An kaískë uni ñui Nukën 'Ibu kia bana
42
Ësai ka Nukën 'Ibu kiakëxa. Ënu ka 'ën kuëënkësabi okin 'ati 'ën kaískë uni ax 'ikën,ënëx ka 'ëx a isi 'itsaira kuëënkë a 'ikën,
usa 'ain kana 'ën bëru ñunshin a 'inan,
usa 'ixun ka kamabi menu 'ikë unikama upíokian ñu 'anun 'amiti 'ikën.
2 Usa 'ain ka munuma banai kushin kiabi,
ain bana ëman nikë unikaman kuakëma 'iti 'ikën,
3 pëkú pëchi sitan 'akin pësínpakë aka xanun 'aisama 'ikë putia. Usa 'aínbi ka 'ën bakë bëchikënën uni 'aisama 'aísha 'uchañu 'ainbi ainan 'isatania kuantanun katima 'ikën.
Tirí bënabuti kuínkësa ka axa ami sinanibi ami kushikëma uni ax 'ikën. Usa unibi ka aina 'iaxma kuantanun katima 'ikën.
Anun kamabi ñu 'aisama këñuti nëtë utamainun ka aín kushinbi amia katamëkë unikama 'akinti 'ikën.
4 Usai 'ika tantimabi 'ianan kana 'aima kixunbi sinántima 'ikën,
kamabi menu 'ikë unikamaxa ax kikësabiokin 'ai sënë́ntamainun
Axa parúmpapa nasíkamanu 'ikë unikama atun ka an 'unánmikësabi okin 'ati 'ikën.”
5 Dios Nukën 'Ibu an naíkamë 'ëo uniokin chaiira 'inun pënían,
an ka me 'imainun anua kookë ñukama 'akëxa,
'anan ka unikamaribi anúan tsóti uin 'inan,
ax aín uni kai ësai kia:
6 “'Ëx min 'Ibu 'ixun kana 'ën unimi 'inun mi kuëankën,
'imainun kana 'ën mëkënan tuinkësa 'ixun mi 'akinkëxmi,
a banamiti ñusa 'ixunmi, min uni ië́minun mi 'imiti 'ain;
'ën kana mi uniokën, usa 'ixun kamina min,
'ën 'a ñukama ñuikin 'ën unikama kati 'ain,
an ka min tirítan pëkakësa 'ixun bëtsi menu tsókë unikama asérabi ënkinma upíokin ñu 'anun 'unánmiti 'ikën.
7 'Ianan kana 'ën kuëënin bëxuñu unikama ain bëru bëpë́xkuti
ñunshin 'atimanën ñu 'atima 'amikëx sipunu 'ikësa 'ikëbi chikíanan,
ñatanxuan bë́anbëankibukënu xëpúkësa 'ikë akama chikínti kana kuëënin.
8 'Ëx kana min 'Ibu a 'ain, usakin anëkë kana 'ëx 'ain,
usa 'ixun kana uinu 'ikë bëtsi dioskama 'ë 'akësaribi okin rabinun 'amitima 'ain,
'ë rabikinma bëtsi dioskama rabinun mitsu 'amitima 'ain.
9 Kamina 'unánkanti 'ain bërámabi uisai kara ñu 'inuxun 'aia 'ëx kia akamax ka sënë́ankëxa,
'ianan kana bëría bënoi ñu 'itëkënti ami iskankëma a ñuikin;
a mitsun 'unánti a ñukama 'ikëmapan 'aínbi kana mitsu ñuixunti 'ain.”
Dios ka kamabi unin an ië́mikëxun rabiti 'ikën
10 Anun kantakëma kanta ió anun kamina Nukën 'Ibu rabi kantakanti 'ain;
rabikin ka uinu kara me kuainakëakëxa anu tsóa unikama atúnribi rabiti 'ikën,
'amainun ka uikamax kara aín manë nuntin parúmpapan kuania akaman 'amainun,
ka parúmpapanu 'ikë ñuinakama anribi rabiti 'ikën,
'amainun ka parúmpapa nasínu tsóa unikama atúnribi rabiti 'ikën.
11 Anu uni 'ikëma me 'imainun kamabi ëmakama
'imainun ka xubusa okin chupa 'akë anua 'ikë Quedarnën rëbúnkinën ñaká anua 'ikë akamaxribi kuëënti 'ikën.
'Imainun ka Selánu 'ikë unikama axribi kuëëni; munuma aín bashi rëbukama anuax kantati 'ikën.
12 'Usakin 'akin ka Nukën 'Ibu axa
parúmpapa nasínu 'ikë mekamanu 'ikë unikama atúnribi rabiti 'ikën.
13 Usa 'ain ka Nukën 'Ibu ax uínbia uisakinbi kakëma 'ianan,
axa 'akánanti 'unánkëira uníxa bëtsibë 'akanani kushikë usai 'iti 'ikën;
munuma kuënkëni axa ami nishkë
unikama an ñusmokin 'ai 'iti 'ikën.
14 Ësai ka Nukën 'Ibu kiaxa:
'Itsaira baritia inúkëbëbi kana 'ëx uisaibi kiama 'ain, usai 'ën sinánxuama
tani 'ikinbi tënëi kana nishkëmasa 'iakën;
'aínbi kana bërí xanuxa aín tuá bakënux
paë tani ini munuma kuënkëni raëti kushi uíni 'ikë usairibi 'iti 'ain.
15 Usa 'ixun kana kamabi aín bashikama masókin këñuanan,
'imainun anua kookë ñukama ëskikëbëa chushi
ëskinun 'imiti 'ain; 'imianan kana bakakamaribi anu uni 'ikëma mesa 'imianan
'ian kamaribi ëskinun 'imiti 'ain.
16 Usakin 'anan kana bëxuñu unikama aribi atun 'unánkëma bain,
buánkin anua niama bain buánti 'ain.
Uankin kana bëánbëankibukë aribi atun ismainubia xabá 'inun 'imiti 'ain,
'imianan kana me nankë́kë axribia mëníokati upiti rakanun 'imiti 'ain.
Ënë ñukama kana, kana 'aíma kikínma asérabi 'ati 'ain.
17 Uikamax kara unínbia a rabinuxun 'akë achúshi ñu ami katamëtia,
'ianan ka an unioxun ñukama an ësokin kakë:
mitsux kamina nun dioskama 'ain kixun,
kakë akamax ka 'aisamaira katë́ti 'uri kikë 'iti 'ikën.
Israel unikaman ka bëxuñusa 'ixun 'ën kakëxun bana kuatima kia bana
18 “Ësakin ka Diosan Israel unikama kakëxa, mitsux kamina bana kuakëma pabëira unibusa 'ain, usa 'ain kamina kuakanti 'ain;
'ianan kamina bëxuñusakama mitsunribi uisa kara ñu 'ikë kixun upíokin pain iskanti 'ain.
19 Uíxbi ka bëxuñusa 'ianan bana kuakëmasa 'aíma 'ikën,
mitsux kamina 'ën kaískë uni, 'ënbi xukë uni 'ain,
uibi ka bëxuñusa 'ianan pabëirama 'ikën,
mitsux kamina an 'ën bana ñuikë 'ianan 'ën unikama 'ain.
20 Mitsun kamina uiti ñuishi karana 'ën mitsu kupí 'ai 'isakën, 'aínbi kamina a sinánkima 'ën kakëxun kuaisama tankanin;
mitsun kamina kuatin, 'aínbi kamina 'ën kakëxun uisa banabi kuaisama tanin.
21 Nukën 'Ibu an ka ax Dios ië́mianankë 'ixun,
aín bana ax ka chaiira 'ianan kushi 'ikë kixun 'unánmisa tankëxa:
22 'aínbi ka ënë unikama amia nishkë unikaman atun ñu mëkamanan aín ñu kamabi bikuanxa,
usonan ka a unikama kamabi ñatanbiankin buánxun sipuaxa;
usokin 'akian atu 'ibuakë 'ikëa an chikínti uni ka 'aíma 'ikën,
'ianan ka kuëëniamabi ñatanbiankin buánkë 'ikëbi an chikínti uni 'aíma 'ikën;
'ianan ka an mëkamakin ñatankin bikëbi, kupíotankëxun bitëkënti ka 'aíma 'ikën.”
23 ¿Usa 'aínbi karamina uinu 'ikë mitsukaman ënë banakama kikësabi oi ka 'iti 'ikë kixun sinánkaniman?
¿Uix kara a banakama kikësabi oi kara 'ia kixun kuatishi 'iti 'ik?
24 ¿Uin kara Israel unikama Jacobnën rëbúnkikama a
raíri 'anan bibiankin ain menu buánun 'amiakëx?
¿An usakin 'akë ax kara asérabi Nukën 'Ibun 'amikëma 'iakëx?
Atux ka ami 'uchakëxa,
usai 'ikin ka an kakësokinbi 'akëma 'ikën,
'ianan ka ain bana ax kikësokinbi
'aíma 'ianan, an 'unánmikësa okinbi 'aisama tankankëxa.
25 Usa 'ain ka atumi nishkin an tëmëramiti,
ami nishkë unikaman bënë́kinshi 'akanankin 'anun 'amiakëxa;
usakin Nukën 'Ibun 'akëxunbi ka 'unánkinma kuaisama tankankëxa.