Isaíasnën bakë bëchikënën anëx ka usai ka Judá 'inxun 'aia kixun ñuikë 'iakëxa
8
Bëtsi nëtën ka Nukën 'Ibun 'ë kaxa: “Cha 'itánun parókin tukakë i bitankëxun kamina anu kuënëoti 'ain, kamabi unían a bana istisabi okin kamina: Maher-salal-hasbaz kitánun kuënëoti 'ain. (Maher-salal-hasbaz kikë ënë banax ka ënuax basikëma 'aínshi ka 'atimonan këñukë 'iti 'ikë ki kikë 'ikën.) 2 Usa 'ain kamina sacerdote Urías 'imainun Zacarías Jeberequías 'ain bakë bëchikë ax ka ami rarámakin ñu 'aisa 'ikën, usa 'ain min kuënëokë ënë bana an ñuixunun biti 'ain.”3 Usakin 'ë kakë a inúkë 'ain kana an bana ñuikë 'ën xanu ain pëi machakë sënë́nkë 'ain, abë 'ian ka tutankëx aín 'uxë 'ikëbë bakëankëxa. Usai 'ikëbëtan ka Diosan 'ë kaxa: “Min bakë bëchikë bakënkë akamina Maher-salal-hasbaz kakin anëti 'ain. 4 Usa 'ain ka min bëchikë axa papa kianan tita kikin 'unánkëma 'aínshi Damasco 'imainun Samaria ëma masókin, 'atankëxun anua 'ikë ñukama 'ain upíbuira akama Asirianu 'ikë 'apun atu 'atankëxun 'ain menu buánti 'ikën.” 5 Ësokin katankëxun ka amiribishi Diosan 'ë katëkëanxa:
6 “Judá menu 'ikë unikamax ka Resín 'imainun Remalíasnën bëchikë ami rakuë́tia,
usa 'ain ka aín suntárukamabëtan Judá 'akatsia,
'aínbi ka Judánu 'ikë unikaman Dios,
Siloé kakë baka pakaxkima rakákë usaribi 'ikëbi kuëënima,
7 usa 'ain kana 'ën munu 'akinma Éufrates baka 'ëi
paparukin bënë́kinshi mapurukë, usaribi okin 'ati 'ain,
(ax ka usaribiokian Asirianu 'ikë 'apun 'ain suntárukamabëtan 'ati 'ikën).
Usokin 'ai ka tanpëtia 'umpax amami amamitan
chikíkë usaribiti atux 'ikanti 'ikën,
8 usai 'ikin ka Judá ëma anubi sënë́nkin
'umpaxan mapukësa 'itánun asirio suntárukaman 'ati 'ikën.
'Akin ka ñuina pëchiñunëa pëókikin aín pëchin mapukësa okin maputi 'ikën, usakin ka
anua Diosan kaískë unikama bukukë me a 'ati 'ikën,
'aínbi ka Dios nubë 'iti 'ikën.”
9 Usa 'ain ka kamabi menu 'ikë unikama timëaxi 'itsaira rakuë́ti 'ikën;
'imainun ka axa 'uraira menu bukukë unikamanribi ënë kuati 'ikën:
kuati ka 'akananshisa 'inun atun ñu bitsi mëníokakë 'aishi rakuë́kanti 'ikën;
'ianan ka anun 'akánanti mëtikiruaxi rakuë́kanti 'ikën.
10 'Ianan ka usakin kananuna ñu 'ati 'ai kixun atun sinaniabi,
usakian 'anun 'amitima 'ikën,
Dios ax ka nubë 'ikë usa 'ixun.
Dios ax ka amiiranu nux rakuë́ti 'a 'ikën
11 Diosan ka ax kushiira 'ixun 'ain mëkënan tuinkin bikësokin bixun, ënë unikama 'ikësai kamina 'itima 'ai kixun 'ë kakëxa: 12 “Usa 'ain kamina mitsun unëxun ënë ëmanu tsókë unikaman sinánkë bana ñui bëtsi unikama kikë a usa ka kixun sinántima 'ain. 'Ianan kamina atux ami rakuë́kë ñukama ami rakuë́ti ratutima 'ain. 13 Dios kamabi kushiñuira a kananuna ax ka upíira 'ikë kixun kati 'ain; kai kananuna ami kuni rakuë́ti 'ain; usa 'ain kananuna an nu iskëx ami rakuë́ti 'ain. 14 Ax ka mitsunan achúshi ñu ami 'ia ñu biti nankë usa 'iti 'ikën; 'ianan ka maxá ami tatíkia uni chakákë usaribi 'iti 'ikën, usa 'ain ka ami Israel ñaká rabë́ ax 'iti 'ikën; usai ka ami 'ia ñu biti nankë usaribi ax 'ain ami Jerusalénnu tsókë unikamax 'iti 'ikën. 15 Usa 'ain ka 'itsaira uni tuaxki 'ikësai pakëti bamamainunbi, 'aisamaira uni ami ñuina 'iti nankë ami 'ikësa 'inun ñatankë 'inuxun 'aia.”
Isaíasnën an 'unánmikë unikama usai 'iama 'inun kixun 'ësëkin ká bana
16 'Ën mi kakë bana ënë kamina upíokin sinánti 'ain;
sinánkin kamina 'ën mi usakinmi anun 'unánmikë 'ianan 'ën mi 'unánmikë ënëkama manutima 'ain.
17 Nukën 'Ibu Dios an aín unikama Jacobnuaxa mërá,
atu 'akinsama tankëbëbi kana 'ëx ënima ami katamëtin.
'Ën kana an 'akintishi kainin.
18 'Ë 'imainun 'ën bëchikëkama Nukën 'Ibu
Diosan 'ë 'inánkë a kamabë kana unin 'unánun
unitsin 'akëma ñusa Israel unikamanan 'ain,
Nukën 'Ibu Dios kamabi kushiñuira axa aín bashi Siónnu 'ikë an nankë kananuna nux 'ain.
19 Usa 'ain ka unikaman mitsu káshibuinxun ësakin kati 'ikën:
“Mitsux kamina uni ñukëkama aín ñunshinbë banati 'ain,
'ianan ka axa usai ka ñu 'iti 'ikë kixun 'unánkë akamabëribi munura banati 'ain.
¿Achúshi ëmanu 'ikë unikaman kara atun dioskamabë,
bananan uni bamakëkama a kara uisakin
20 kati 'ikë kixun ñukáti 'it?”
Ësai ka atux sinanimaishi banati 'ikën,
'aínbi ka axa këmëishi kikë 'ikën.
21 Usa 'ain ka an usakin mitsu kakë uni ax anua 'ikë anuishi 'ima,
amanu amanu bëtsi bëtsi okin,
tëmëramikëx numin 'ikë anunbi 'itsaira nishti 'ikën.
Usai 'ikin ka aín 'apu 'imainun aín dioskama 'atimakin sinánxunti 'ikën.
Usai 'ikin ka manámia isbëkikin isanan,
22 mëuküaribi isbëkinkin iskanti 'ikën,
usakin iskinbi ka añu ñubi 'aíma 'ikë isanan,
tëmërati ashi 'ain bë́anbëankibukënu 'ikësa isti 'ikën.
Usa 'aish ka kamabi imë́nu 'ikësashi 'iti 'ikën,
usa 'ain ka bëtsían tëmëramikë uni ax uinubi kuani abátima 'ikën.