Nukën 'Ibun ka uni ië́miti 'ikë kikë bana
43
Bërí kanima Israel unikama Jacobnën rëbúnki min,an kamabi ñu unio Nukën 'Ibu ax ka mitsu ësakin kai kia kuati 'ain:
“Kamina rakuë́kantima 'ain, 'ën kana mitsu ië́mian;
'ën kana min anën mi kuëan, usa 'aish kamina mitsux 'ën uni 'ain.
2 Mitsux 'umpaxan 'inúkëbëbi kana 'ëxribi anu 'iti 'ain, usa 'ain kamina bakaribi sikatibi bakami kitima 'ain,
'ianan ka tsi rëkirukënën anun inutiabi mi chuxtima 'ikën,
'ianan ka 'ain rëkirukë anbi mi xanotima 'ikën.
3 'Ëx kana min 'Ibu, an mi ië́miti a 'ain,
'ëx kana Israel kaman Dios 'upíira a 'ain.
'Ën kana mitsu 'ënan 'inun biakën;
'ën kana Egipto, Etopía 'imainun Sabá mitsumi nishkë uni aín kushinua chikínun 'ën mi kupíoxuan.
4 'Ën kana 'itsaira mi nuibatin,
mix kamina bëtsi ñu kamasamaira 'ain 'imainun kana 'ën mi nuibatin.
Mitsu 'ënan 'iti bikin ië́mikin bërúanuxun kana unikama 'imainun bëtsi menu 'ikë unikama atu 'amiti 'ain.
5 Mitsux kamina rakuë́tima 'ain, 'ëx kana mitsubë 'ain.
Usa 'ain kana amiaxa bari urukë 'imainun amia bari kuabúkë,
anuabi min unikama amiribishi timë́tëkënun 'imiti 'ain.
6 'Ën kana aín tsipumiu 'ikë axa mitsumi nishkë unikama: mitsun menubi kuantëkëntanua mitsu xunun kati 'ain.
'Imainun kana aín rëbumiu 'ikë axa mimi nishkë unikamaribi: 'anubi mitsu 'imixuma 'anun kati 'ain.
'Ën bakë bëchikë bëbukama 'ianan, 'ën 'ini bëchikë kamina bëti 'ain,
uinu kara me kuainakëaxa anu 'aish 'ura 'ikëbi,
7 'ën unikama kamina kamabi mitsun bëtëkënti 'ain akamax ka 'ën aintsi 'ibu 'ikën,
usa 'ain kana atu 'ën uniokën,
usa 'ixun ka atun 'ë rabiti 'ikën.
8 'Ën kana 'ën unikama bëtëkënti 'ain,
atux ka bëruñu 'ikë 'aínbi ka bëxuñusa 'ikën,
'ianan ka kuatia, 'aínbi ka pabësa 'ixun bana kuakëmasa oia.
9 Kamabi ëmanu 'ikë unikama kamina timëti 'ain,
'iminun ka bëtsi menu 'ikë unikamaribi timë́ti 'ikën.
¿Uinu 'ikë a unikamanu 'ikë unix kara usai ka 'inuxun 'aia kianan,
usai ka ñu inúakëxa kiax kiti 'ik?
Anu kara achúshi uni axa usai ka 'iakëxa, kixun kuatankëx asérabi ka usai ñukama inúakëxa kiti 'aíma 'iti 'ikën.
Ax ka usai ka 'iakëxa kiax kiti 'ikën,
ki ka asérabi ka usai ñu kiakëxa kiax kiti 'ikën.”
10 Ësai ka Nukën 'Ibu asérabi kiakëxa:
“Mitsun kamina uisakin karana ñu 'akën akama ñuiti 'ain.
Mitsux kamina 'ën unikama 'ën kaisa a 'ain,
'ëmi katamëkin 'unánkin kamina, 'ëx karana ui 'ai kixun 'ë 'unánkanti 'ain.
'Ëx 'isama 'ain ka uinu 'ikë bëtsi diosbi asérabi 'aíma 'iakëxa.
'Ianan ka 'ëx pain 'ia 'ain bëtsi dios 'aíma 'iti 'ikën.
11 'Ëx ishi kana Nukën 'Ibu a 'ain;
'imainun ka 'ësaribi axa ië́mianankë 'aíma 'ikën.”
12 Ësai ka Nukën 'Ibu asérabi kiakëxa:
'Ëx kana kiakën 'imainun kana 'ësaribi a ñui kiakën: 'ën kana mitsu ië́mian;
uinu 'ikë bëtsi dios 'unánkëma ka usakin 'ama 'ikën,
mitsun kamina uisakin karana 'ën ñu 'akën kixun ñuikanti 'ain.
13 Bërámabi 'iá 'aish kana 'ëx Dios a 'ain.
Uínbi ka 'ën kushinua uni chikintima 'ikën.
Uínbi ka 'ën 'akë ñu 'aisama 'inun kamina 'ai kixun 'ë katima 'ikën.
14 Israel unikaman 'Ibu Dios 'upíira,
an atu ië́mikë ax ka ësai kiaxa:
mitsu ië́mikin 'akinuxun kana Babilonianu suntárukama xuti 'ain,
'akian anun ëmanu atsínti ain xëkuëkama rurupanun xuti 'ain,
usokin atun ëma masókin 'aia isi ka caldeo unikamax masánuituti inkanti 'ikën.
15 'Ëx kana Nukën 'Ibu an Israel unikama unio a 'ain,
'ianan kana Dios 'upíira, mitsun 'apu 'ain kiax ka kiakëxa.
16 Nukën 'Ibun ka parúmpapa anúan ain unikama kuanti panarabënun 'imiakëxa,
usokin 'akin ka anua 'umpax kushiira nëminra 'ikë axa me rakati bai 'i ëskinun 'imiakëxa,
17 an ka suntáru kushiirabu anuax,
'akanankë caballonën nirinkë a 'imainun ain caballokama anuxun këñukin atu 'ati buania kuanun chikíankëxa.
Usakin buani kuanxi ka a suntárukama bakami ki amiribishi nirutëkëni baiskima 'inun këñuakëxa,
usai 'ika tirí këñuti bënakë usai 'ikankëxa.
18 Bërí ka Nukën 'Ibu ësakin ain unikama kai kiáxa:
“Bëráma inúkë ñukama akamina sinántima 'ain,
'ianan kamina 'ia ñukama aribi amiribishi sinántëkëntima 'ain.
19 'Ën kana ñu ió 'inun 'atëkënti 'ain,
'aia kamina bëríbi mëratia iskanti 'ain,
anu uni 'ikëma menu kana achúshi bai 'imiti 'ain,
'imianan kana anu ñu 'irukëma me anuribi, baka 'imiti 'ain.
20 Usakin 'aia ka ñuina raëkëma,
an ñuina bamakë 'ain nami pikë ñuina chabu a 'imainun, ñuina pëchiñu avestrus kakë akamanribi 'ë rabiti 'ikën,
usa 'ain kana 'ën anu uni 'ikëma menu 'umpax kushiira chikiti manámi ki 'inun 'imin,
'imianan kana me anu ñu 'irukëmanu bakakama 'imin, 'imia ka 'ën kaískë unikaman a 'umpax xëati 'ikën,
21 a unikama kana 'ën uniokën 'ë rabinun,
usa 'ain ka atun 'ë rabikanti 'ikën.
22 'Aínbi kamina Israel unikama Jacobnën rëbúnki,
mitsun 'ë baritisama tani atsankin 'ë ënkankën.
23 'Ë kamina 'aímai këñutanun ovejakama xaroxuama 'ain,
'ianan kamina 'ë rabikin ñuina xaroma 'ain.
'Ën kana mi atsaniabi ubíokin 'ëmi ñukama 'inainshinun káma 'ain,
'ianan kana kuëëniamabi ubíokin tsëpasa ñu sanuira xaromiama 'ain.
24 'Ianan kamina kuríkinën tutish sanuira a maruama 'ain,
'ë 'inainshiti bëkësa obëtsinkin bënuxun,
'ianan kamina ñuina rëxun xarokë aín xëni bikë anunbi mitsun 'ë kuëëmiama 'ain.
Usokin 'akinma kamina 'itsaira mitsux 'uchakë anun 'ë atsamiakën;
usokëx kana mitsun ñu 'atima 'aimi 'uchakë anun 'ëx nishakën.
25 'Aínbi kana 'ëx mitsun Dios 'ixun, uni 'aimi 'uchakëkama a tërënxunkin uinsaranbi sinántëkëntima 'ain.
26 Ñu 'atima 'ai 'ëmi banai 'uchakë 'ixun kamina 'ëbë banakin añu kaina a 'ën mëníonun 'ë kati 'ain.
Kakëxun kana mitsux kaina asérabi ñu 'atima 'akëma upí uni 'ai kixun isti 'ain.
27 Min chaitiokëkama axirapaia tsóa ax ka 'uchakëxa,
an mitsu ñu 'unánmikë unikaman ka 'ën kakëxun kuaisama tankankëxa,
28 mitsun 'apukaman ka anuxun 'ë rabiti xubunuxun atun kuëënkësa okin 'aisama ñu 'akankëxa;
usakin 'aia kana Israel unikama Jacobnën rëbúnki mitsu
masókin këñuanan mitsumi kuaikanun ëankën kiax ka Dios kiakëxa.