'Apun asérabi 'akin upiokin ñu 'ati bana
32
Ësai ka Isaías kiakëxa: anu ka achúshi 'apu an upíokin ñu 'akë 'iti 'ikën,'imainun ka an bana mëníokë bëtsi 'apukama atúnribi upíokin ñu 'ati 'ikën.
2 Usa 'aish ka atu achúshi achúshinëx suñu bëki nëtë masá kuatsinkëbë ñumi katamëkë usaribi 'iti 'ikën,
'ianan ka xëxá 'umpax shióbukian me ëskikë chabóti 'akë ain baí usaribi,
'ianan anu uni 'ikëma menua mapara chaiira an tupë́onkë 'ain barin xarokëx ami katamëkë usaribi 'ikanti 'ikën.
3 An ka uisakin kara ñu 'ati 'ikë,
kixun pain 'unánkë 'iti 'ikën, 'ianan ka aín unikaman banaia bëmë́kin kuati 'ikën,
4 usa 'ain ka an kuëënkësokin ñu 'akinma,
uisa ñux kara a 'aisa upí ñu 'ikë a isanan ñu 'aisama isi kuni ka banati 'ikën.
5 Usa 'ain ka uni mënin sinan ñukakama ax bëtsi unin istisama tankëma 'ikë kixun kakëma 'iti 'ikën,
'ianan ka an rabinkima ñu 'ashikë uni axribi unin usa ka a uni 'ikë kixun kakëma 'iti 'ikën.
6 Usa 'ain ka unin 'atimati tsotia timakin istisama tankë uni ax 'atima ñu 'atishi banaia;
usai 'ikin ka ñu 'atima 'ati sinánkin
uisakin kara ñu 'atimaira 'akin a tanti bana kikësokin 'akinma bëtsi uni 'ati 'ikë
kixun baria, usai 'i ka Nukën 'Ibu ñui këmëi 'atimati banaia;
usa 'ixun ka axa 'akëñuma nikë unikama abi pananx a isi kuaniabi pimima,
'ianan ka shimakë unikama aribi xëamima.
7 'Imainun ka rabinkima an ñu 'ashikë uni an uisakin ñu 'ati kara 'unánkë 'ixun;
uisakin kara uni paránti 'ikë kixun sinánkin, 'atimakin unin ñuiti ñuishi 'aia;
'anan ka uni ñuñumakama a këmëkin ñu 'atima inúnun paránia,
'anan an ñu kuëënkin bisatankë akamaribi ñu 'upiokin 'axúnun kakëxunbi 'atima okin paránia.
8 Usa 'aínbi ka upí uni an upiokin,
sinánkin bëtsiokin sinántëkënkima an sinánkësabi okin ñu 'aia.
Diosan xanukama tëmëramixunbi 'akintëkënti ñuikë bana
9 Xanukama a ñubi 'ati sinanima bukukë mitsun,
kamina ësokin 'ën mitsu kakëxun kuati 'ain.
Xanukama axa ñu 'aíma bukukë mitsun kamina 'ën bana kuati 'ain.
10 Bërí kamina mitsux asábi 'ikanin,
'aínbi kamina ënuax achúshi baritia 'ikëbë rakuë́tan bamakanti 'ain,
usai ka a bitëkënti ñu 'apákë aín
bimi 'aíma 'ianan uvas 'aíma 'ain 'iti 'ikën.
11 Xanukama añu ñubi 'ati sinánkëma,
mikamax kamina rakuë́ti bërëti 'ain;
mitsux kamina uisa ñubi kana 'inútima 'ai kiax kin, usa 'ain kamina rakuë́ti 'ain,
mitsunribi kamina ami pañukankë chupa pëtankëxun chupa xëni masá nuitukin 'akësa 'inun pañukanti 'ain.
12 Usai 'i kamina ka masá nuitutia kixun
'unánun, shitinki anu ñu 'apákëxa 'itsaira tuákë anuax 'ianan, anu uvas 'apákë naëkama anu kuaibë nianan aín inkëbë niti 'ikën.
13 Usai 'imainun ka anu 'ëx 'ikë menua 'ikë 'ën ëmanu xubi muxañu 'imainun me 'atima 'iti 'ikën,
usai 'ikëbë ka anuaxa unikama kuëënkë xubu ëmanu 'ikë anuribi muxa kóti 'ikën.
14 'Imainun ka 'apun xubu akama ënkë 'iti 'ikën;
'imainun ka ëma anuax chikíkin upíokin kënëarakë anua uni 'itsaira 'ikë aribi ashikin ënkanti 'ikën,
usakin ënkë 'ain ka pasto koia pi burro raëkëma,
'imainun vaca akamax anu bukuti 'ikën.
15 'Aínbi ka Nukën 'Ibu kamabi kushiñu an ñu unio an
amiribishi nukama 'akintëkënti 'ikën,
usakin 'akin ka me ënkëxa anu ñu
'apátisama 'ikëbi anu ñu 'apátisa 'imitëkënti 'ikën,
usakin 'akëx ka a me anu unin ñu 'apátisabi upíira 'iti 'ikën.
16 Usa 'ain ka kamabi menu 'ikë unikamax añu
ñux kara upí 'ikë ashi 'ai bukukanti 'ikën.
17 Usai ika uisaibi 'ima añu kara upí 'ikë ashi 'ai,
uínbi ubíokëma xënibua 'aínbi bukukannun 'imiti 'ikën.
18 Usa 'ain ka 'ën,
unikamax uínbi ubíokëma,
upitax upiokin 'akë atun xubunu bukukanti 'ikën,
19 'ianan ka nikama unin tëapakin
këñúkëbëbi ëmanu 'ikë unikama rabinkë bërútima 'ikën.
20 Usai 'i kamina mitsux chuámarua tsókanti 'ain,
mitsun ñu 'apákëa 'umpaxan chabókëbë
'ianan, ka mitsun burro 'imainun vaca bënëkaman piti pasto 'itsaira 'iti 'ikën.