Jesénën rëbúnkinuax ka an uni upiti bukunun 'akinti 'uti 'ikë kixun ñuikë bana
11
Ësai ka Dios kiakëxa, Jesénën rëbúnki achúshinuax ka i mo kótëkëni kanikë usaribi 'itánun achúshi uni mërati 'ikën, usa 'i ka aín tapunuaxi kookësa 'i mërati ka ax 'apu 'iti 'ikën.2 Usa 'ain ka Diosan kushi ax ënima a unibëbi 'iti 'ikën,
an ka ñu 'unánkëira 'ianan sinánñuira 'inun 'imianan,
usa ka kixun bëtsi 'ësëanan ñu 'aisatankinbi tënëi kushiñu 'ianan,
Diosmi uisa ñukama kara 'atima 'ikë kixun, 'unáni rakuënun unikama 'unánmiti 'ikën.
3 An ka ñu iskinshi uisa kara oti 'ikë kixun aín kuëënkësa okinshi 'anan,
ax ka usai 'iaxa, kixun unin ñuikë bana a kuakinshi usa ka 'iti 'ikë kixun katima 'ikën.
4 An ka an 'akinti 'aíma 'aia tëmërakë unikama
'imainun uni ñuñumakama atun menu 'ikë akama 'akinti 'ikën.
Usa 'ain ka aín banax achúshi tatsi tuínxun anun bënë́kinshi ñu 'akë unikama tëmëramikë usaribi 'iti 'ikën,
'imainun ka aín kuëbitan xunkakësa okinshi 'atima ñuishi 'akë unikama këñunun 'imiti 'ikën.
5 Ax ka unían ënkinma aín chupa pañukësa usaribi okin upíokin ñu 'ai asérabi banati 'ikën.
6 Usa 'ain ka shórapana 'imainun ovejakama ax upitax bukuti 'ikën,
usai 'imainun ka 'inu 'imainun cabra tuá akamax bëtsibëbi tantiti 'ikën,
'imainun ka vaca bakë bërí kanikë 'imainun paru 'inúan axribi bëtsi rapasu nitsi kaniti 'ikën,
usai 'i ka tuá xuratsukun buánkëx kuanshiti 'ikën.
7 'Imainun ka vaca xanu 'ianan, xaëón aín xanu axribi 'unánankë 'iti 'ikën,
'imainun ka aín tuákama axribi bëtsibë timë́ax tanti bukuti 'ikën.
Paru 'inuánën ka vacan 'akësaribi okin pasto piti 'ikën.
8 Achúshi tuakëx ka runu nëëira menu 'ikë abë kuaiti 'ikën,
usai 'ikin ka runu aín paë mukaira 'ain nánu 'ain mëkën atsímiti 'ikën.
9 Kamabi 'ën bashi upíira anu ka:
an uinu 'ikë unibi 'atima oti 'aíma 'iti 'ikën,
usa 'ain ka parúmpapanua 'umpax buákirukësa usai 'ia kamabi unin usakia Diosan 'a ñukama kuati 'ikën, kiax ka kiakëxa.