Isaías 46

Nukën 'Ibu ax ka Babilonianu 'ikë dioskama usamaira 'ikën

Bel kakë dios ax kapumëmainun ka

Nebo kakë axribi Babilonianuax menu pakëtia.

Usa 'ikë ka unínbia a rabinuxun 'akë ñukama a an ñu papikë ñuinakaman aín kaxunu nankë 'ikë buania,

usa 'aish ka 'iëira ñu 'ikën axa atsankë ñuina kamanan.

2 Usa 'aish ka dioskama kapumë kuaianx menu pakëti abi iëtisa 'aishbi 'ima,

usa 'ain ka atuxi bëtsi menu kuanima.

3 Jacobnën rëbúnkikama mitsun kamina 'ëx kia kuati 'ain,

mitsux kamina Israel unikama bërukë akamaribi 'ain:

'Ën kana mitsu bakëntisa 'ikëmabi,

'ën pëñanu 'aruxun 'akësokin bërúanxun bëakën,

4 usa 'ain kana 'ëx mitsúxmi kaniakëkëbëbi usabi 'iti 'ain,

'ianan kana uínsaran kaina mitsun bu 'uxua 'irukani usai 'iabi bërúankin mitsu 'akinti 'ain.

'Ën kana mitsu usakin 'akën,

usa 'ixun kana usakinbi bërúankin,

'ën mitsu ië́miti 'ain;

5 ¿Ui kaina mitsun ax ka 'ësaribi 'ikë kixun kati 'ain?

¿Ui iskësa karana 'ëx 'ai kixun kaina mitsun sinánkanin?

6 Anu ka unikama 'aisamaira kuri aín ñusuti

bianan manë uxua, bitankëxun anun ñu tupúnti 'akë anun tupunkë 'ikën;

usakin 'atankëxun ka an ñu unioti 'unánkë

achúshi uni baritankëxun abi rantinpuruni tsóbuti ami ñanákian rabinun 'axúnun 'inania.

7 Usakin 'akë ka unikaman ain tëxatan 'iabiankin uania;

uantankëxun ka anu nanti 'akë anu nitsinia,

nitsinkëx ka ubitima anubi nitsia.

'Aínbi ka munuma banakin 'akinun kixun ñukákëxunbi ka uisakinbi kaima

'ianan atúxa tëmëraiabi ië́mima.

8 'Uchañu unikama mitsun kamina sinánti 'ain,

mitsux kamina paránantima 'ain upiokinshi kamina sinánkanti 'ain;

9 usai 'ikinma kamina bërámaira 'ia ñukama a sinánkanti 'ain.

'Ëx kana Dios 'ain, usa 'ain ka bëtsi 'aíma 'ikën;

Dios kana 'ëx 'ain, usa 'ain ka 'ëbëtan sënën bëtsi dios 'aíma 'ikën.

10 'Ëx kikë ënëx usai ka ñu 'inuxun 'aia 'ëx kia 'ikën;

kianan kana axa 'iti ñuribi ñui bërámabi kiakën.

Usa 'ain kana 'ëx kin: Usa 'ain ka 'ën sinánkë ñukama ax usaibi 'iti 'ikën;

'ën kana uisa ñu 'anux karana kia a kamabi 'ati 'ain.

11 'Ën kana achúshi uni amiaxa bari urukë auküaxa,

an ñuina bamakë pikë ñuina pëchiu 'urakëox ukë usaribi kuatsinia unun kuëan,

a unin ka 'ëx kikësa kinbi 'ati 'ikën.

'Ëx usakin 'akatsi kikësa okinbi kana 'ati 'ain,

usakin kana sinan usa 'ain kana usaibi 'inun 'imiti 'ain.

12 Kamina kuakanti 'ain, bana kuakëma unikama,

anun 'ën mitsumi nishkë unikamanua mitsu chikíntisa basipain 'ikë kixun kamina sinan kanin:

13 'Ën kana 'ën 'ati ñukama axa 'urama 'inun 'imiti 'ain;

usa 'ain ka 'ëx ië́mianankë ax 'uramara 'ikën.

'Ën kana Sión kakë ëmanu 'ikë unikama ië́miti 'ain,

'ën kana Israel unikama 'ë 'akësaribi okin uisakinbi kanunma 'imiti 'ain.