Nukën 'Ibun ka ax Dios 'ixun ñu 'atima okin 'aíma
44
Ësai ka Nukën 'Ibu kiakëxa, bërí kamina 'ën kakëxun Israel unikama Jacobnën rëbúnki mitsun kuati 'ain,mitsux kamina 'ën uni 'iti 'ën kaískë 'ain.
2 'Ën kana min 'Ibu 'ixun mi uniokën,
usa 'ixun kana puku 'ukëmëuküax bakënux uninun mi 'imiakën,
usa 'ain kana mi 'akinin.
Kamina rakuë́kantima 'ain Jesurún mitsux kamina 'ën uni 'ën kaisa Jacob aín rëbúnkikama 'ain,
3 'ën kana anu uni 'ikëma menua 'umpax 'inun 'imiti 'ain,
'imianan kana me ëskikë anuribia xëxákama rakanu 'imiti 'ain.
'Ën kana min rëbúnkikama amiribishi upiti tsókanun 'imianan,
upíokin sinánxunkin 'akinti 'ain.
4 Usokëx ka xubi 'umpaxan upíokin chabókëx koi upiti 'irukësa 'ianan,
álamo kakë ikama baka kuëbí nikësa usaribi 'ikanti 'ikën.
5 Usa 'ain ka achúshi uni kiti 'ikën: 'Ëx kana Nukën 'Ibuna 'ain',
bëtsíxribi ka ax ka Jacobnën rëbúnki 'ikë kiax anëti 'ikën,
'imainun ka bëtsínribi aín mëkënnu: 'Ëx kana Nukën 'Ibunan 'ai kixun kuënëoti 'ikën'.”
Usai 'ikin ka aín anëkëñun Israelnën anëribi kuënëoti 'ikën.
Dios ax ka unin uniokë ñu a manámi 'ikë kixun ñuikë bana
6 Ësai ka Nukën 'Ibu, Israel unikama 'apu an atu biti,
kamabi kushiñu ax kiaxa:
“'Ëx irapain kana ñu 'aíma 'ain 'iakën, usa 'aish kana kamabi ñu këñúkëbëbi anubi 'iti 'ain;
usa 'ain ka bëtsi dioskama ax ësaribi asérabi 'iti 'aíma 'ikën.
7 ¿Uix kara ëbëtan sënën 'iti 'ik?
An unin ka uisa kara, kixun 'ë ñuixunkin kati 'ikën.
¿Uinra kara bërámabi ñuia 'ixun usai ka ñukama 'iti 'ikë,
kianan axa 'iti ñukama aribi ñui kiti 'ik?
8 ¡Usa 'aínbi kamina chuáma tani rakuë́tima 'ain!
'Ën kana usakin kan, bërámabi kana usai ka 'iti 'ikë kixun kakën,
usa 'ain kamina mitsúnbi 'ën usakin ñu 'akëmi 'unánkankë a ñuiti 'ain.
¿Anu kara bëtsi dios ëbë sënën 'iti 'ik?
A mi katamëti bëtsi uni ka 'aíma 'ikën; 'ën kana achúshirabi 'unanima.”
9 Uin kara a rabiti ñu unio a unix ka añubima 'ikën, 'ianan ka unínbia uniokë ñukama ax isa upí 'ikë kixun a ñukama upíokin bërúaia. Usa 'ain ka an rabikë unikama ax bëxuñusa 'aish, añu kara 'aia kixun 'unanima rabinkë 'iti 'ikën. 10 Uin kara ñu charoxun achúshi ñu ax dioskama 'ikëmabi uni oia ax ka aín nëtë ñankaíshibi 'inúmia. 11 Usa 'ain ka an rabikë unikamax rabinkë bërúti 'ikën. An ñukama uniokë ax ka unishi 'ikën. Usa 'ain ka akamaxbi anúan ñu 'atima 'akë isti nëtë anu 'iti 'ikën, usai 'ika atux rabini 'itsaira rakuë́tan bamati 'ikën.
12 Axa manën tëkë unin kara uisakin 'aia kananuna isti 'ain: an ka anuxun xana okë tsi ënxaira anua bitankëxun manë xëtokë sincel anun uisa ñu kara 'aisatania, usakin martillonan chakakin mënioia. Usakin ka ain pëñan kushiokin anun tëkin 'aia. 'Aínbi ka an manën tëëkë uni ax pima 'ianan, 'umpaxbi xëaima 'ianan aín kushi nëtë́ti atsania.
13 'Ianan kananuna axa i tukakën tëkë uni isti 'ain: an ka anun tupunkë a bitankëxun anun tupuntankëxun añu kara 'aisa tanaia abi tankin lapisan 'anan anun turúakin 'ati anúnribi 'aia, 'axun ka anun tëkin manë xëtokën mënioia; usakin 'akin ka uni iskësabi 'itánun upíokin mënioia, usokin 'atankëxun ka anuxun Dios rabiti xubunu nania.
14 'Imainun ka uin kara kunxan 'apatia a 'uítan 'ibúkin chabókin komia; usokin 'akëx ka kunxan a tëatiñu 'iti 'ikën. 'Ianan ka ciprese kakë i 'ianan roble kakë i aribi ninuaxbi chaiira 'inun kanitanun bërúankë 'iti 'ikën. 15 Usai 'ia ka unin tíkati bitsia; bianan ka aín panákama ami sënamënuxun tíkaia; 'ianan ka aín paná raíritan pán xuia; 'anan ka aín paná raíri a rabiti uni tankin 'aia, usakin 'atankëx ka a rabi ami ñanati 'ikania. 16 Usakin 'ananbi ka aín nëbëtsi tukakë a tsi ërë́rutanun tikaia, usokëxa ënxakëbëtan ka anu xuitankëxun nami anun puchákin pia. Usakin 'ai ka anun puchatia. 'Ianan ka ami sënamëti xanai kia: “¡Upíira ka tsi ërë́kë rapasu tsókë 'ikën, sënamëti xanakë ënëx 'ikën!” 17 Usai 'ianan ka i paná tëxëkë a uni tankin 'aia, usakin 'atankëx ka ami ñanati 'ikin rabikin ñukákin: “¡Mix 'ën dios 'ixun kamina 'ë ië́miti 'ai kixun kaia!” 18 A unin ka añu ñubi 'unanima 'ianan kuatima; usa 'aish ka bëruñu 'aishi bëxuñusa 'ixun iskamakësa 'ikën, 'imainun ka aín sinánkë a sinánkamakësa 'ixun asérabi ka ax 'ikë kikë bana a sinánkin kuatima. 19 A unikaman ka usa ka ñu 'ikë kixun sinanima, usai 'ikin ka usa ka ñu 'ikë kixun 'unanima kia: “Ka i paná raíri a tsi ërë́nkënu ëxkubutánun puruia, purutankëxun ka anu pán xuia, 'anan ka namiribi anu xuixun pitankëx ka nami kana xuixun pia kiax kia; kianan ka raíri i panákama ënë kana 'aisama 'ikëbi 'an, ¡'ianan ka 'ën rabikë ñu ënëx i paná 'akë 'ikëbi 'ën rabikë ikë kiax kia!” 20 Asérabi ka ax chimapu pikësashi 'ikën. Ax ka unin nu këmëkin sinánxun paránkëshi 'ikën. A unikamax ka ië́tima 'ikën. Usa 'ixun 'ën 'akë ñukama ënëx ka këmëkinshi 'akë 'ikë kixun 'unanima.
Nukën 'Ibun ka Israel unikama 'ain 'uchakëkama tërënkin ië́mia kikë bana
21 “Nukën 'Ibun ka Israel unibu kakëxa: Jacobnën rëbúnki
mitsun kamina sinánti 'ain, mix kamina 'ën uni 'ai kixun kanan;
mix kamina 'ën unio uni a 'ain kixun kakëxa.
Usa 'aish kamina Israel unikama mitsux 'ëmi manútima 'ain kixun.
22 'Ën kana 'atima ñu 'aimi mitsux 'uchakëkama a nëtënxuan
mitsun 'uchakama tërënxunkin naínu 'ikë nëtë kuin 'ikësaia nëtë́nun 'imian.
Usa 'ain kamina 'ëmi sinanatëkënti 'ain 'ën kana mi ië́mian.”
23 ¡Naíkamë 'ëo ax ka munuma kuëëni kuënkënti 'ikën, usakian Nukën 'Ibun ñu 'akë a isi!
¡Munuma kuënkëni ka me chaiira nankë́kë kamax unix 'ikësaribiti 'iti 'ikën!
¡Aín bashikama 'imainun ninu 'ikë ikama
axribi ka munuma unix 'ikësai kuëënti 'ikën,
Nukën 'Ibun ka aín kushi chaiira ismikin
Israel unikama Jacobnën rëbúnkikama ië́miaxa usa 'ain!
24 Ësai ka Nukën 'Ibu an mi bitëkënkë ax kiaxa,
an ka mitsu ënë menu min titan bakëntisa 'ikëmabi 'akëxa:
“'Ëx kana an kamabi ñu unio Nukën 'Ibu a 'ain,
'anan kana 'ën naíkamë 'ëo chaiira 'inun pënimëtanun 'imiakën 'imianan kana meribi anubia rakati anu nankën usakin 'aia ka uínbi 'ë 'akianma 'ikën.
25 'Ën kana an këmëkin ñu ñuikë unikama kiasai 'inun ëniman;
'ën kana an ñu tankë unikama atun sinánkësokin 'aíma ñunshinbakënu 'imin.
'Ën kana an ñu 'unánkë unikamaxa usai ka ñu 'iti 'ikë kikë usai 'inun ñu 'imiman,
usa 'ain ka atúxa usai ka ñu 'iti 'ikë kikë ax ñankáishi 'iti 'ikën.
26 'Aínbi kana 'ën unikamaxa usai ka ñu 'iti 'ikë kikësaibia ñu 'inun 'imin,
'imianan kana 'ën xukë unikaman sinánkësa oia ñu 'inun 'imin.
'Ëx kana Jerusalén ëmanu ka amiribishi uni tsótëkënti 'ikë kin,
'ianan ka Judá ëmanu 'ikë ëmakama ka amiribishi birutëkënti 'ikë kiax kin.
'Ën kana an ñu mëëkë unikaman amiribishi axa ami nishkë unikaman aín kënëkama rurupa a birutëkënun 'aminuxun 'ain.
27 'Ën kana parúmpapa kamina ëskiti 'ai kanan aín bakakama 'umpax ñuma 'inun ëskinun kati 'ain.
28 'Ën kana Persianu 'ikë 'apu Ciro a kan: min kamina bërúankësa 'ixun,
min kamina 'ën kuëënkësokin kamabi 'ati 'ain; 'ianan kana 'ën Jerusalén kan:
mix kamina amiribishi birutëkënkë 'iti 'ain; 'imainun ka anuxun 'ë rabiti xubu aribi 'atëkënkë 'iti 'ikën: 'Akin ka aín tapúmixun an ñu mëëkë unikaman maxax purutëkënti 'ikën.”