Nukën 'Ibun Ciro kakë 'apu usakia ñu 'anu ká ñuikë bana
45
Nukën 'Ibun ka Ciro kakë uni 'apu 'imixun,aín mëkënan tuínxun 'akësokin,
bëtsi menu 'ikë unikama 'akin 'amiakëxa,
'anan ka 'apukama anun 'akánanti bikuanun 'amiakëxa.
Nukën 'Ibun ka Ciro kakë 'apun ismainunbi anun ëma kënëara xëpútikama uínbi xëputëkëntisama 'inun xëókinun 'imiakëxa.
Usa 'ain ka Diosan kakëxa:
2 'Ëxpain rëkuë́nkiani kuankin kana aín bashi chairukëkama a me sapan rakátanun rurupati 'ain,
'anan kana anua atun ëma xëpukë manë tunan 'akë xëputi akama ëchikibunun 'imiti 'ain,
'imianan kana xëputi takáshkakë manëkama axa tsasibunun 'imiti 'ain.
3 'Ën kana mi 'inánti 'ain ñu kupíkë unin unëkin nankë akama 'ianan,
unëkian unin 'unántisama okin anu nantinu nankë aribi mi 'inánti 'ain.
Usakin 'inánkëxun kamina min 'unánti 'ain 'ax ka Nukën 'Ibu 'ianan,
Israel unikama Dios a 'ikë kixun, usa 'ain kana min anën mi kuëan.
4 Min 'unánkëxumabi kana upíokin mi 'ën uni Israel Jacobnën rëbúnkikama,
'ën kana mi kaisakën kaískin kana min anën mi kuëankën,
usokin 'akë ka unikaman mi nuibatia 'ën kana mi 'apu 'imian raíri 'apu kamasamaira 'inun.
5 'Ëx kana Nukën 'Ibu 'ain, usa 'ain ka 'ësaribi 'aíma 'ikën;
usa 'ain ka 'ësaribi bëtsi dios 'aíma 'ikën.
'Ën kana 'ëmi 'unánkëxumabi,
usaími 'akananux mëníokanun 'imian,
6 usa 'ain ka amiaxa bari urukë 'imainun amia bari kuabúkë,
anuxun bëtsi dios 'ësaribi ka 'aíma 'ikë kixun 'unánkanti 'ikën.
'Ëx kana min 'Ibu 'ain, 'ësaribi ka 'aíma 'ikën.
7 'Ën kana nëtë xabá 'inun 'imianan bëánkibukë aribi uniokën;
'imainun kana upia ñu 'inun 'imianan 'atimaribia 'inun 'imin.
'Ëx mitsun 'Ibu 'ixun kana usaía kamabi ñukama ñu 'inun 'imin.
Nukën 'Ibux ka kamabi ñun 'Ibu 'ikë kikë ñuikë bana
8 “'Ën kana manámixunbi 'ën kushi xuti 'ain,
ax ka naínuax kuénkuru 'ibúmainun kuin kamanuax 'uí 'ibúkin me chabókë usaribi 'iti 'ikën;
'imainun ka anun ië́ti ax ñu bimisa 'iti 'ikën,
'ianan ka ñu 'upi 'ati ax ñu uábukësa 'iti 'ikën.”
Dios ax ka an unio ñukama manámi 'apu 'ikën
9 Achúshi tasun me 'akë an ka asaribi tasunbëtan,
an 'akë uni a kuëbitima 'ikën.
Chua me an ka anun tëkin 'akë uni a katima 'ikën:
“¿Añu kaina min 'ai kixun kati 'ik?”
'imainun kara an 'akë ñu anbi an 'akë a kati 'ikën:
“Mix kamina tëëti 'unánma 'ai kixun.”
10 'Imainun kara tuákën aín papa ënë menuxun
bakë bëchia a ñukati 'ikën.
11 Ësai ka aín Israel unikama 'Ibu Dios upíira an unio ax kia:
“¿Mitsun kaina uisai kara 'ën bakë bëchikëkama 'inuxun 'aia 'ë ñuixuanan, uisakin karana 'ën ñu 'ati 'ai kixun 'ë 'unánmiti 'ain?
12 'Ën kana mekama unionan anu 'ikë unikama 'akën,
'anan kana naíkamë 'ëo 'ën mëkënan pëninkësa okin 'akën,
'anuxun kana anu 'ikë 'ispakama mëranun 'imiakën.
13 'Ën kana Ciro kakë uni 'apu 'ixun abë 'akanankin uni ñusma okin anun 'amiakën,
usa 'ixun kana 'ën ñu 'akian tëmërakimaishi 'anun 'amiti 'ain;
'amikëxun ka an 'ën ëma birutëkënun 'amianan axa ami nishkë unikaman bibiankin uan akamaribi chikínti 'ikën,
'aínbi ka 'ë kamina kupíoti 'ai kiax kitima 'ikën.”
Nukën 'Ibu kamabi kushiñuira ax ka ësai banai kiaxa.
14 Ësakin ka Diosan Israel unikama kaxa:
“Egipto menua 'ikë naënu 'ikë unikama,
'imainun an ñu marukë Etiopíanu 'ikë unikama,
'ianan Sabánu 'ikë unikama,
atux ka nënkëirabu 'ikën akamina,
mitsunu 'inamëtia ñu mëëmiti 'ain;
usokëx ka manë risin tëkërëkakë 'aish mitsu kaxú, kuani mitsu bëtanain rantinpurunkin mitsu kati 'ikën:
Asérabi ka Diosan mitsu 'akinia,
usa 'ain ka bëtsi dios 'aíma 'ikën.”
15 'Aínbi kamina mix achúshi Dios istima,
an Israel unikama ië́mikë a 'ain.
16 Kamabi an uniotankëxun bëtsi ñukama rabikë
unikama ax atumia unikama kuaikëbë katë́ti rabinkë anunbi ñuumara 'iti 'ikën.
17 'Aínbi ka Nukën 'Ibun Israel unikama a ië́miakëxa,
ië́mikin xënibua 'aínbi 'itiokin ië́miakëxa.
Usa 'aish ka uínsaranbi katë́ti ñuumara 'itima 'ikën.
18 Ësai ka an naíkamë 'ëo unio,
Nukën 'Ibu Dios ax kia,
an ka me 'atankëxun anubia 'itinu nankëxa,
mex ka ñankáishi rakatima 'ikë anu ka uni 'iti 'ikën:
'Ëx kana Nukën 'Ibu 'ain, usa 'ain ka bëtsi 'aíma 'ikën.
19 'Ëx kana unëax banananbi uinu kara me bëánkibukë 'ikë anuaxbi banaima.
'Ën kana Jacobnën rëbúnkikama kaiman:
'Ë kamina anu ñu 'ikë anua barikanti 'ain.
'Ëx mitsun 'Ibu 'aish kana asérabi këmëima upiti banai ësai ka ñu 'iti 'ikë kin.
Nukën 'Ibu ka unin a rabinuxun 'akë ñukama masóti 'ikë ñui kia bana
20 “Kamabi unikama axa bëtsi menu buánkëx tëxëkë,
mitsux kamina rikuatsini 'urama timë́ti ukanti 'ain.
Mitsun kamina ñu 'unánma 'ixun unínbia,
a rabinuxun 'akë i a 'iabiankin buani kuankanin,
an mitsu 'akinumabi kamina dioskama ñukákanin,
ñukákëxunbi ka a dioskaman mitsu ië́mitima 'ikën.
21 Usa 'ain ka timë́kankë 'ain añu karamina mitsun a ax kiti uni anu 'iti 'ikën, ax ka uin kara
ësokin 'ati sinánxun axa kiax bëtsibë bëtsibë ñukákananti 'ikën:
¿Uin kara bërámabi ënë ñukama 'isama 'aínbi kitabati usai ka ñu 'inuxun 'aia kiax kiakëx?
¿Uixira kara bërámabi usaía ñu 'iti ñui 'itabakëbë usai ka 'inuxun 'aia kiakëx?
¿'Ëx karana min 'Ibu 'aish axa a ñukama ñui kia 'ama 'ain?
Usa 'ain ka 'ësaribi Dios uinubi 'aíma 'ikën.
Uinubi ka 'ësaribi Dios an ain unikama bëtsibë 'akanania kananmikin ië́mikë 'aíma 'ikën.
22 Usa 'ain kamina 'ën mitsu ië́minun 'ënu ukanti 'ain,
uinu kara me kuainakëakëxa anu 'ikë unikamaxi ka 'uti 'ikën,
'ëx Dios 'ain ka bëtsi 'ësaribi 'aíma 'iti 'ikën.
23 'Ëx kana sinanatëkëntima oi ëbi kiakën,
ki kana 'ën kana 'ëmi nishkë unikama kanankin 'ati 'ai kiakën,
kia a banakama sënë́nmikin kana 'ati 'ain:
usa 'ain ka a bana sënë́nkëbë kamabi nëtënu 'ikë unikama 'ën ismainunbi rantinpuruni tsóbuti 'ëmi 'ikin,
min kakësa okinbi kananuna sinanatëkëntima okin 'ati 'ai kiax atux,
24 kiti 'ikën: Nukën 'Ibun ka ax
kushiira 'ixun kamabi axa ami nishkë unikama 'ati 'ikën.
Usa 'ain ka uikamax kara 'ëmi nishi 'ë istisama tania akamami uni kuaiti 'ikën.
25 Asábi ka 'ën 'akë ñukama kupín ka kamabi Israel unikama
ami nishkë unikama kanankin 'atankëx, 'ën 'akë ñukama ñui anun rabikanti 'ikën.”