Boaz bikanagamohaki ida Rute
4
Hari. Oniaroa, sidaji kavasiribanini kaathania okha'aha ada Boaz. Sidaji bodinia bakatha kamaakarinia vajoronibakhiaki adani ija'ari, ija'ari nasohiva abono vihiki vara vakhanira kaimoni. Hari. Vakadiania okha'aha ada Boaz, vithirari'aha ada Boaz, vithirari'aha. Onaiaroa, radaha'aha ada Noemi kamakhira kohana igamina hoariha Boaz vara bivani'a'iki ada. Boaz bibaranaha'aha, bikaboa'iha kidiania vithina. Vithi'aha Boaz maakarina.2-3 Oniaroa, Boaz va'ora kaboa'ji kaija'i'aha adani sidaji kaija'arini vanasohiva abono 10 vihiki vaipohina vavithirarina vakadiania. Vavithi'ina naothinia Boaz bini'a'aha ada igamina hoariha:
Joi'iki ida Noemi Moabe kaarabonia. Binofiki ida kidimakhira kohana kasiroi-ra pavakari nihavini. Arigamina ada Elimeleque kohana.
4 Onofiki ida kidisiroi kavaranihi. Hari. Ikapavakarivini inofiki; va'ora nava'isohi bana hadani hihadani ija'ari nasohiva abono mahija akavarani-ra vakamithavini. Inofirihi ida kidisiroi; Igamina'i jaboni. Imiro'a inagathogatho bana inofivini inofiravini. Inofirihi; homaina onagathogathohi bana. Igamina ka'oa ohirihi - niha ada Boaz. Makhira Boaz athi-ra gathani'aha:
Okapavakariki bana ida.
5 Oniaroa, Boaz bini'aha:
- Noemi kasiroi-ra ikapavakarihi; ivahojahi jaboni bana ida gamo Noemi kaisai kohana kaariha biniha'iki. Moabita anani ida. Ivaisahi ida gamo, siroi asia hojaki bana Elimeleque kohana kaija'ari vavijaronisiagaki vakadimoni hini - niha ada Boaz.
6 Makhira bini'a'aha:
- Boaz, jokoa onofijanarihi ida siroi-ra okapavakarivini. Okapavakarihi; kodisai vahabini ni-vagahinaki oabinina kamahini. Ivani, inofihi; ba ikapavakari. Ni-okaabokaki ida okapavakarivini - Boaz-ra ni'aha.
7 Hari. Israel kaija'ari vakadihojai hida ija'ari vakadiaarabo-ra vakanaabonakhamavini kamahini bikaani'ihi ida kidisandalia arabo-ra kapavakari'iki-ra no'vini kihi'ihi. Nimania ida Israel kaija'ari vakadihojai, ija'aria avigaja kaimoni ida ka'oa hini, hari hini vakadivarani.
8 Hari. Makhira kidisandalia-ra kaani'aha, Boaz-ra no'avini kaba'i, bini'a'aha:
Ivani ikapavakari bana ida siroi.
9 Oniaroa, Boaz va'ora ni'a'aha adani ija'ari vanasohiva abono, vahoariha vajoroniki vihiki:
- A'onivani, avakamitha'iki hida akadivarani. Hidakaba'i Noemi kania okapavakari'iki ida Elimeleque Kohana kanahina, kidisai vi'bamiki Quilion kohana, Malom kohana vihiki vakadinahina hiki.
10 Malom kohana kagamo-ra ovahojaki jaboni bana ho kodigamo hija kaimoni. Vakadinahina hahavi okapavakariki vakadija'arivanamiyharonisiagaki vakadimoni ida, vaihimirara kaimoni adani Elimeleque kaija'ari vanamitharonisiagaki akadiania. A'onivani oathira avakamithaki a'oni hidakaba'i.
11-12 Vakhaniha adani ija'ari vanasohiva abno, vahoariha khama:
- Hai oamani. Akamitha'iki hida iathini. Deu-ra akanikhariaki avakadimoni: “Deus, ikajoamora bana ida gamo Boaz kagamo kaimoni. Iva'aha bana isai vaipohiki-ra namonahavini. Raquel kohana, Leia kohana va'ora vanamonaha'iki adani isai vaipohiki. Jaco kaisai adani. Anofiki ida Boaz kagamo va'oaniaro fori hini. Israel kaija'ari avikhananavaki adani Jaco kohana kaisai. Deus, ikananahina'ahapiki bana hada Boaz kidija'ari vahararana. Anofiki ida Belem sidaji kaija'arini hahavi Boaz onina-ra avigavini, vavava'ihavini. Anofiki ida Boaz-ra ikajoamoravini bivaisabakhiaja kaimoni ida kidigamo, kidija'ari avikhananaviki fori hira kaimoni” Nimania ida vaathi Deu-ra vakanikhariavini Boaz vakadimoni.
13 Hari. Oniaroa, Boaz bianakara'ihi ida Rute, biavikha'ihi gorana. Deua bikajoamora'ihi, isa'ihi. Makhira isani ada kidisai.
14 Gamoa vani'a'ihi ida Noemi:
- Khai ani'ava ada Deus. Hidakaba'i ira no'a'iki ada kadahanodia. Karahoha, ira kaijahitaki bana ada. Anofiki ida kadahanodi kamahi jahani. Israel kaija'ari hahavia khai vani'aki bana ada.
15 Kada'aboni ira nakaidivaki i. Kidikakodiahi kadania biaradahaki makhira isani ipohiki vakadikakodiahi. Ira no'a'iki ida kadahanodia. Ovaria binajahaki bana ida kadamahi. Na'arihavi ihini kamahini ira kaijahitaki bana ada.
16 Noemia binabiini'ada isai tanaki, bikaba'ona'aha, biakadava'a'aha.
17 Gamo vamaakarina vaibavikia vada va'ora vani'aha, vaabono vakani'akhama'aha:
- 'Bana'iki ada isai Noemi kaimoni - vakhaniha. Isai-ra vanaoniki adani Obedea. Karaho'aha ada Obede, Kidisai Jesse oniki. Arabo kaka'da'dini ada Davi. Davi kaabi'i ada Jesse.
18-22 Davi kohana kaija'ari avikhananavaki vaonina hida.Kama'dani Peres, Peres Kaisai ada Esrom. Esrom kaisai ada Rao. Rao kaisai ada Aminadabe. Aminadabe kaisai ada Nasom. Nasom kaisai ada Salmon. Salmom kaisai ada Boaz. Boaz kaisai ada Obede. Obede kaisai ada Jesse. Jesse kaisai ada Davi.