9
7 ¡'Ën kana mitsu kuëënmikin kain! Usa 'ain kananuna xëanan pianan kuëënti 'ain, usakin 'aia ka Diosan nun 'akë ñukama 'upi isia. 8 'Ianan kamina nëtë kamabi chupa mëníokakin pañuanan, 'iníntisa ron 'iti 'ain. 9 'Ianan kamina ami nuibakin kuëënkë min xanubë kamabi nëtën kuëëni tsóti 'ain, usaími mix ënë nëtënu tsóti abë 'iti ka Diosan mi 'inánkëxa; 'aínbi ka nun tsóti ax xënibua 'aish nun xanubë 'upitax tsókë ax asábi 'ikën. 10 Usa 'ain kamina añu kara 'aisa 'ikë a min asérabi 'aisatankin kuëënkin 'ati 'ain; anua nu bamaia maínkë anuxun kananuna añu ñubi 'anan sinanimabi 'ianan, añu karana 'unánti 'ai kixunbi sinántima 'ain.Uisa ñu kara 'upiokin 'aisa 'ikëbi unin 'akëma ñu 'ikë ñuikë bana
11 Ënë nëtënua kana bëtsi ñuribi isan: akaman ka kushiira abákë anbi bëtsi kananima, 'ianan ka ax 'akanantimi rakuëma unínbi 'akanankin kananima; 'imainun ka ax sinan ñuira unikama axi ka pitiñu 'ima 'ianan ka an bënë́kinshi ñu 'unánkë unikama axi ñuñuira 'ima, 'imainun ka ñu 'unáinrakë unibi kamaxunbira unin kuëënima; usa 'ain ka a ñukama uínsaran kara ax usai 'iti nëtë 'ikëbë pakëtia nëtë anuinshi unin biti 'ikën. 12 Usa 'ain ka uínbi 'unanima, uisai kara 'iti 'ikën, anúan usai 'iti nëtë 'ikëbë 'iti 'ikë kixun: usa 'aish ka tsatsakama anua këñurutia rika nankë anu këñurukësai 'ianan ñuina pëchiñu anu nipakëti nankënu nipakëkësa, usaribiti 'ikin ka unin, uisai karana ñu 'atima 'inuti 'aisama ñunu nipakëti 'ikë kixun 'unanima.
13 'Imainun kana ënë nëtënua an chaiira ñu 'ë 'unánmiti aribi isan: 14 achúshi ëma chukúma anua 'itsamashi uni 'ikë, aka 'apu kushiira an bëarabuinkin anun 'iruti me bukunkin 'atankëxun 'anuxun bëarabuiankëxa. 15 Usa 'ain ka a ëmanu uni achúshi ñuñumara 'iakëxa, 'aínbi ka a uni sinánñuira 'iakëxa, usa 'ain ka a unin sinánñuira 'ixun an ëma ië́misa 'iakëxa. ¡Usa 'aínbi ka a uni uínbi ami sinántisama tankin ñukáma 'ikën!
Unin ñu 'unánkë ax ka kushi unibëtan sënë́nma 'ikë kikë bana
16 'Aínbi kana 'ëx kin, sinánñuira 'iti ax ka rakuëma unibëtan sënë́nmaira 'ikën, axa sinánñuira 'ikëbi ka uni ñuñuma an sinánkë bana upí 'ikëbi unin kuaisama tanan ax ka asérabi 'ikë kixunbi sinanima.
17 Usa 'ain ka sinánñu unikamaxa upiti banakë ax upíokin kuakë 'ikën,
'aínbi ka an ñu 'unántisa 'ikëbi 'unánkëma 'apu axa munuma banai kiabi kuakanima.
18 Ñu 'unáinrakë 'iti ax ka anun 'akánanti ñukamasamaira 'ikën.
Achúshi okin ñu 'akin, an ñu
'unánkë unibë banaxunma 'akëxun ka an ñu 'atima oia.