Egiptonu 'ikë unikama atun 'akinun kixun an barikë unikama ñuikë bana
31
¡Uisai kara an Egiptonu 'ikë unikama 'akinun kixun bari kuankë unikama 'iti 'ikën,'imainun kara axa atuinsa aín caballo 'itsañu 'ixun 'akinun kixun sinanan,
anuaxa 'akanankë caballonën nirinkë 'itsaira anun,
'akianan isa caballonu 'iruax kuanti unainrabu
suntáru 'itsaira an isa 'akinti 'ikë kixun
Israel unikaman Dios upíira an 'akinun kixun ñukátima!
2 Usa 'aínbi ka Diosanribi parántisama 'ixun ñu 'atimaribi inúnun 'imiti 'unánxa, usa 'ixun ka ñu 'akatsikiax kana 'aima kítëkënkinma ñu 'aia.
Usa ain ax uni 'atimakama ami 'ianan,
an 'atima unikama 'akinkë akama 'atima oia.
3 Egiptonu 'ikë unikama ax ka unishi 'aish dios kamasama 'ikën;
'ianan ka atun caballokama namishi 'aish, bëru ñunshinsama 'ikën.
Usa 'ain ka Nukën 'Ibun a unikama 'ain mëkënan 'akësokin,
atu 'atimokin an bërúankë akëñunbi 'akëx bamati 'ikën;
usai 'ika a kamaxi këñukanti 'ikën.
4 Ësokin ka Nukën 'Ibun 'ë kaxa:
“Achúshi paru 'inúanëx ka oveja bixun rëtëax,
an ñuina bërúankë unikamami rakuë́tima,
'ianan ka kamaxi timë́xun, munuma kuënkëni banakinbi ratutima 'ikën,
usaribikin ka Nukën 'Ibu kamabi kushiñu ax
aín unikama Sión kakë bashi anua 'akini uti 'ikën.
5 Achúshi ñuina pëchiñunëan anua aín tuá 'ikë aín na a manámi nuani mañakin bërúankësa,
usaribi okin ka Nukën 'Ibu kamabi kushiñuira,
an aín unikama Jerusalén ëmanu 'ikë akama bërúanan, ië́mikin
ñu 'atima 'inutiabi bëruankin 'akinti 'ikën.”
6 Israel unikaman rëbúnki mitsux kamina
'atimairai banakin ñuikankë Dios ami sinanatëkënkanti 'ain.
7 Uisa nëtën kaina kamabi mitsun,
kuëënkima timakanin unínbia kuri manë uxua 'akë akama,
mitsun mëkën 'uchañu kaman 'akë,
8 anun ka Asiria ëmanu 'ikë unikama manë xëtokën 'akë 'iti 'ikën.
'Aínbi ka unin aín kushínbi 'akëma ax 'iti 'ikën.
Usa 'ain ka Asirio suntárukamax 'akanankënuax abákë 'iti 'ikën,
'imainun ka anu 'ikë uni bënákama 'akánanti 'unainrabu ax ñatanxun ñu mëëmikin tëmëramikë 'iti 'ikën;
9 usakin 'akëbëa aín 'apu rakuë́ti abákiani chikíkëbë ka
aín suntárunën kushikama axribi aín bandera rakanbiani abákanti 'ikën.
Ësai ka Nukën 'Ibun asérabi kiakëxa, mëníokëxa tsi rëkirukin pëi chushikë pikësa usakin,
Jerusalénnu 'ëx 'ixun kana anu 'ikë unikama an 'aisatankë ami nishkë unikama 'ën 'atimokin tëmëramiti 'ain.