Nukën 'Ibun an 'akinun kainkë uni 'akinti ñuikë bana
33
¡Mitsun bëtsi unikama masókin 'atimokë 'ikëbi kamitsu bëtsi unikaman masókin 'atimokëma 'ikën;
Mitsun kamina bëtsi unikama 'atimo 'aínbi ka bëtsi unikamanribi mitsu 'atima okëma 'ikën!
Uínsaran kaina bëtsi uni masókin 'akin këñuin, anun ka bëtsi unikamanribi mitsu masókin 'ati 'ikën; uínsaran kaina bëtsi unikama mi 'akësabi okin 'ati sinánxun 'aima, anun ka bëtsi unikaman mi 'ati 'ikën.
2 Nukën 'Ibu nu nuibakin kamina
nukama 'akinti 'ain, nun kananuna minmi nu 'akinun kainin.
Nu kamina nëtë́tibi 'akinti 'ain, 'imainun kamina uinsaran nëtën kara
anun nux tëmërati nëtëkama 'ia anunbi nu ië́miti 'ain.
3 Uínsaran kara mixmi atu 'akatsi kia kuatia anun ka unikamax abisi abáti 'ikën;
uínsaran kaina min kushi ismikin nu 'akinin anun ka bëtsi menu 'ikë unikamax abisi abáti 'ikën;
4 usa 'ain ka axa ami nishkë unikamax champu 'itsa nuania nëtë kuin masá kuatsini ukësai ukin axa ami nishkë unikaman,
atun ñu kupíkë akamabi bianan anúan ñuñuira 'ikankë akamabi bikuanti 'ikën.
5 Nukën 'Ibu ax ka kamabi ñun 'ibu 'aish a manámi 'ianan naíkamë 'ëonuribi 'ia;
an ka Jerusalénnu 'ikë unikama 'imainun Judá menu 'ikë unikama raíri uisai kara ñu upíshi 'ai upí tsóti 'ikë kixun 'unánmiaxa,
6 usa 'ixun ka uisai kara xënibua 'aínbi an bërúankëx aín unikama bukuti 'ikë kixun 'unánmiti 'ikën.
Ñu 'unánkë 'ianan upiokinra ñu 'unánkëira an ka ñu achúshi kupíkësaira 'ixun uni ië́mia;
usa 'ain ka Nukën 'Ibumi rakuë́ti ax ñuñuira 'ikë usamaira 'ikën.
7 ¡Kamina kuakanti 'ain uisai kara axa 'akánanti 'unainrabu ax anun ëmanu niti bai anuax kuënkëni kikania kixun,
'imainun ka 'akanantima ka kixuan bana mëníotanun xukë unikama atux inia kuati 'ikën!
8 Bai kama axribi anun nikima ënkë 'ikën,
uixi anun nitima 'ikën.
Ñu 'akatsikiax bëtsibë bërí kanankë a 'aíma 'inun ënkë 'ikën;
usa 'ain ka timë́ax kananxuan ñu mëëkë akamaribi 'aíma 'ikën,
'ianan ka bëtsibë nuibanani kanankë abi 'aíma 'ikën.
9 Mex ka uni ñukë 'ain masá nuitukë usa 'ikën,
Líbano me axribi ka anu 'ikë ikama chushikë 'ain unix 'ikësai rabinkësa 'ikën,
'imainun ka Sarón kakë me sapan kiankë axribi anu uni 'ikëma mesa 'ikën,
'imainun ka Basán me 'ianan Carmelo kakë bashi anu 'ikëkama axribi me ëskikëbë xanani ikama axribi aín pëchi rëukubutia.
10 Nukën 'Ibu ka ësai kia:
“Bëríra kana 'ën ñu 'ati 'ain;
'akin kana bërí uisakin karana 'ën ñu 'ai kixun uni ismikin kamabi ñu chabu 'ën kushin 'ëx 'apu 'ixun 'ati 'ain.
11 Usa 'ain ka usakin ñu 'akatsi kixun sinánkë 'imainun mitsun ñu mëëti 'akë akamax basi chushikë 'ianan ñu puti bukúnkë usaribi 'ikën;
usa 'ikë kana 'ën xunkaia tsin ñu 'akësa okinshi këñuti 'ain.
12 Ëmakamanu unikama bërúkë ax ka ñu xarokëx aín chimapuishi bërukësa 'iti 'ikën;
usai 'ika muxa tëapaxun bukúnxun unin në́nia tsin pikë usaíshi 'iti 'ikën.
13 'Ura 'ikë unikama anribi ka 'ën 'akë ñukama kuati 'ikën,
kuamainun ka 'urama 'ikë unikamanribi uisakin karana 'ën kushínbi ñu 'a kixun 'unánti 'ikën.”
14 Jerusalén ëmanu 'ikë unikama 'imainun Judá menu 'ikë unikama atúxribi ka 'uchakë 'aish 'itsaira rakuë́ti bërëia,
'imainun ka an Diosan bana 'unánkëma unikama atúxribi 'itsaira rakuëtan bamai ësai kia:
“¿Uinu 'ikë nukamax kara tsi ërë́kin an ñu xarokin këñúkë anu 'ianan, këñutima oia ërë́kë anu 'iti 'it?”
15 An upí ñuishi 'ai asérabi këmëima banakë uni 'ianan,
an bëtsi uni aín ñu kuëëniamabi bikuantankëx anun ñuñukëma 'ianan,
bëtsi 'atima oxunun kixun bëtsin 'inainshikë kuríki bikëma a 'ianan,
an bëtsi uni usakin kananuna uni rëtëti 'ai kixun kakëxunbi kuëënxunkëma 'ianan,
an uisaxunbi usakin kana ñu 'atima 'ati 'ai kixun sinánkëma uni,
16 akamax ka upitax rakuë́tima tsóti 'ikën,
usai 'ika ami katamëti achúshi xubu mapara 'akë ami katamëanan,
aín piti 'itsaira ñu 'ianan, a xëati 'umpax 'itsairañu 'aish ñuñumama 'itima 'ikën.
17 Usa 'ain kamina mitsun bërúnbi axa 'apu 'iti uni a istëkënti 'ain, ax ka 'apu 'upíira 'inuxun 'aia;
an ka uinu kara me kuainakëakëxa anu 'aísha 'uraira 'aínbi unikaman 'apu 'iti 'ikën.
18 Anunmi rakuë́ti tsóa nëtëkama a sinani, kamina ësai kikanti 'ain:
“¿Uinu kara an kupíonun kixun ubíokin kupíomixun an kuríki tupuán suntárunën kushikama ax 'ik?
¿Uinu kara an sënën kara kixun ñu ëñë tupuán ax 'ik?
¿Uinu kara suntárunën kushikaman anuxun nu ñatanun xunuxua anun ëma kënëarakama anuxun bërúankëkama an tupuán ax 'ik?”
19 Usa 'ain kamina bërí amiribishi bëtsi ëmanu 'ikë unikama bana kuakëma 'ain,
atun bana ax ka mitsun kuaisama tëira 'ianan, uisai kara kia kixun uinu 'ikë mitsúnbi kuaisama 'ikën.
20 Anuxun nëtë inúkin fiesta 'ati Sión kakë ëma a kamina iskanti 'ain;
Jerusalén ëma uisabi oisama okin bërúankë a kamina mitsun bërúnbi isti 'ain;
ax ka anu 'inuxun 'upiokin unin i nitsintankëxun
shaíkisama okin 'anan uínbi ain itsikama tënkapatisama okin 'akë usaribi 'iti 'ikën.
21 Anuxun ka Nukën 'Ibu nukama aín kushi ismiti 'ikën.
Ax ka achúshi baka kushiira abákë 'imainun naxbaira usaribi 'iti 'ikën, usa 'aínbi ka
axa ami nishkë unikama atu 'akatsi
kiax anúan 'akanani kuankë atun manë nunti intían nikinkë a 'imainun chaiira kushiira ax 'inútima 'ikën.
22-23 Usa 'ain ka Nukën 'Ibu ax an bana nu mëníoxunkë 'ixun
a tanti banakama nukama 'axunia, 'imainun ka
ax nukaman 'apu 'ikën, usa 'ixun ka an nu ië́miti 'ikën.
Axa numi nishkë unikaman atun nunti anun tëkërëkakë itsikaman ka churukukë 'ixun ami tëkërëkakë i a tuinima,
usa 'ain ka ami tëkërëkakë chupa ax pënimëtima.
Usai 'ikëbëtan kananuna numi nishkë unikaman atun ñu kupíkë bikuanti 'ain,
bimainun ka bëxuñu unikama 'imainun aín taëmi ñukë unikamanribi atun ñu kamabi atima onan numi nishkë unikaman ñu bikuanti 'ikën.
24 Usa 'ain ka anu 'ikë unikama: “Kana 'insían kitima 'ikën.”
Diosan ka Jerusalénnu 'ikë unikama 'imainun Judá menu tsókë unikama atun 'uchakama mëníoxunti 'ikën.