3 Hari. Badara ipohiki vikhaki adani Elcana Siló sidajia. Deus hahavi-ra kaabokaki-ra khai vani'ara kaimoni, igitha abononia Deu-ra vakanava'igara kaimoni jaboni. Hari. Siló sidajia hojaki ida Deu-ra khai vani'avini ibavini. Eli, kidisai vi'bamiki khama vaibaviki Siló sidajia. Sasidotxi kabadania vaka-badaniki adani. Eli kaisai Hofni, Finéias vaoniki adani.

4-5 Hari. Badara hahavi Elcana bivikhaki ida ovilia, binaabini'iki ida Deus viaha. Deu-ra khai vani'avini karajomini ida. Nothinia Penina-ra no'a'aha ovilia imani pitahani hoarani. Pitahani hoariha Penina kaisai vakadimoni hi'iki. Ana vani ida bino'a'ihi ovilia imani pitahani 'bamikia. Nimania ida kidihojai afoha'oadaha. Elcanabinakaidivaki ida Ana, Deus bino'aravini kaba'i isaia.

6-8 Deus ni-Ana-ra no'aki isaia, oniani ida Penina Ana va'ini-ra kai'dokavini hija. Penina varani jaharikia bianava'irogoniki ida Ana. Niki ida Penina kabadania afoha'oadaha. Deu-ra khai vani'avini kagorania avikhana vani Penina biogarahaja ida Ana. Ana bikamithahi ida Penina bikanavaraniha-vini, oniani hida va'ini namokarani hija. Ni-'baiki ida Ana, asaraka-'oaki ida.

Hari. Elcana binana'dohihi ida Ana:

- Niha inimanija i'bairiki, ia-saraki, iva'ini mokara nika'oaki? Iisarini kaba'i ira ovava'ijaharia koda kadamakhira jahaki ohina kaba'i kadaimoni? - niha ada Elcana.

9-11 Hari. Vi'baina naothinia gaamanani'ihi ida Ana, va'ini ami'aminia binaasaravini kaba'i, Deu-ra vara ni'a'ihi. Niha'ihi: Deus, hahavi-ra ikaabokakii. Vada hora ni'a! Kadahonai abono ho. Inoki hida ova'i mokara nikarahoni. Hari'a hora akava'i'birini, kadahonai abono ho. Hora ino'ahi isaia, onofika'oaki bana hida idai-ra gahinai onihavini kadania oadani. Ni-ija'aria bikava'boaki ida isai ka'da'di kaafani. Ka'oa oamani hida kodivarani-nihi ida Ana. (Ija'ari Deus gahinana hiki karajomini ida ka'da'di kaafani ka'boarini). 12-16 Hari. Deu-ra khai vani'avini kagorani maakarinia vithiha ada Eli. Binokihi ida Ana gaako-soani, bikava'ibodivarani'ihi. Binokihi ida ihini giragirani, ni-athi-ra kamithaki, oniani ida kahanoki bivanihavini hija. Oniania bini'a'ihi:

Niha inimanija ikahanoni-ra ikava'ipahiniriki? Hari'a kavi-ra avijana! - niha ada Eli. Ana bigathani'ihi ida Eli athi:

Ni-okahanorihi. Ni-kavi-ra o'avirihi. Ova'i mokara nikarahoki ho, oniani ida Deu-ra onanamithavini hija kodiva'ibodivarania. Hari'a ikava'ibodivarani hida kodihojai gamo kahojai jahariki fori hini. Nikia Deu-ra vara oni'avini hiki ova'i mokara nikarahoni - nihi ida Ana.

17 Elia bini'aha'ihi:

- Ba okha'a igorania, iva'ini jahajahani. Deus ira no'aki bana iikanikhariakia - niha ada Eli.

18 Ana bini'a'aha:

- Jahaki ida kadavarani kodimoni. Jakana niki namithava kodiania.

Oniaroa, ajihi'ihi ida Ana. 'Bai'ianahi. Naothinia ni-va'ini mokara nikarahojanaki.

19-25 Hari. Ka'afokajomani vagavagani vani Elcana, kidigamo vi'bamiki, kidisai vihiki Deu-ra khai vani'a'aha. Naothinia va'ajihi'aha vaibavia. Masiko ipohiki-ra radaravini kaba'i Elcana bivaisa'ihi ida kidigamo Ana. Kaikahi'ihi ida mahi Ana biva'bana'iki kamahini, 'bana'aha ada isai makhira isani. Binaoni'aha Samuel. Samuel binaonivini hiki Deus kania bikani-khariavini.

Hari. Akajohohari'ina vani Ana biosa'aha ada Samuel Deu-ra khai vani'avini kagorania. Ana Deu-ra kanava'igavini hi'aha ada kidisai. Elcana, Ana khama avikha'iki Eli kania.

26-28 Ana bini'a'aha ada Eli:

- Ikava'ihokimanija ida gamo imaakarinia gaakosoaki Deu-ra kanikharia'iki? Hovani ho. Hihida isai Deus kania okanikharia'iki hada, oniani hida Deus kania oarakhavini hija. Deus kaimoni hada - nihi ida Ana.

Hari. Deu-ra khai vani'a'aha adani Eli, Elcana, Ana khama. Samuel hojahaha'oadaha'iki Deu-ra khai vani'avini kagorania.