ESTER VARANI HINI HIDA
Vastia bikajoniki ida kidimakhira athi
1
1-2 Hari. Pérsia kaaraboi kaka'dadini ada Xerxes niki. Arabo karaho ida pérsia oniki, oniani ida arabo pitahani 127 hiki ipohini-ra napithataha'ia. ibaviki ada arabokaka'da'dini sidaji karaho Susã onikia.3-4 Hari. Oniaroa, Xerses va'ora vaka'da'di'aha adani Pérsia kaaraboni kaija'arini hahavi. Vaipohiki adani kidihonai abono ka'da'di kabadani-ra vaakodiaki. Badara ahoarabakosiki va'ora vaka'da'divini vani arabo kaka'da'dinia banamonaha'ihi ida ihinika karaho. Masiko 6 hiki iohina vani ihinika karaho-ra namonahara ada. vaipohi'oamanira adani kanori aboni. Va'ora kaboa'i'aha adani kidiarabo kaija'arini vavaka'da'diva, kidiarabo avakadava'ava, kidisorara vakadika'da'di, ija'ari vakanahina'ahapikiki vihiki. Va'ora nanikiahi'aha adani kanori abono kidinahina kaidivaki, gorana kaaraho hikia. Ipohiki ida Xerxes kanahina kaidivaki, nokiani jahaki. Ni-nahina-ra kainamoki ada Xerxes.
5 Hari. A'diahi'ihi ida kidihinika karaho, Xerxes binamonaha'ihi ida ihinika hoariha Susã sidaji kaija arini hahavi vakadimoni. Va'ora kaboa'i'aha adani ija'ari vakanahina'ahapikiki, ija'ari vakanahinariki vihiki. Semana hoarani vakaihinikaha'oadaha'aha.
6 Xerxes va'ora honariaha adani kidibadani abono gorana karaho baninini vanajahavini. Ija'ari vajoroniki vaibavi karaho-ra vanaibavijaha'aha. Vanahorivana'ihi ida makari jahaki toroniki nadaraki, koriki, vaforiki hiki. Jahaki ida makari nokiani. Kaidavaki ida. Vanabaviki jaboni ida vithi ibavini ipohiki ouro, prata hikia amonahaki. Vanaibaviki ida nahina jahaki nokiani, kaidivaki mármore oniki ija'aria bivaadahaki ibavini kaimoni.
7-8 Hari. Hojaki ida vinho ahapini kidikanori abono vi'aviki kaimoni. Ni-nahina va'ora nadabaki adani kanori abono vako'avahana. Vinho ija'aria vi'avivini hiki bavini nokiani ipohiki hoarihananaki ouroa amonahaki. Xerxes va'ora honaria'aha adani badani abono:
- Ija'aria binofivini oadani ida vinho, va'ora vano'a bana. Hari'a va'ora vakaathiri kodivinhoa.
9 Hari. Gora karaho bodinia Xerxes kagamoa binamonaha'ihi ida ihinika hoariha kanori abono vakadigamo vakadimoni. Vasti oniki ida Xerxes kagamo. 'Bai karaho jahaki amonahani-ra vahonariahi'ihi ida Vasti, kidikanori abono vakadimoni.
10 Hari. Ihinika anokhomini kamahini vinoa binava'ikhaikhai'aha ada arabo kaka'da'dini. Va'ora baranaha'aha adani honai abono 7 vihiki gorana bodini kabadanihi-ravavaka'da'diki. Xerxe-ra vaakodiabakhiaki adani.
11 Hari. Vikhami'aha adani honai abono, arabo kaka'da'dini va'ora honariaha'aha:
- Vavikhaonani bana ida kodigamo kodiania. onofiki ida kajamari kaka'ouroki-ra kakaimahavini. Va'ora onofivini hiki hadani kodikanori abno Vasti nokiani jahaki-ra vada vani'avini - Va'ora ni'a'aha.
12 Hari. Vastia bivahojaki kania avikhajakosi'aha, vanava'isohi'ihi kidimakhira athia. Vastia mitha bini'a'ihi ida vaathi. Ni-binofiki ida okhani. Okhaonanini-ra kajonivini mani ida kidimakhira nava'ijokojokokarahona hi'ia.
13-14 Hari. Oniaroa, Xerxes va'ora baranaha'aha adani ija'ari vanava'isohiva abono kidiania vikhana. Kidihojai hiki ida honari amonahani viahania va'ora nana'dohivini. Va'oaniaroa avigaki ida va'isohihi, kaabanahi. Avigahaki adani. xerxes kahonai abono vihina kaba'i ka'da'di vihiha jaboni. Bivakaijokaki ida vakadiva'isohihi.
15 Hari. Vaakhano'ina vani Xerxes va'ora nana'dohi'aha:
- Hovani, arabo ipohiki kaka'da'dini ho. Va'ora okarona'iki adani kidihonai abono kodigamo kania avikha'ina, vanava'isohija kaimoni kodiania khani. Ni-khaki. Bikajonimanihi ida oathi. Hora vanava'isohi bana bada oni'aki kaimonia. Nahina mani ida akadiarabo kaija'arini vakadihojai. Nahina mani ida gamo kidimakhira athi-ra naabaravini abosini hija?
16 Memucã oniki ada ija'ari nava'isohiva abono Xerxes athi-ra gathani'iki. Va'ora ni'a'aha:
- Asohiriki ida kadagamo iathini-ra naabaravini. kharini mani ida ira vava'iharavini hija. Haria vava'ihariki jaboni ida. Va'ora vava'ihariki adani makhira hahavi kadaraboa vahojaki.
17 Gamo hahavi kadaraboa vahojakia vakamithaki bana ida varani kadagamo iathini-ra kajonivini. Vakamithavini naothinia va'oaniaro maina vakadimakhira vaathi-ra vakajoninanaki jaboni adani. Vakhanina vani va'ora vavava'iharira adani vakadimakhira afohanana. Vakhaniki bana adani gamo:
- Arabo kaka'da'dini Xerxes onikia bibaranaha'iki ida kidigamo khai, ni-kha'iki.
18 Asia vara niha ada memucã:
- Hidakaba'i gmoa vakamithaki ida Vasti varani hini, vakadimakhira-ra va'ora vara vani 'avini hiki bana ida. Gamo hahavia vakamithavini naothinia vakajonihananaki bana ida vakadimakhira vaathi. Oniaroa, makhira vakadigamo-ra vakaihamahikarahoki afohanana bana - niha ada Memucã.
19 Asia vara ni'aha:
- Akadiarabo kaka'da'dini i. Vara ira ani'avini hiki bana hida akadiva'ibodivarani. Inofihi; bada ini'ahi. Ihonaria bana ida papira jirini amonahani kadarabo kaija'arini kava'isohi hini ogavahaja kaimoni. Ija'ari hahavia mitha vani'aja kaimoni hida va'isohihi inamonahaki, avigaja kaimoni ida athi a'bo'daki, ni-nahina bikaabokaki ida iathini-ra anahoarihavini. Iathini kapapirani kania ihonaria bana:
“Hari'a khajanava ida Vasti kodiania”. Hari. Inajirivini noathinia inako'diha bana ida gamo jahaki hoariha Vasti kahojai jahani-ra aradaki. Vasti aja'dini bana ida gamo hoariha inagathogathoki.
20 Hari. Ija'ari hahavi kadarabo karahoa vahojakia vakamithaki bana hida papira thini inajiriki. Gamo hahavi va'ora vavava'ihaki bana adani vakadimakhira, vaathi vanaabahahavivini afohanana - niha ada va'isohini abono.
21-22 Oniaroa, arabo kaka'da'dini, kidiva'isohihi abono vahoariha khama vavajaha'ihi ida Memucã kavarani, oniani ida Xerxea binamonahavini hi'ia. Bihonaria'ihi ida papira jirini okakosini athii ipohikia, kidiarabo kaija'arini afonana vaathia. Vaibavi hahavia kidiaraboa hojakia bikarona'ihi ida va'isohihi jiriki. Papira athiania va'ora honariaki adani makhira hahavi vagorana kaija'arini-ra va'ora vavaka'da'divini afohanana vaathi vanaabavini.