Diosan kaiskë 'aísh ënë menu bakënti uni ñuikë bana
9
Diosan ka 'atabakin an kuëënkësa oia 'inun Galilea 'imiakëxa, anu ka Zabulón 'imainun Neftalí kakë uni aín me 'iakëxa, ax ka an Diosan bana kuakëma a rapasu 'ikë unikaman me anuaxi Jordán kakë baka 'ikë 'ukëmanan, anuaxi kuanx parúmpapa kuëbí anubi sënë́nkë 'iakëxa; 'aínbi ka nuibakin 'itsaira 'akiankëxa.2 Axa ami nishkë unikaman 'atimokëxa bëánkibukënu 'ikësa 'ia unikama an
ka achúshi tirí chaiira isakëxa, iskin ka ñu upí 'ati 'unánkëxa;
achúshi tirí pëkikësa 'aish upiti tsókë uni an ka
axa 'atimati tsókë unikama ñu upí 'ai upiti tsóti 'unánmiakëxa.
3 Dios min kamina chaiira kuëënun nu 'imin;
usa 'ain ka anun nux kuëënti ax chaiira 'ikën. Kamabi unix ka min ismainunbi kuëëni anun ñu
'apáxun biti nëtë 'ikëbëtan aín ñu 'apákë bitankëx bëtsibë 'inánani kuëënkë usaribi 'ikën,
'ianan ka 'akanankin aín 'ibu 'axun ñu bitankëx bëtsibë 'inani kuëënkë usaribi 'iti 'ikën.
4 Min kamina tëmëramikin ñu mëëmikëx
atsankin bëtsi sinaniabi 'apukamanua,
tëmërakin ñu mëxuma 'anun nu chikiankën.
Usabi okin kamina mix Dios 'ixun Madiánu 'ikë unikamami 'asaribiokin nukama 'akën.
5 Min kamina 'akanani kuankian suntárukaman
aín taxaka pañubiankin anun me banamibiankë a
'imainun aín chupa 'akanankian imin shikë a kamabi tsin në́nkin xaronun 'amiti 'ain.
6 Usa 'ain ka nunu achúshi tuá bakënun 'imiaxa,
Diosan ka nukama achúshi tuá 'inánxa, a tuá ka axa 'apu 'itiokin aín kushi 'inánkë 'iti 'ikën.
Usa 'ikë ka ësokin kakë 'iti 'ikën:
“An bana ñuixunkin 'ësëkëxun kuati upitani kuëënti,” “Dios uínbi kanantisama,”
“Nukën papa Dios axa këñutima oi tsókë,” “Achúshi 'apun rëkuë́n bëchikë chuámarua 'inun uni 'akinux bakë́an.”
7 Ax ka anua David tsóa anubi tsóti 'ikën;
usa 'ikë ka ax kushiira 'ixuan ñu 'aia kamabi menuxun kuati 'ikën
'imainun ka chuámarua uni tsóti ax këñutima 'ikën;
usa 'ixun ka uínsaranbi axa 'apu 'ia ax ënkëma anubi 'iti 'ikën,
usa 'ain ka an 'akë ñukama ax upíokin 'akë 'ianan,
an bërí pëukin ñu 'akë ax uínsaranbi nëtë́tima usabi 'iti 'ikën.
Ësokin ka Dios kamabi kushiñuira an 'itsaira unikama nuibakin 'ati 'ikën.