Israel unikama Jerusalén kakë ëmanu utëkënti ñuikë bana
35
'Ëx kana kuëënin anu uni 'ikëma, me ëskikë ax kuëënti,kuëënkëbë ka 'itsaira anu ñu bimi uábuti 'ikën,
2 'ianan ka ro ua ax 'apákësa 'inun uábuti 'ikën,
usaía 'ikëbë ka unikama 'itsaira kuëënti 'ikën.
Diosan ka a menu ni upíira 'imiti 'ikë,
Líbano menu 'ikësa 'inun, 'imianan ka Carmelo kakë me upíira a 'imainun me sapan Sarón kakë usaribi 'imiti 'ikën.
Kamabi unikaman Nukën 'Ibu ax ka kushiira 'ianan, 'apuira 'ikë kixun 'unánti 'ikën.
3 An 'ëx kia kuakë mitsun kamina, axa 'akinti kuëënkë unikama 'akinti 'ain,
'akinkin kamina atsánkë unikama a kuëëntanun sinanamikin kati 'ain,
4 kanan kamina axa rakuë́ti 'ishtun banakëma unikama aribi:
“Rakuëama 'inun kati 'ain.
¡An nu ië́miti Nun Dios ka nu 'urama 'aish nubëbi 'ikën,
'ianan ka mitsumi nishkë unikama atux kuëënkësa okin tëmëramiti 'ikën!”
5 Usa 'ain ka bëxuñu unikama an 'upiokin ismainun,
pabë unikama anribi paxabarakakin bana kuati 'ikën;
6 'imainun ka uni 'ain niti bëtsikë akamax chaxu abati 'ikësai churunti 'ikën,
'imainun ka banakëma unixi munuma banati 'ikën.
'Ianan ka anu uni 'ikëma me ëskikë anuax kushiira 'inun 'umpax 'itsaira ax bënëtishi shióbuti chikiti 'ikën.
7 Anu uni 'ikëma menu ka 'umpax chaiira 'iti 'ikën,
'imainun ka me ëskikë anubi xëxá upíira manámi chikíkë 'iti 'ikën.
Anu ka bërí an ñuina rëtëxun paxa pikë kamun raëkëmakama 'ia, usa 'ain ka anu toëón 'imainun xatsíon kóti 'ikën.
8 'Imainun ka anu achúshi bai cha upíira 'iti 'ikën,
“ax ka bai upí kakin anëkë 'iti 'ikën.”
Usa 'ain ka uikamax kara aín 'ucha sinánkin ain
niti mëníokëma 'ikë akamax a bain nitima 'ikën;
'imainun ka sinánñuma unikama atúxribi anun inuti nitima 'ikën.
9 Anu ka paru inuán 'ianan raëkëma ñuinakama axribi 'utima 'ikën.
Usa 'ain ka bai an ië́mikë Israel unikama aín menubi an 'imikëx riküatsintëkënun Diosan 'imiti 'ikën;
10 a unikamax ka Nukën 'Ibun ainan 'inun bitëkënkë unikama 'iti 'ikën;
usa 'aish ka Jerusalén ëmanu atsini kantai kuëënkanti 'ikën,
usai 'ika anu kuëëni xënibua 'aínbi tsóti 'ikën.
Usai kuëëni chuámarua tani anu tsókëbë ka uínsaranbi masá nuituti inkë ax atunu 'itëkëntima 'ikën.