Nukën 'Ibu Dios an nu unio a kananuna nëtë xënibuamashi i sinánti 'ain
12
An kamabi ñu unio min 'Ibu Dios a kamina mix bëná 'ixuinshi sinánti 'ain, anun tëmërati nëtë ka 'inuxun 'aia usa 'ain; 'ianan ka anunmi ësai ki banati baritiaribi 'iti 'ikën: “'Ën ënë nëtënu tsókin 'akë ñukama anbi ka 'ë kuëënmitima 'ikën.” 2 Usa 'ain kamina barin pëkakë 'ianan 'uxë 'ispa akaman pëkakë 'aínshi 'anan 'uñe 'ibúkë 'aia kuinribi 'ibúkë 'aínshi min 'Ibu Diosmi sinánti 'ain. 3 Usa 'ain ka mix kaniakëkë 'ikëbë min pëñankama ami katamëti bëruankakë ax bërëkimainun anun mi nikë min xokama axribi bamai kushima 'iti 'ikën; usai 'imainun ka min xëtakamax achúshi achúshi ëchikimainun kamina min bërukamaribi kurukëbëtan bëxuñu 'ixun anun iskasmati 'ain. 4 Usai 'ianan kamina ëmanxun ñu mëëkë abi kuatima 'ain; 'imainun ka mixmi banakëxi rakuë́ti banai tërubëntsinan banakësa 'iti 'ikën, 'ianan kamina pëkarakëma 'aínshi 'isá banatabakë anu aín bana kuatimabi bësuti 'ain; 5 'ianan ka matá mapërakëti rakuë́ti 'ianan, bairibi anun nisama 'iti 'ikën.'Imainun ka amukutanën uábukin taëoti 'ikën, 'imainun ka champu 'imainun muxañu i ax ñu achúshi tsamankësa 'iti 'ikën.
Usa 'ain ka unikaman ñuia uanxun anu bamaia maínti anu xënibua 'aínbi anu 'inun uni maínti 'ikën,
usa 'ain ka ñukë uni a bënini inia
anun ëmanu niti bainuxunbi kuakë 'iti 'ikën.
6 An kamabi ñu unio ami kamina bamakëma pain 'aish bërí sinánti 'ain, unin bamati ax ka manë risi tëkimainua ñamikënti kuri 'akë ax tukibukësa usaribi 'ianan ka ami 'umpax biti chumu anuaxa 'umpax chikíkë aín kuëbími 'i tukibumainua anua 'umpax biti kini manámi bëntankë manë mañakë tukikë usashi ka unin ñuti 'ikën.
7 Usa 'ain ka a nëtë 'ikëbë uni me putu unio 'aish mebi 'itëkënti 'ikën, 'imainun ka aín bëru ñunshin ax Diosnubi kuantëkënti 'ikën.
8 'Ëx an bana ñuikë uni 'aish kana ësai kitëkënin:
¡Ënë menu tsókin unin 'akë ñu ax ka ñankáishi 'akë 'ikën!
¡Usa 'ain ka kamabi ñu ax uínbi 'unántisama 'inun 'ikë 'ikën!