Xerxea binagathogathoki ida Ester
2
Hari. Oniaroa, radaha'ihi ida Xerxes va'i jokojokokarahoni. Radaha'ihi ida mahi ipohiki, asia bikava'ibodivaraniki ida papira jiriki-ra iakaronaoniki, Vasti-ra nokiajanaravini.2 Oniania, kidihonai abono gorana bada vakhanikia vara vani'a'aha ada Xerxes:
- Akadika'da'ki, ikarona bana hida iathini kadarabo kaija'arini vaibavi hahavia mahija kadahonai abono ima'inavi vanokiana jahaki-ra va'ora avanako'dionivini.
3 Va'ora vakaragaha, va'ora vavikhaha hihida sidaji Susã, vahojara kaimoni adani gamo vaibavina igorani karaho bodinia. Ihonaria bana ada kadahonai abono kadagamo kaimoni-ra va'ora akadava'ara kaimoni Hegai oniki, mahija ima'inavi vikhaki-ra va'ora akadava'avini. Vaafi namani-ra vakamisaibakhiava bana adani Hegai kabadani abono mahija vanokiana jahavini.
4 Hari hi'ihi ida ima'inavi vaasafi-ra vakamisaibakhiavini, ivani inagathogatho bana ida ima'inavi ivajahaki Vasti aja'dini hija kaimoni - vakhani'aha.
Hari. Xerxea bivajaha'ihi ida vakadivarani, binaaba'ihi.
5-6 Hari. Susã sidajia ibaviki ada judeus kaija'ari Mordecai oniki. 'Bo'dakari Babilôniakaaraboni kaka'da'dini Nabucodonosor kohana va'ora vagathi'iki adani judeus kaija'ari Jerusalém sidaji vahojaki. Va'ora vavikha'iki adani ija'ari vagathaki vaipohiki Babilônia kaarabonia. Judeus kaija'ari vihiriki adani Babilônia kaaraboni kaija'arini. Vahararana hoja'iki ada Mordecai.
7 Mordecai bivikha'iki ida igamina kohana kaisai Ester oniki. Kamaboa hi'ini mani ida Mordecaia bikanaisaihavini hi'ia. Binavijava'ihi ida idaikidisai fori hini. Oniaroa, ima'inavi hi'ihi ida Ester. Jahaki ida nokiani. Jahaki jaboni ida kidihojai.
8 Hari. Xerxes va'ora honariaha adani kidihonai abono ima'inavi-ra va'ora vanajoronivini, Susã sidajia va'ora vavikhavini gorana karahoa vahojara kaimoni. Ima'inavi vahararana hoja'ihi ida Ester. Xerxes gorana kahonai abono Hegai oniki va'ora gahani'aha adani ima'inavi, va'ora akadava'a'aha gamo vaibavi xerxes gorana karaho bodinia.Hegai kabadani ka'oa ida Xerxes kagamo fori vihiki-ra va'ora akadava'avini, vamakhanirara kaimoni.
9 Oniaroa, Hegaia bivajaha'ihi ida Ester. Binaibavijaha'ihi ida Ester. Binaibavijaha'ihi ida ibavi jahaki kidimoni gora bodinia. Va'ora honaria'iki adani kidibadani abono gamo 7 vihiki vaipohina vaakodiaja kaimoni. Jorakia binakama'da'ihi ida Ester asafini namani-ra vakamisaivini. Mahi hahavi bada vani'aki ida misai kabadanihi Ester kania. Hegaiabino'aki jaboni ida Ester 'bai jahakia. mahi ipohiki gamo akadibadani ida Ester-ra vanajahavini nokiani jahaja kaimoni, arabo kaka'da'dini kania okhani viahania.
10 Vakadiania hojani oadani Ester asia banaabaki ida kidibadia Mordecai athi. Mordecai ni-binofiki judeu anani hini-ra kahivini ida Ester, oniani ida judeusanani hini-ra nanamitharavini hija. Ni-vara va'ora vani'aki adani kidiabi'i kohana, kidija'ari avikhananavaki vihiki jaboni.
11 Mahi hahavi adahaha ada Mordecai gamo vaibavi banininia biogaja kaimoni ida Ester niha ninini.
12 Hari. Masiko 6 hiki ipohina mirra vania gamo va'ora vakamisaihaki adani ima'inavi afohanana. Naothinia misai jahani jahaki hoariha maina va'ora vakavamisaihaki adani ima'inavi masiko 6 hiki ipohina afo'iana. Hari hihi ida vakadibadani, Xerxes kania vikhami'aha afohanana.
13 Ima'inavia biavikha'iki ida nahina hahavi binofiki kidiania. Oniania binagathogatho'iki ida makari binofiki bikaimahaki kaimoni.
14 Mithani vani okha'ihi ida ima'inavi Xerxes kania. Ka'afokajomani gamo vaibavi hoariha okhami'ihi. Xerxes kagamo fori vihiki vahararana hojaja kaimoni.
15 Hari. Oniaroa, Ester maina hida okha'ihi Xerxes kania. Ija'ari hahavi Ester-ra avigakia vavajahaki ida. Ester binaaba'ihi ida Hegai athi, biavakha'ihi ida kidinahina Hegaia binava'isohijovini hi'iki.
16 Ester Xerxes kania okha'ini kari Xerxes va'ora vaka'da'di'iki adani kidiarabo kaija'arini badara 7 hiki ipohini.
17 Oniaroa, Xerxes kania okha'ihi ida Ester. Bivajaha'ihi. Ester Xerxes va'i-ra najahajaha'ihi, bivajaha'ihi ida kidihojai, binofihi ida kidigamo ka'oa hini. Bikanaibavi'ihi ida kajamri kakaidavaki ka'da'dinia. Vasti aja'dini hi'ihi ida Ester.
18 Arabo kaka'da'dinia bivahonariahi'ihi ida ihinikakaraho amonahani, khai vani'aja kaimoni ida Ester kidigamo hini. Vaipohi'oamanira adani kanori abono. Kidihonai abono ka'da'di vihiki adani Xerxes kabadania vakabadaniki adani. xerxea bikarona'ihi ida athi kidiarabo kaija'arini vaibavia bada vakhanirinakaimoni ihinika amonahani kamahini. Kidija'ari vaipohiki-ra va'ora no'a'afiahavini hi'ihi jaboni ida va'iga kaidivaki afohanana.
Mordecaia biakava'ijoaki ada Xerxes
19 Oniaro kari Xerxea bihonariaha ada Mordecai kidiarabo kabadania kabadanina. Ka'da'di hiki ada Mordecai Xerxe-ra kakodiavini arabo-ra akadava'avini.
20 Ester asia binaabaki ida Mordecai athi isai hini kari vani fori hini, ni-nahina-ra nava'isohi'iaki kaho judeusanani hinia.
21 Hari. Mordecai kidibadania kabadaniha arabo kaka'da'dini gorana karaho bodinia, bikamithamahahi ida Xerxes kahonai abono vi'bamiki vara vakhanina. Gora avakadava'ava abono vihiki adani. Bigtã, Teres vaoniki adani. Xerxe-ra vakaimahivini mani ida vanaabinivini vanofivini hija.
22 Hari. Vakadivarani bikamithamahavini naothinia Mordecaia binava'isohi'ihi ida Ester. Oniani maina binava'isohi'aha ada kidimakhira Morecai kavarania.
23 Hari. Arabo kaka'da'dinia binako'diki ida varani ka'oa hini, ka'oa hirini. Ka'oa hini bikaragavini mani ida honai abono vi'bamiki vaabinina-ra vahonariahivini hi'ia. Vaabinina naothinia arabo kaka'da'dinia bihonariaha ada jirihi abono nahina namitha'iki monini-ra najirivini. Arabo kaka'da'dini kabadani hahavi hojaki papira athinia, ija'ari vanamitharonisiagakia avigaja kaimoni ida nahina namitha'bo'da'iki.