Nukën 'Ibu Dios 'ën kana Israel unikama tëmëraiabi 'akinti 'ai kia ñuikë bana
41
“Ësai ka Dios kiakëxa, axa parúmpapa nëbëtsi 'ikë nasínu bukukë unikama an ka nëtë́xun 'ëx kia kuati 'ikën.Bëtsi bëtsi menu tsókë unikamax ka kushi mëníokati 'ikën.
Uisai kaina mitsux tsóti anu banakin mëníonun kamina timë́kanti 'ain;
bërí kananuna timë́xun uisakin karanuna mëníoti 'ai kixun isti 'ain.
2 ¿Uin kara amiaxa bari
urukë amiaxa 'apu an kamabi kupitanuma 'akanankë ax mëranun 'imiakëx?
¿Uin kara bëtsi bëtsi menu 'ikë unikama aín 'apukama atux an 'akë unikama ami 'inamëkëbëtan aín,
suntárukaman aín manë xëtokë,
'imainun aín kanti 'itsaira uni 'akëbëa raíri unix basi chushikë 'ikësa usaribiti basatanun 'ati 'ik?
3 ¿Uin kara aín suntárukamabëtan nuibiani
uisaibi 'ima men kuankëmasa 'inun nuankiani kuankësa 'inun 'imiti 'it?
4 ¿Uin kara ënë ñukama ësokin 'akëx?
¿Uin kara bërámabi 'a 'ixun bëríbi
usaía ñu inútikama a 'imiti it?
'Ëx kana mitsun 'Ibu Dios achúshi a 'ain,
uin kara uinsaranbi 'itabakënu unin ñuiama ñu 'akëxa.
5 Axa parúmpapa nasínu 'ikë ëmakamanu tsókë
unikama ax ka a isi 'itsaira rakuë́kankëxa;
usai 'imainun ka mekama shaíki kamabi mex shaíkiakëxa.
Usai 'ikëbë timë́xun ka 'aia kixun iskanti 'ikën.”
6 An ñu unioti 'unánkë an ka abëtan ñu 'akë a kuëëmikin uni
ábia ënxuma 'anun kixun kati 'ikën.
7 An ñu unioti 'unánkë an ka tëñuti 'anan,
mëñuti 'akë a abia 'anun kuëëmikin kati 'ikën;
'imainun ka anun chakati 'akë anua an manë, chakakë aribi ënxuma
'anun kati 'ikën,
minmi manë charoxun takáshkakë ax ka asábi 'ikën,
usokin 'atankëxun kamina mi uniokë ñu a shaíkibë́kinima nipakëtia usa 'ain rabún matásti 'ain.
8 “Israel unikama 'ën uni
Jacob a 'ën kaisa aín rëbúnkikama, 'imainun
Abraham 'ën uni aín rëbúnkikama: Mitsun kamina 'ën kakëxun kuakanti 'ain.
9 'Ën kana uinu 'ikë menu kaina 'i anuabi chikínbëtsinkin mitsu bëakën,
'ianan kana uinu kara me kuainakëakëxa
anuabi kuënxun mitsu kakën: ‘Mitsux kamina 'ën uni 'ain.’
'Ën kana mitsu timakinma kaisakën.
10 'Ëx kana mitsubë 'ain usa 'ain kamina rakuë́kantima 'ain;
'ëx kana mitsun Dios 'ain usa 'ain kamina rakuë́kantima 'ain,
'ën kana mitsu kushionan 'akinti 'ain, 'ën kana mitsu
anun 'akánanti manë xëtokë 'ën mëkënan tuínxun 'akësokin axa mimi nishkë unikamami kupitanuma 'anun 'amiti 'ain.
11 Usa 'ain ka kamabi axa mitsumi nishkë unikamax
rabinkëbu 'ianan ñuumarasabu 'iti 'ikën;
'ianan ka axa mitsubë 'akanankatsi kikë unikama
achúshirabi nitánuma maërakatanun këñúkë 'iti 'ikën.
12 Usai 'ikë kamina axa mitsumi nishkë
unikama barikinbi mërakantima 'ain;
usa 'ain ka axa mibë 'akanankë akamax anu
buküaxi 'aimasa 'iti 'ikën.
13 'Ëx mitsun 'Ibu Dios 'ixun kana,
'ën mëkënan tuinkësa 'inun mitsu 'akinti 'ain usakin 'akinuxun kana mitsu kan;
Usa 'ain kamina rakuë́tima 'ain, 'ën kana mitsu 'akini usa 'ain.”
14 Ësai ka Nukën 'Ibu asérabi kiakëxa:
“Israel unikama Jacobnën rëbúnki 'itsamara 'aish kushimarasa unin iskëbi rakuëtima,
'aínbi kamina mitsux rakuë́tima 'ain. 'Ën kana mitsu 'akinin.
'Ëx Israel unikaman Dios upíira 'ixun kana,
mitsu bitëkënti 'ain.
15 Usakin 'akin kana mitsu anun ñu tákati i xëta,
xëtabu ió aín xëta upí 'itánun 'akë usaribi 'imiti 'ain;
'imikëxun kamina bashikama ñu putusa 'imianan me sapankamaribi,
basi chushikësa 'itánun 'imiti 'ain.
16 Usakin 'axun tákaia ka suñun bëkikin nuánmiti 'ikën;
ñu bimia aín bimikama këñunbi anu 'ibúkin suñúan kushiiran ñu 'akësaribi okin 'abisoti 'ikën.
Usa 'ain kamina mitsun 'Ibu 'ain kuëënkanti 'ain,
usai 'ikamina mitsux rabiakati Israel unikaman Dios upíira ax ka nubë 'ikë kiax kikanti 'ain.
17 Uni ñuñuma 'aish kuríkiñuma akaman ka 'umpax barikinbi mëraima.
Usa 'aish ka 'umpax xëaima shimax aín tëru ëskia;
'aínbi kana 'ëx aín 'Ibu 'ixun atu 'akinti 'ain,
'ëx Israel unikaman Dios 'ixun kana atu 'akinkin ëntima 'ain.
18 'Ianan kana anu uni 'ikëma bashikama anubia 'umpax 'inun 'imiti 'ain
'imianan kana me sapan kamanuribi xëxá manánmi ki shióbuti upíbu 'inun 'imiti 'ain;
'imianan kana anu uni 'ikëma me ëskikë anuribia xëxákama 'inun 'imiti 'ain.
19 Anu uni 'ikëma menu kana kunxan,
acacia kakë i 'ianan pëñanakëkë i 'imainun olivos akamaribi kómiti 'ain;
komianan kana me anu ñu 'apátisamai ëskikë anubi pino kakë i akëñunbi i chaxkë́irabu akamabi kómiti 'ain,
20 usakin 'akë ka kamabi unin iskin 'unánti 'ikën,
'imainun ka upíokin sinanan kuati 'ikën,
'ëx aín 'Ibu 'ixun ka ënë ñukama 'ën kushínbi 'a kixun 'unánkanti 'ikën,
'ianan ka 'ëx Israel unikaman Dios upíira 'ixun kana usakin 'a kixun 'unankanti 'ikën.”
Nukën 'Ibu Dios unínbi uniokë ñukama masókatsi kia bana
21 'Apuira Jacobnën rëbúnkikaman 'Ibu ax ka ësai kiaxa:
“A rabinuxun unin bëtsi ñukama tankin uniokë akamax ka
uisakin kara ñu 'aia kixun 'ë ñuixuni ukanti 'ikën.
22 Uxun kamina uisai kara ñu 'inuxun 'aia kixun nu kanan
uisai kara ñu 'iakëxa kixun nu ñuixunti 'ain,
ñuixunkëxun kananuna nukaman upíokin kuakin sinánti 'ain;
kuamainun kamina uisai kara ñu 'inuxun 'aia akamaribi nu ñuixunti 'ain,
ñuixunkëxun kananuna uisai kara a ñukama 'inuxun 'aia kixun 'unánti 'ain;
23 usa 'ain ka uisai kara a ñukama 'iti 'ikë kixun nukama kati 'ain,
kanan kamina asérabi karamina mitsux dioskama a 'ai kixun nukama ismiti 'ain.
'Ianan kamina 'atipaxun ñu upí 'anan ñu 'atima ami nux 'itsaira rakuë́tisabi 'itanun 'ati 'ain.
24 ¡'Aínbi kamina mitsux añu ñubima 'ain
'imainun kamina añu ñubi 'aisama 'ain!
An mitsu kaískë unikama ax ka upíokin iskëma 'iti 'ikën.
25 'Ën kana achúshi uni amiaxa bari urukë amiax mëranun 'imiti 'ain;
a uni kana 'ën aín anën kuënti 'ain,
usa 'ain ka aín tsipúmiax a uni uti 'ikën.
Utankëxun ka 'apukama atu chua me aín taën amákësokinshi 'ati 'ikën;
'anan ka an mapú ñutë 'ati aín taën amákin chë́kakë usaribi okin 'ati 'ikën.
26 ¿Uinra kara anúan 'itabati 'ikë anunbi pëua 'ixun,
nukaman 'unánun ñuiakëx?
¿Uinu 'ikë mitsuxira kaina bërámabi uisai kara ñu 'iti 'ikë kiax nukamax kinun kiti 'ain?
Uinu 'ikë mitsúxbi kamina usai ka 'inuxun 'aia kiax kiama 'ain,
uínbi ka achúshi banarabi banaia kuama 'ikën.
27 'Ëxbi kana usai ka Siónnu 'ikë unikama tsónuxun 'aia kiax bërámabi kiakën,
usa 'ixun kana 'ënbi Jerusalénnu tsókë unikama katánun an bana ñuikë uni achúshi xuakën
xukëx kuanxun ka axa aminishkë unikaman uban unikama ax ka basirakëma 'aínshi utëkënti 'ikë kixun kakëxa.
28 'Ën iskëx ka bëtsi dioskama 'ëmi mëratima;
usa 'ain ka an 'ë usai kamina 'iti 'ai kixun kati 'aíma 'ikën,
'ianan ka an 'ën ñukákë banakama usai ka 'inxun 'aia kixun 'ë kati 'aíma 'ikën.
29 ¡Akama achúshinëxbi ka añumabi 'ikën!
Usa 'ixun ka añu ñubi 'aima;
usa 'ain ka unin a rabinuxun uniokë ñu usaribi 'aish ñankáishi 'ikën.