Samaria ëmanu tsókë Israel unikama 'iti ñuikë bana
28
¡Uisai kara Samarianu 'ikë unikama bëtsi unikaman, atux isa upí uni 'ikë kixun kakëaxa ëma chaiira Efraín kakin anëkë anu tsókë paë́ntinën kuëëirabu uni atux 'iti 'ikën;
'aínbi ka Samaria ëma ax me sapan upíira anu 'ikën,
usa 'aish ka ñu ua buinarakin mañutinu 'akëxbia bënëtishi núkai chushikë usa 'ikën,
usa 'ixun ka anu 'ikë unikaman paë bata 'axun xëai paë́nkë a ënima!
2 Ësokin mitsu kamainun kamina kuati 'ain: Nun 'Ibun kaískë achúshi uni kushiira ka anu 'ikën,
ax ka matsi bëruñunëxa masákuatsinkë usaribi 'ikën, 'ianan ka
nëtë masákuatsinkëbë ukian suñuanën ñu masókë usaribi 'ianan,
nëtë́timaira uñe 'ibúkian me mapukë usaribi 'iti 'ikën.
Usa 'ixun ka 'ain mëkënan menu nipakëisokin 'anan,
3 'ain taëkaman chakánan,
axa rabiakati nux kananuna usa 'ai kiax ñu paë xëatankëx kikë a ëmanu tsókë,
Efraínën rëbúnkikama a 'ati 'ikën.
4 Usakin 'akëx ka a ëmanua 'ikë unikama anuaxa ñu upiti tuákë menu 'ikësa 'ianan,
ro ua upíira 'inun 'apákëxia núkakësa usai 'itánun 'anan,
higo ax pain bimiax pëkë́kë unin mërakin mëkënan bixun:
bënë́kinshi pikë usaribi okinshi 'ati 'ikën.
5 A nëtë 'ikëbë ka Nun 'Ibu kamabi kushiñuira ax,
achúshi mañuti ichúkësamaira 'ianan,
achúshi ñu 'upiokin 'akë usaribi axa tsókë aín unikama ainan 'iti 'ikën,
6 usa 'ain ka Diosan an bana mëníokë 'apukaman,
anuxun bana mëníokë anuxun asérabi 'upiokin 'akian suntárukaman,
'ain ëma bërúanun atun bana mëníokë anuxun kati 'ikën.
Jerusalénnu 'ikë unikama 'ati kianan usokin ñu 'axunkatsi kia bana
7 'Imainun ka raíri unikamaxribi uvas baka vino 'akë xëatankëx amá aman kuani nitsia,
'imainun ka sacerdote unikama 'ianan an Dios kikë bana ñuikë unikama atúxribi paë bata kushi a xëatankëx amá aman kuani nitsi kushiñumasa 'aish sinanima 'atimati banaia;
'ianan ka namákësokian Diosan ismikëxbi amá aman kuani nikësai 'ia,
'ianan ka paën irakë 'ixun uisakin kara bana mëníoti 'ikë kixunbi 'unanima.
8 Usakia anuxun xëakë mesa ax ka ami kinankë 'aish, a isi kuínsakë chuaira 'ikën,
usa 'ain ka anuxua usakin 'akankë anu achúshi ñu chuáñumama 'aíma 'ikën.
9 'Ianan ka 'ëmi kuai ësai kikania:
“¡Nukama bana 'unami ka uti 'ikën,
'imainun ka uisakin kara Diosan ismiaxa aribi nukama 'unamiti 'ikën!
¡Nuxnu tuá xu bërí kanikënën,
10 kirika 'ati 'unánkin ba, be, bi, bo, bu kakin 'unánkësaribi okin!”
11 Asabi ka mitsunmi bana kuaisama tania,
ka Diosan bëtsi banan banakin kuaisama 'itánun ënë unikama kati 'ikën.
12 Ësai ka bërámabi ax kiakëxa:
“Ënu ka anu upiti tsóti 'ikën,
ënëx ka anu upiti tantiti 'ikën;
uix kara atsanxa ax ka tantiti 'ikën.”
'Aínbi ka ax kikësokin 'ën bana kuakama 'ikën.
13 Usa 'ain ka Nukën 'Ibun tuá xurakama bërí
kirika 'ati 'unánkë kakësokin kati 'ikën.
Usai 'ika bërí niti 'unani tuáxura kuaníbi kaxutan pakëkësa usaribi,
'ianan anun ñu biti nankë anu pakëtia ñu bikësa usaribi 'iti 'ikën,
usai 'ika anuax chikítima 'ikën.
14 Mitsux 'apu 'ixun kamina Nun Ibu bana kuati 'ain,
bana kuakëma unibu,
mitsux kamina Jerusalénnu 'ikë unikaman 'apu 'ain.
15 Mitsux kamina ësai kin:
“Nukamax kananuna bamati abë achúshi ñu 'ai mënion,
usa 'ain kananuna uisa ñu kara 'ikëbëbi bamatima 'ain.
Usai 'ia ka ñu 'aisama 'inúkë anbi nu 'aisama otima 'ikën,
nun kananuna këmëkë an nu 'akinun kixun barian,
'imainun kananuna bëtsi paránkë anribia nu bërúanun kixun baria.”
16 Usa 'ain ka ësai Nun 'Ibu kiaxa:
'Ën kana Sión kakë ëmanu achúi maxax nanti 'ain,
ax ka achúshi maxax kupíirakë 'ikën,
ax ka achúshi maxax ami birukin xubu 'ati nankë usaribi 'iti 'ikën.
Usa 'ain ka uix kara ami katamëtia ax chuámarua tsóti 'ikën.
17 'Ën kana xubu 'akënu a unían, anun xubu 'akin sënën 'itánun tupunkë manë tumua risiñu usaribi
'ën 'akë ñukama ax upí 'inun 'imiti ain, 'imainun anun xubu puntëkin mëníoti usaribi ka uin kara upí ñu 'aia ax 'iti 'ikën.
Mitsun mi këmëi banai ismina uisa ñubi 'inútima 'ai kixun sinánkë,
a ka matsin titan masókin këñuti 'ikën,
'imainun ka ami katamëtimi bukúnkë aribi bakan chinanti 'ikën.