Nukën 'Ibun amiribishi Jerusalénnu tsókë unikama masá nuitutiabi upiokin sinánu 'imia 'ikën
40
Mitsun Dios ax ka ësai kiaxa:“'Ën unikama kamina kuëëntanun nuibakin 'akinti 'ain;
2 'akianan kamina kuëëntanun nuibakin Jerusalénnu
tsóa unikama a atúan tëmërakin bëtsi uni ñu mëëxuan a ka këñúaxa kixun kati 'ain, kanan kamina atúxa usai 'ikë anunbi
ka 'ën kakëxuan atun kuaisamatan a kupíoxa kixun kati 'ain,
'ënbi kana 'ëmi 'itsaira 'uchaia
rabë́ okin atu 'atima okën.”
3 Achúshi ángelnëx ka munuma banai ësai kia:
“Nukën 'Ibu ka 'aia kamina anu uni 'ikëma menu bai mëníoxunti 'ain,
a kamina Nukën 'Ibu Dios 'axunti 'ain,
ax ka achúshi bai chaiira puntë 'ianan naxba anu ñu 'irukëma me 'iti 'ikën.
4 Kamabi me xëxañu 'ianan bashi 'itsañu akamax ka me sapan 'inun nataka kikë 'iti 'ikën,
bashi tëpan 'imainun matá, mekama ax ka aín chairukëkama iskëma 'itánun mëníokakë 'ikën,
usai 'ikëbë ka 'itsaira xëxákama ax nëtëtima 'imainun ain bashikama ax sapani aín rëbu iskëma 'iti 'ikën.
5 Usa 'ain ka Nukën 'Ibun aín, kushia isnun ismiti 'ikën.
Ismikëxun ka kamabi unin timë́xun isti 'ikën,
usai ka Nukën 'Ibu ax kiaxa.”
6 Achúshi unix ka ësai munuma banai kia:
kia kana 'ën ñukan: “¿Uisai karana 'ëx munuma banai kiti 'ain?” Kakëxun ka an 'ë kaxa. Ënë bana kamina munuma banai kiti 'ain kixun ka 'ë kaxa.
“Kamabi unix ka xubi kókë usaribi 'ikën, ¡aín tsóti ax ka ñu ua naënu kotankëxi bëríbi nëtë́kë usa 'ikën!
7 Xubix 'imainun ro uakama ax núkai ëski chushia,
uínsaran kara Nukën 'Ibun xunkaia anun ka usai 'ia.
Usa 'ain ka asérabi unin tsóti ax bënëtishi xubi 'ikësaribiti inutia.
8 Usa 'ain ka xubi ax ëski chushimainun ro ua axribi chushi xanania,
'aínbi ka Nukën 'Ibu Diosan bana,
ax xënibua 'aínbi usabi 'iti 'ikën.”
9 Sión an upí banakama ñuikë,
ax ka aín bashi achúshi chaxkë́ira anu kuaruti 'ikën.
Jerusalén an upí banakama ñuikë, mix kamina kushiira banati 'ain,
Judá menu 'ikë ëmakamanu 'ikë unikama aturibi upí bana a ñuixunti 'ain:
¡Ënu ka mitsun Dios 'ikë kamina iskanti 'ain!
10 Nukën 'Ibu ax ka 'uti 'ikën,
an ka aín kushinshi ax kushiira 'ixun ñu 'ati 'ikën.
Usa 'ixun ka amia nishkë unikama a pain 'atimotankëxun aín unikama bitsínkin bëti 'ikën.
11 'Ianan ka an ñuina bërúankë unían aín ñuina bërúankin;
aín ñuinakama nuibakin
aín shikami okin 'ikúkin bixun tuianan,
axa bërí bakënkëkamaribi bëruinra okë usaribi okin 'aia.
Israelnën Dios ax ka kushiira bëtsi ñu bëtan sënë́maira 'ikë kixun ñuikë bana
12 ¿Uin kara parúmpapa kamakëñun 'umpax aín mëkënan tupúanan,
aín mëkën rëbukaman uiti chaiira kara naíkamë 'ëo 'ikë kixun tupuax?
¿Uin kara me putu kamabi uiti kara kixun tupúnti 'ikë,
'ianan kara anun ñu 'ië tupúnti 'akë anun matákama 'imainun bashikama tupúnti 'ik?
13 ¿Uin kara Nukën 'Ibu ësokin kamina ñu 'atima 'ai kixun kanan,
usakin kamina ñu 'ati 'ai kixun 'unamiti 'ik?
14 ¿Uin kara usakian ñu 'anun kixun 'ësëanan usakin kamina ñu 'ati 'ai kixun kuamikin kakëx?
¿Uin kara usakin kamina uni 'ati 'ai kixun istánkëxuan 'anun 'unánmiakëx?
¿Uin kara uisai kara ënë nëtënu 'ikë ñukama uniakëxa kixun 'unánmiakëx?
¿Uin kara usakin ñu unáni kamina sinánñuira 'iti 'ai kixun 'unánmiakëx?
15 An iskëx ka bëtsi bëtsi menu 'ikë ëmakamanu 'ikë unikamax 'umpax tuskia iskë usaratsushi 'ikën,
'ianan ñu bëru 'itsama anun ñu tupunkë anu 'arukë usaribi 'ikën;
bëtsi bëtsi unikama parúmpapa nasínua 'ikë ax ka masi bëru 'itsaira 'iskësa usaribi 'ikën.
16 Kamabi Líbanu mekamanu ka ñuina 'itsairama 'ikën
usa 'aish ka bënë́kinshi 'atankëxun 'aímai këñutanun a xarotibi 'aíma 'ikën,
'ianan ka anua karu bënë́kinshi a tíkati bisamabi 'ikën.
17 Kamabi menu 'ikë ëmakamax ka an iskëx ñuumara 'ikën;
usa 'aish ka an iskëx anu 'ikë unikamax kushima 'ikën.
18 ¿Uinu 'ikë bëtsi uni kamabëtan sënën kara Dios 'ikë kixun kaina mitsun kati 'ain?
¿Uisa ñu mitsúnbi uniokë ax kara asaribi 'iti 'ik?
19 An ñu unioti 'unánkë unin ka charóxun ñu uni tankin 'aia,
'imainun ka an tëñuti 'anan mëñuti 'akë an 'atankëxun kurin ratáta kakin 'anan
manë uxua aribi risi 'itánun 'aia.
20 An ñu unioti 'unánkë an ka
i chë́kisama upí baria,
barixun ka an ñu 'ati 'unánkë uni aribi,
nipakëisama okin upíokin nitsinxunun kixun kaia.
21 ¿Mitsun kaina a küama 'ain?
¿Ax kiabi kaina aín bana kuakama 'ain?
¿Mitsu kara 'itabati ka usai ñu 'iakëxa kixun ñuixuama 'ik?
¿Mitsun kaina mekama uniokëma 'aínbi kara uisa ñu 'iakëxa kixun 'unaniman?
22 Dios ax ka an me bëararakë kuman batsisa naí meu 'ikë a manámi tsótaxa,
usa 'ixun ka kamabi uni champura 'akësa okinshi isia.
An ka chupa 'akësokinshi naíkamë 'ëo pëokaia,
'anan ka anu 'iti chupa këxtú pëokakin pëninkësa okinshi 'aia.
23 Diosan ka kushiirabu unikama a kushiñumasa 'inun 'imianan,
ënë menu 'ikë 'apukama ñu 'atimara iskësa usarabi 'inun 'imia.
24 Usa 'aish ka bërí ñu 'apákëx, me bitsi tapunakëkëma usaribi 'ikën,
usa 'ain ka Diosan anu 'ibúkin bëkinun 'imikëxuan suñun bëkakëx chushi bamaia,
usai 'ia ka anu kushi 'ibúkin basi chushikë 'akësara okinshi suñuanën tákaia.
25 Usa 'ain ka Dios upíira ax ësokin ñukati kiaxa:
“¿Mitsun kaina uibë sënën karana 'ai kixun 'ë kati 'ain?
¿Uix kara 'ësaribi 'iti 'ik?”
26 Manámi bësukin kamina naími okin iskanti 'ain:
¿Uin kara kamabi ñu uniokëx?
An ka kamabi uniotankëxun 'ispakama
aín anën anëkin nankëxa,
usa 'ixun ka achúshi achúshi usai kamina 'iti 'ai kixun kakëxa.
Aín kushi chaiira 'ain ka
uinu 'ikë 'ispaxbi nëtë́tima 'ikën.
27 Jacobnën rëbúnki Israel unikaman,
¿uisa kupín kaina banai bënë́kanin? ¿Uisa kupín kara ësai kikani:
“Nukën 'Ibun ka 'ëx inúkë ñukama 'unanima;
kianan Diosax ka numi sinanima kiax kikanin?”
28 ¿Mitsun kaina 'unaniman? ¿Mitsun kaina a kuakëma 'ain?
Nukën 'Ibu Dios ax ka uínsaranbi këñutima oi tsókë a 'ikën,
an ka kamabi me uniokin anu 'ikë ñukamaribi uniokëxa,
usa 'aish ka ax atsanx kana 'akasmati kiax kima;
'ianan ka ax sinánñuira 'ikë ax nëtë́tima 'ikën.
29 An ka axa atsánkë unikama kushitëkënun 'imia,
'imianan ka kushiñuma uni aribi amiribishi sinanatëkënia kushinun 'imia.
30 Uni bënákama atúxribi ka atsanx kushiñumasa 'iti 'ikën,
'ianan ka kushiira unikama atúxribi pakëti 'ikën,
31 'aínbi ka axa Nukën 'Ibumi katamëkë:
unikama ax kuni kushiñumasa
'ima abi kushiakëkiani;
tëtëkamë 'ëo nuani nikë usai nitsi
abatibi atsantima 'ikën
'imainun ka usai nitsibi atsantima 'ikën.