An Egiptonu 'ikë unikaman 'akinun kixun barikë unikama ñui kikë bana
30
Ësai ka Nukën 'Ibu asérabi kiakëxa:“¡Uisai kara mitsun bakë bëchikë bëbu 'imainun 'ini xanukama atun kakëxun 'ën bana kuaisama tania,
usa 'ixun atun 'ëbë banaxunmabi ñu 'akatsi kixun atúnbi sinania,
sinánkin ka usakin kananuna ñu 'ati 'ai kixun 'ën sinánmikëxunmabi atúnbi sinánxun 'aia,
usakin 'ai ka atúxbi amiribi amiribi 'uchakania!
2 Usai 'ika bënë́kiani Egipto menu 'ikë 'apu faraón an isa bërúankin 'akinun kixun ñukati kuania,
'aínbi ka atun 'ë pain ñukátima;
an isa 'akinun kixun 'apu faraón ñukati kuania,
usai 'ika Egiptonu 'ikë unikamami atun isa 'akinun kiax ami katamëtia.
3 'Aínbi ka faraónën 'akinkë ax paránkinshia 'akë 'ikën,
usai Egiptonu 'ikë unikamami katamëtibi ka atux rabinkë bërúti 'ikën.
4 Mitsun kamina an bana ñuiti unikama Soán kakë 'imainun Hanés kakë ëmakama anu 'ikë 'apu abë banati xuan, a kamina ka Egipto menu 'ikë ëma anu an mitsu 'akinti bariti xuan,
5 'aínbi ka a menu 'ikë unikama ñu 'unánkëma 'ixun mitsu paránkë 'iti 'ikën,
usa 'ain ka mitsun bikë ñukama anbi mitsu 'akintima 'ikën,
usa 'ain ka atúan mitsu 'akinkëxbi 'akinkëmasa 'iti 'ikën, usokin 'akëx kamina paránkë bërúkanti 'ain.”
6 Bërí kana ñuinakama Négueb menu 'ikë akama ñui kin:
a mex 'atimaira 'ain ka anu
paru 'inúankama axa kuëëkë,
'imainun runukama 'ianan kapë́sa ñuina taëñu axa nuánkë akama 'ikën.
Burro 'imainun camello kaxunu puruxun ka
ñu kupíkë Egipto me anua upa unikama 'ikë anu buánti 'ikën,
7 'imainun ka a unikama ami katamëtia uni 'akinsa 'aishi 'akianainsama 'ikën.
Usa 'ikë kana ësokin anëan:
“Ñuina chaiira kuëëkinbi añu ñubi 'akëma kakin anëan.”
8 Usa 'ain ka Diosan Isaías kakëxa, bërí kamina i parókin 'akë bitankëxun,
xënibua 'aínbi a ñuitiokin ënë bana kuënëoti 'ain,
usakin 'a 'ikë ka xënibua 'aínbi unin a sinánkin ñuikanti 'ikën.
9 Ënë unikamax ka bana kuaisama tankë unibu 'ikën,
usa 'ixun ka 'ën bana kuaisama tania, usa 'ain ka 'ën 'unánmikë banakama kuaisama tani 'ëmi sinanima.
10 Usa 'ixun ka an Dios kikë bana ñuikë unikama kaia: “Namákësa okin kamina istima 'ain.”
Kanan ka an bana uni ñuixunkë unikama kaia: “Nukama kamina mitsun mi asérabi iskë ñukama ñuixuntima 'ain;
nu kamina an 'atima okin sinánmitima upí bana kati 'ain;
'ianan kamina nun 'aisa tankin sinánkë banakama nu ëmitima 'ain.
11 Mitsun 'akë ñu 'atimakama kamina ëntima 'ain kixun,
kakin kamina nun 'akë ñu 'atimakama ëni upiti tsónun nu katima 'ain,
usakin 'anan kamina Israel unikaman Dios 'upíira a ñuikin nu katima 'ain.”
12 Usa 'ain ka Israel unikaman Dios upíira ax ësai kia:
“Mitsun kamina usai 'iaxma 'inun kakë bana a kuaisama tanan,
bënë́kinshi ñu 'atima 'anan,
ñu 'atimaira 'ai ami katamëkanin;
13 usa 'ain ka ax mitsun 'uchabi 'ikën.
Ax ka anun ëma kënëarakë kënë manainra axa
tënki tënkibuti 'itankëx unin sinánkë 'aímabi rurukubukë usaribi 'ikën;
14 'ianan ka mapú 'akë ñutë axa
pakëti sarimëti,
ami chimapu bisama 'ianan anun 'umpax kininua,
bisamabi aín tukibukë usaribi 'inun masókë 'iti 'ikën.”
15 Usa 'ain ka Israelkaman 'Ibu upíira ax ësai kia:
“'Ën bana kikësokin 'atëkëni kamina mitsux uínbi ubíokëma upiti bukui ië́kë 'iti 'ain.
Usa 'ain kamina uínbi ubiokëma bukui 'ëmi katamëti kushiñu 'ikanti 'ain.”
'Aínbi kamina mitsun 'ën kakëxunbi kuëënkáma 'ain,
16 kuëënima ka kikankëxa: “Usama ka caballonu 'irukiani kananuna abáti kuanti 'ain.”
Usai 'i nukamax abákë ax ka asábi 'iti 'ikën.
'Imainun kamina ësairibi kikankën: “Ishtuinshia kuankë caballonën nirinkë anu këñurukiani kananuna abati kuanti 'ain.”
Axa numi nishkë unikaman kuni ka bënëtishi niti 'unanxun nukama nuiti 'ikën.
17 Usa 'ain ka mil uni ax achúshi unían 'akatsi kixun kakëx abáti 'ikën,
'imainun kamina kamabi mitsux mapai achúshi uni axa mitsumi nishkë an 'anuxun kakëx,
'itsamara tikitamainun abákanti 'ain,
usai 'i kamina achúshi i aín bashi rëbunu nikë usaribi 'ianan,
a istia unin 'unántiokin bashi tësapanu nitsínkë usaribi 'iti 'ain.
18 'Aínbi ka Nukën 'Ibu an upiokin ñu 'akë 'ixun mitsumi sinania, usa 'ixun ka an kamabi ñu upiokin mitsu nuibakin 'aia; an ka ax nuibanankëira 'ikë kixun mitsun 'itsaira 'unánti kuëënia, Nukën 'Ibu an ka ax xëshi Dios 'ixun ñukama upiokin 'aia. ¡Usa 'ain ka ami katamëtia 'akinti kuëënkë unikama kuëëinra kuëënti 'ikën!