'imainun buna rëpa akama piti 'ikën.
16 'Aínbi ka tuá ax kanikian añu kara 'ati 'ikë añu kara 'atima 'ikë kiax sinanákëma 'aínshi,
an mitsu rakuëmikë ëmanu 'ikë 'apu rabë́ ax
masókin 'akëbë ñankáishi bërúti 'ikën.
17 Usai 'ikëbëtan ka Diosan mitsu 'ianan, min unikama 'imainun,
'apun aintsikamaxa Efraínbëa Judá ënanainsamapain 'ain 'iásamaira 'inun,
a nëtëkama 'ikëbë tëmëranun 'imiti 'ikën.”
(Ënëx ka Asirianu 'ikë 'apu ukëbë usai 'iti ñuia kia bana 'ikën.)
18 A nëtëkama 'ikëbëtan ka Diosan samún 'itsa iskësaira kuatsinia 'ura 'ikë Egipto menua 'ikë baka,
anuaxa suntárukama unun 'imianan,
Asiria suntárukamaribi buña ukësa kuatsini unun 'imiti 'ikën.
19 Kamabi unikama atux ka rikuatsintankëx
aín bashinua me nankë́kë anua raíri 'imainun
bashinua 'ikë mapara kini anuribia
'imainun muxañu me anuribi 'imainun
anuxua vacan 'umpax 'akë anuribi 'iti 'ikën.
20 A nëtën ka Diosan Asirianu 'ikë 'apu 'imainun aín suntárukama,
Éufrates baka a 'uri 'ikë anuaxbi uxuan, Israelkama mitsu ñatanbiankë unikama akësokin,
ñu kënshún maxkukin mitsun kuëni 'uruanan mitsun nami mëu 'ikë akamaribi 'urunun 'amiti 'ikën.
21 A nëtëkaman ka an achúshi vaca 'arakakë 'imainun rabë́ oveja 'arakakëñu,
22 ax aín ñuina xuma 'aisamairañu sëruakin 'akë a pitiñu 'iti 'ikën. Usa 'ain ka Asiria unikaman 'akin tëokë 'akëmakaman atun vaca xuma sëruakin 'akë a 'imainun buna rëpa a piti 'ikën.
23 A nëtë́an a menu naëoxun mil uvas i 'apákë ax ka mil kuríki manë 'akë aín kupí 'iakëxa, usa 'aínbi ka bërí a menu muxaishi 'imainun 'aisama me 'iti 'ikën. 24 Usa 'ain ka a menu uni aín kanti 'imainun aín piakama buani ñu 'oíshi anu kuanti 'ikën, a mexa muxa 'irui ni tubënrukë 'ain. 25 Usa 'ain ka bëráma manë pará anun mëníokë mekama axa tubënrui 'aisamaira muxa 'imainun me 'atima 'ain uixi anu kuantima 'ikën. Usa 'aish ka vaca bënëkama 'imainun ovejakaman anua pasto pitishi 'iti 'ikën.