Hamã binofiki ida judeus kaija'ari-ra nihimavini
3
Hari. Oniaroa, Xerxes bihonariaha ada makhhira Hamã oniki kidihonai abono okhananavaki hina. Ovari va'ora vaka'da'diki adani Xerxes kahonai abono vahoariha, kidiarabo kaija'arini vihiki. Amalequita kaija'arini ada Hamã. Agague kahanodi namitharonisiagaki ada. Agague hokina kari judeus kaija'ari-ra va'ora nihimavini-ra nofiki ada. Asia kidija'ari namitharonisiagaki judeus kaija'ari-ra vanihimavini-ra vanofiki.2 Hari. Xerxes va'ora honariaha adani kidihonai abono vahoariha gora bada vakhaniki?:
-Onofiki ida Hamã viaha avaarasiasiaonahani avakajo'athararini, nokiajakaimoni ida avavava'ihavini - niha ida arabo kaka'da'dini, oniani ida athi vanaabavini hija. Hari Mordecai ni-aasiaki, ni-kajo'atharariki Hamã viaha.
3 Honai abono vahoariha vanana'dohi'aha ada Mordecai:
- Nahina mani ida Xerxes kahonari-ra inaabaravini hija?
4 Mahi hahavi vakadivarani afobakhia ida athi binaabaravini. Vanofiki ida binaavabavini va'oaniaro fori hira kaimoni. Va'ora nava'isohivini hiki judeus kaija'ari hini,ni-asohiki ida kidimoni ija'ari viaha aasiana, kajo'athararina. Oniaroa, Hamã kania avikhami'aha adani honai abono, vananamitha'ihi ida Mordecaai athi, ogaja kaimoni ida athi binaabaravini Hamã biva'ahavini, biva'aharavini.
5 Va'i jokojoko'aha ada Hamã. Ni-bivajahapa'itxiki ida Mordecai kajo'athararirina viaha binanokiaja kaimoni ida bivava'ihavini.
6 Hamã-ra vanava'isohivini hiki jaboni Mordecai judeus kaija'ari hina. Oniaroa, ni-binofiki ada Mordecai hoarana abinina, binofiki ida judeus kaija'ari hahavi vaabinina-ra vahonariahivini Xerxes kaarabonia vahojaki.
7 Oniaro kari badara 12 hiki ipohini Xerxes va'ora vaka'da'diki adani kidiarabo kaija'arini. Hamã biogavini binofiki ada masiko hana hina jahaki judeus kaija'ari vaabinina-ra vahonariahivini. Oniania iosonararihi ida ja'di jiriki itxani biogaja kaimoni ida mahi, masiko, badara hiki jahani. Vada bini'arariki ida ja'di jiriki, bikava'ibodivaraniki ada masiko ipohina radahana naothinia va'ora vanaabinira kaimoni. Binagathogathoki ada masiko ada oniki, mahi 13 hiki kamahini. Adar kamasikona anaoniki fevereiro.
8 Okhami'aha ada Hamã Xerxes kania, bini'a'aha:
- Kodika'da'di, kadaraboa avahojaoniki adani ija'ari kadava'isohihi-ra vanaabariki. Vavahojaki ida vakadija'ari avikhananaviki vakadiva'isohihi, oniani ida iathini-ra vanaabaravini hija. Ija'ari vahoariha fori vihiriha adani. Niasohiki ida iathini-ra vanaabaravini iva'ahavini.
9 Xerxes, inofihi ida vaabinina; honari jiriki-ra onamonahahi, vaabinihahavira kaimoni adani judeus kaija'ari. Ivani inamonaha bana ida ionini karajomini papira iathini namithavini vakadiania. Ira onava'isohivini-ra inamonahahi; pra 'ba'dani 300 mil hiki ipohini-ra onaibavihi arabo kajinironi bavinia, abosija kaimoni ida va'ora vanaabinivini kabadanihi - niha ada Hamã.
10 Oniaroa, Xerxea biani'aha ada sa'avithinahi sa'a hojaki. Namana hoja'iki ida ka'da'di onina karajomini papira-ra karajomivini kaimoni. Hamã-ra no'a'aha kidisa'avithinahia bikarajomija kaimoni honari Hamã binajiri'iki. Arabo kaka'da'dini karajomi nokiani papira kania, ija'aria avigaki ida aarabo kaka'da'dini papira-ra karonavini.
Hari. Hamã kaija'ari avikhananavaki va'ora vakaimajahariki adani judeus kaija'ari, va'ora vanaabinivini va'ora vanofibakhiaki adani.
11 Hari. Arabo kaka'da'dinia bini'a'aha ada Hamã:
- Ni-onofiki ida jiniro. Va'ora oarakhaki adani ija'ari isa'ani kabodinia bada ini'aja kaimoni ida inofiki vakadiania niha ada Xerxes.
12-14 Radaha'ihi ida mahi ipohiriki, oniaroa, Hamã va'ora baranaha'aha adani papira najiriva abono kidiania vikhana. Va'ora nava'isohi'aha honari vanajiriki kaimoni. Pérsia kaarabonia vahojaki adani nação ipohiki, athii vahoarahanana vaathiki adani. Hamã vaa'ora vahonariahiha adani papira najiriva abono honari-ra avarakakosivini athi hahavi ija'ari vaathi hiki. Binofiki ida ija'ari hahavi kidihonari avigavini. Vanamonahavini naothinia Hamã bikarajomi'ihi ida papira afohanana arabo kaka'da'dini karajomia. Hamã va'ora karona'aha adani athi avikhava abono honari jiriki-ra avavikhaonani'avini arabo kaija'arini vakadika'da'di vaibavi hahavi, va'ora vanava'isohira kaimoni adani ija'ari hahavii. Nimania ida honari jiriki athini:
- Arabo kaka'da'dini Xerxes onikia bivahonariahiki bana adani judeus kaija'ari hahavi vaabinina. Masiko adar oniki mahi 13 hiki vani va'ora vanaabini bana adani judeus kaija'ari, makhira, gamo, isai vihiki. Hari'a aaniva ida hoarani. Hari'a va'ora vava'adi. Visaari bana ida vakadinahina hahavi mahija arabo kajinironi kania avararakhavini. Onofiki ida ibavi hahavia ija'aria vara vavani'avini hida honari, ija'aria vanaviahanokhaja kaimoni ida mahi va'ora vanaabinivini. Nimania hidahonari athini.
15 Oniaroa, arabo kaka'da'dini va'ora honariaha adani honari avikhava abono jorakia avikhana ija'ari vaibavi hahavia. Susã sidaji jaboni vara vavani'a'ihi ida honari athi 'barakia ija'ari hahavia mitha vani'aja kaimoni. Honari-ra vakamithavini naothinia vava'i kidakidakarahoki adani sidaji kaija'arini. Akarafarakhama'ihi ida va'i kidakidani.
Hari. Gorana karaho bodinia vavithirari'aha adani Xerxes, Hamã khama vako'avahara kaimoni.