An ñu mëëti 'unán xanu rabi kiti bana
31
10 Xanu an ñu 'ati 'unán irakë ax ka 'ashi buinxun bënë́kinshi mëratisama 'ikën;¡usa xanux ka ñu 'upíira iskësamaira 'ikën!
11 Usa xanu ka ain bënën amira sinánkin nuibatia,
'ianan ka aín xanu 'ain kuríki kanankë anun uínsaranbi kuríkiñuma 'ima.
12 Usa 'ixun ka a xanun 'ain bënë ñu chakama kuëënmikin 'axunia,
anua ax tsókë nëtëkaman.
13 'Anan ka a xëonuxun xapu 'akë ñuman baritankëxun maruxun,
aín mëkënan anunbi tëkin xëokin añu kara 'aisa tania a 'aia.
14 Nunti chaiiran bëkësa usa obëtsinkin ka
'ain piti ñukama bitsínkin 'urakëo bëia.
15 Pë́karakëma 'aínshi nirutankëxun ka
aín tuákama 'imainun an ñu 'axunkë xanukama piti 'axun pimia.
16 'Ianan ka upiokin pain ñachatankëxun me aín tëkënëan bikë kuríki anun maruia,
marutankëxun ka anun kananuxun uvas a menu 'apámia.
17 Usa 'ain ka kuëënkin ñu mëëia,
ñantainshi 'apunkin bari kuantamainun ñu mëëia.
18 Usakin 'anan ka ñu maruti nanxun axa upí 'iti kuëënkin bërúaia,
bërúai ka kamabi imë́ 'ain ñu 'ai tëia.
19 'Anan ka aín mëkënanbi chupa 'anan
bëtsi ñukamaribi ñuman bixun xëoia.
20 Usakin 'akin ka uni ñuñuma kama 'imainun,
an ñu kuëënkë unikama aribi ñu 'inánkin 'akinia.
21 Usai 'ianan ka matsi 'ibúkëbëtan karana añunën 'ën tuákama rakuti 'ai kixun sinani bënëtima,
aín xubunu 'ikëkama ax ka matsin 'aisama okin chupa 'upiokin pañuax 'ia.
22 'Aínbi ka anúan rakuti chupa aín mëkënanbi 'aia,
'anan ka chupa upíira aín mëkënanbi 'akë aribi pañuia.
23 'Imainun ka 'ain bënë ain ëmanu 'ikë unikaman kamaxunbi 'unánkë 'ia,
usa 'aish ka a menu 'ikë unikaman usa kamina mix 'ain kixun uínbi kakëma uni 'ikën.
24 'Ianan ka tari 'anan anun tsitëkërëkikë akama,
'atankëxun an ñu marukë unikama maruia.
25 Usokin ñu 'ai upiti tsóti ka añu karana,
nëtëitsi pëkarakëbëtan 'ati sinani bënëtima.
26 'Ianan ka sinánxira banakin aín tuákama
nuibakin upíokin bana 'unánmia.
27 Usa 'ixun ka aín xubunu 'ikë ñukama upíokin bërúaia,
'ianan ka an tëxun bikëma ñu uínsaranbi piima.
28 Aín tuákama 'imainun 'ain bënën ka a rabikin ësokin kaia:
29 An upíokin ñu mëëkë xanukama ka 'itsaira 'ikën,
'aínbi kamina mixira atusamaira 'ain.
30 Upíira ñu isími kuëënkë ax ka këmëishi 'ikën,
usa 'ain ka ñu upíira ax ñankáishi 'ikën,
usa 'aínbi ka an Dios rabikë xanu ax kuni usa ka ax 'ikë kixun rabikë 'iti 'ikën.
31 ¡Usa 'ain ka an 'akë ñukama a 'unánkin kamabi,
ëmanu 'ikë unikaman rabiti 'ikën! ¡'Anan ka usakin ñu 'aia rabikë 'iti 'ikën!